مەرەيدى وسكەمەننەن شىعاتىن «مەنىڭ ولكەم» گازەتىندە قىزمەت ەتىپ جۇرگەن كەزىنەن بىلەمىن. گازەتكە ماقالالارىن, الەۋمەتتىك جەلىگە جازۋشى ورالحان بوكەيدىڭ پورترەتىن, التايدىڭ ايگىلى مۇزتاۋى بەينەلەنگەن پەيزاجدارىن جاريالاپ جۇرگەنىن كورىپ, ءارى جۋرناليست, ءارى سۋرەتشى ىنىمە قىزىعا قارايتىنمىن. كاتونقاراعاي اۋدانىنىڭ شىڭعىستاي اۋىلىندا دۇنيەگە كەلگەن ول ورالحان بوكەيدىڭ اۋىلداسى ەكەنىن ماقتان تۇتادى. بالا كۇنىندە ايگىلى جازۋشىنىڭ اۋىل كوشەسىن قاق جارىپ بارا جاتقان اسقاق, كەربۇعى كەيپىن كورگەنىن جىر قىلىپ ايتادى. وقۋشى كەزىندە كەشە عانا ءومىردەن وتكەن جازۋشى ديداحمەت اشىمحان ۇلىمەن سوناۋ التايدان حات جازىسىپ تۇرىپتى.
مەرەي قايناروۆ شاكارىم اتىنداعى سەمەي مەملەكەتتىك ۋنيۆەرسيتەتىنىڭ بەينەلەۋ ونەرى جانە ديزاين فاكۋلتەتىن تامامداعان سوڭ گلۋبوكوە اۋدانىنىڭ «اقبۇلاق» گازەتىندە ەڭبەك جولىن باستادى. اۋداندىق باسىلىمنان باستاپ ساتىلاپ ءوسىپ كەلە جاتقان جاس جىگىت بۇگىندە شىعىس قازاقستان وبلىستىق «ديدار» گازەتىنىڭ بەلدى ءتىلشىسى. ءوڭىردىڭ باس گازەتىنە كەلگەنىنە جىلدان اسسا دا, تۇشىمدى جاريالانىمدارىمەن شىعارماشىلىق ورتاعا بىردەن ءسىڭىپ كەتتى. ەڭ قىزىعى, جازبالارىمەن شەكتەلمەي, وبلىستىق گازەتتە ەڭبەك ەتەتىن ارىپتەستەرىنىڭ شارجدارىن اينىتپاي سالىپ, قالامداس دوستارىنا توسىنسىي جاساي باستادى. الەۋمەتتىك جەلىگە جاريالانعان
شارجدارىنان ارىپتەستەرىنىڭ ارقايسىسىنىڭ مىنەز-قۇلقى, بولمىسى انىق بايقالادى. ءازىل شارجداردى رەداكتسياداعى اقىن, ايتىسكەر دوسى مۇراتحان كەنجەحان ۇلى قۋاقى ولەڭ جولدارىمەن اسەمدەپ قويادى. مەرەيدىڭ ءار شارجى شىققان سايىن, وبلىستىڭ ءار قيىرىن شارلاپ, تىنىم تاپپاي جۇرەتىن گازەت تىلشىلەرىنىڭ ومىرىنە جاڭا لەپ سوققانداي, ءبىر جادىراپ قالادى.
مەرەي ارىپتەسىمىزدىڭ ەلىمىزگە بەلگىلى قالامگەرلەر مەن جۋرناليستەر قاۋىمىنا ارناعان شامعا تيمەس شارجدارىمەن ءباسپاسوز كۇنى قارساڭىندا ءبولىسۋدى ءجون كوردىك.
دۋمان اناش,
«ەگەمەن قازاقستان»
وسكەمەن.
شارجدا: مەملەكەتتىك سىيلىقتىڭ لاۋرەاتى,
جازۋشى الىبەك اسقاروۆ; «ەگەمەن قازاقستان» رگ» اق پرەزيدەنتى ساۋىتبەك ابدراحمانوۆ; بەلگىلى تەلەجۋرناليست نۇرتىلەۋ يمانعالي ۇلى.
