دىمى قالماي جانىپ كەتتى

«لانتسەلوت» مەيرامحاناسىنان شىققان ءورت ەلەكتر جەلىسىنىڭ قىسقاشا تۇيىقتالۋىنان  بولۋى مۇمكىن. بۇل تۋرالى ءورت ءسوندىرۋ قىزمەتى بريفينگتە حابارلادى. جالپى ونىڭ ورتەنىپ جاتقانى جايلى حابار  ءورت سوندىرۋشىلەرگە 16 ساعات 30 مينۋتتا تۇسكەن. قىزىل جالىندى قۇرىقتاۋعا 11 تەحنيكا مەن 30  ادام جۇمىلدىرىلعان. ماماندار الدىمەن  مەيرامحانا قىزمەتكەرلەرىن قاۋىپسىز جەرگە شىعارىپ, الاۋلاعان جالىننىڭ كورشى ۇيلەرگە جايىلىپ كەتپەۋىنە نازار اۋدارعان. وقيعا كۋاگەرلەرىنىڭ ايتۋىنشا, ءورتتىڭ قىزۋىنىڭ كۇشتىلىگى سونداي, كورشى عيماراتتاردىڭ سىرتى بالقىپ كەتكەن. ءورت كەزىندە كورشى ءۇيدىڭ  تەرەزەلەرى سىنىپ, دۋالدى بويلاي وسكەن قىلقان جاپىراقتى اعاشتارى جانعان. – ءورت كەزىندە مەيرامحانادان ءبىر بوس, ءبىر تولىق گاز بالونىن الىپ شىقتىق. مۇنىڭ ءوزى مۇندا ءورت قاۋىپسىزدىگى ساقتالمايتىنىن كورسەتەدى. 2012 جىلى وسى مەيرامحانانى تەكسەرۋ بارىسىندا ءورت قاۋىپسىزدىگى ساقتالمايتىنى انىقتالعان بولاتىن. سول كەزدە قوجايىنعا ايىپپۇل سالىنعان-دى. الايدا,  ول وتكەننىڭ اششى ساباق­تارىنان قورىتىندى شىعارماعان بولىپ شىقتى, دەيدى ءورت ءسوندىرۋ قىزمەتى باستىعىنىڭ ورىنباسارى دارحان حالمۇراتوۆ. وتقا ورانعان اۋماق 700 شارشى مەتردى قۇرايدى. قىزىل جالىندى بۇعالىقتاۋ1,5 ساعاتقا سوزىلعان. ال, ما­ماندار مەيرامحانانىڭ ءور­تە­نۋى ەلەكتر جەلىسىنىڭ قىسقاشا تۇي­ىق­­­ت­ا­لۋى­نان بولدى دەپ بولجاپ وتىر. «لانتسەلوت» مەيرامحاناسىنىڭ قوجايىنى وۆيك ارسەنيان ءورت شىققان كۇنى قالادا بولماعان.  كۇلگە اينالعان مەيرامحاناسىن كورگەندە, قىزمەتكەرلەر مەن كورشىلەرىنىڭ اماندىعىنا مىڭ تاۋبە دەگەنىن ايتادى. بۇل بيىلدىققا تىركەلگەن ەڭ ءىرى ءورت وقيعاسى كورىنەدى. تاپ سول كۇنى اقتوبەدە 20 جەردە ءورت بولعان. اۋا رايىنىڭ اپتاپ ىستىق ەكەنىن ەسكەرسەك ءورت قاۋپى ءالى سەيىلمەيتىنى بەلگىلى. سوندىقتان ءورتتى بولدىرماۋدا اسا ساقتىق كەرەكتىگى ايتپاسا دا تۇسىنىكتى. ساتىبالدى ءساۋىرباي, «ەگەمەن قازاقستان». اقتوبە قالاسى.