بايلانىسشى بولۋ – بالا كەزدەن ارمانىم

مەن الىس اۋدان – ويىلدىڭ توپىراعىندا تۋىپ-ءوستىم. اكەم نيكولاي تيموفەەۆيچ پەن انام ۆالەنتينا الەكساندروۆنا قازىر دە ويىلدا تۇرىپ جاتىر. قازاق بالالارىمەن تاي-ق ۇلىنداي تەبىسىپ, بىرگە ءوستىم. سودان بولار, قازاقشام جاتىق, جەرلەستەرىممەن ءوز تىلدەرىندە ەركىن سويلەسەمىن. ويىلدا ورتا مەكتەپ بىتىرگەننەن كەيىن اقتوبە بايلانىس كوللەدجىن قىزىل ديپلوممەن ءتامامداپ, تۋعان جەرىمە ورالىپ, ويىل اۋداندىق تەلەكوممۋنيكاتسيا تورابىنا جۇمىسقا تۇردىم. ۇجىمداعى ىنتىماقتاستىق پەن ءوزارا تاتۋلىق مەنى قاناتتاندىرىپ جىبەردى. قاي ىسكە دە جاۋاپكەرشىلىكپەن قاراۋعا داعدىلاندىم. ەكى جىلدان كەيىن ءوزىم جۇمىس ىستەيتىن ويىل تەلەكوممۋنيكاتسيا تورابى ديرەكتورلىعىنا جوعارىلاتقاندا ارىپتەستەرىمە دەگەن سەنىمىم بۇرىنعىدان دا نىعايا ءتۇستى. قازىر بۇل مەكەمەدە 30-عا جۋىق ادام ەڭبەك ەتەدى. ولاردىڭ ءبارى ءوز ءىسىنىڭ بىلىكتى ماماندارى. بارلىق ەلدى مەكەندەرمەن تەلەفون بايلانىسى بار. باسقا دا بايلانىس قىزمەتتەرى جولعا قويىلعان. تەلەحابارلار كورمەيتىن ەلدى مەكەن جوق. بۇرىننان قالىپتاسقان ۇجىمدىق وندىرىستىك جانە ەڭبەك ءداستۇرىن دامىتا وتىرىپ, جاڭاشا جۇمىس ىستەۋگە تالپىندىق. تۇتىنۋشىلاردىڭ كوڭىلىنەن شىعاتىنداي بايلانىس قىزمەتىن ۇسىنۋ وڭاي شارۋا ەمەس. دەگەنمەن, مەكەمەنىڭ ىرعاقتى جۇمىسىن قامتاماسىز ەتۋدە ارىپتەستەرىم ىلعي دا قولداۋ كورسەتىپ وتىردى. «ءبىر جەڭنەن قول, ءبىر جاعادان باس» شىعارا ەڭبەك ەتۋدىڭ ارقاسىندا وبلىس بويىنشا الدىڭعى ورىنداردا بولدىق. مۇنىڭ ءبارى ءوز ءىسىن جەتىك بىلەتىن ارىپتەستەرىمنىڭ ارقاسى ەكەنىن بەك سەزىنەمىن. ارىپتەستەرىمە ارقا سۇيەي وتىرىپ, قوعامدىق جۇمىستاردان دا قالىس قالمادىم. مەن ءبارىن بىلاي قويعاندا, قازاقتىڭ كەلىنىمىن. جۇبايىم امانگەلدى نۇرباەۆ بىرىڭعاي قازاق تۇراتىن ىرعىزدىڭ جىگىتى. سوندىقتان, ۇيدە مەيلىنشە قازاقى سالت-ءداستۇردى ۇستانامىز. جەتى نان پىسىرەمىن, باسقا دا ۇلتتىق تاعامداردى دايىندايمىن. ءوز ۇلتىمنىڭ دا ادەت-عۇرپىن بىلەمىن. كوپ بىلگەننىڭ ارتىقتىعى جوق. مەن بالا كۇننەن كوڭىلىم ۇناتقان كاسىپتىڭ كىلتىن تاپقانىما قۋانىشتىمىن. ويىلدىقتار اراسىندا ازدى-كوپتى بەدەلىم بولسا, ونىڭ وسى ءوزىم قالاعان قىزمەت ارقىلى كەلگەنىن دە سەزەمىن. وسىنداي ادال ەڭبەگىمنىڭ وتەۋى بولار, وتكەن جىلى وبلىستىق تەلەكوممۋنيكاتسيا مەكەمەسىنە جۇمىسقا اۋىس­تىم. قازىر وسىندا ەڭبەك ەتۋدەمىن, ساتۋ قىزمەتىمەن اينالىسامىن. بۇل ۇجىم دا مەنى جىلى قابىلدادى. ءبىر انادان تۋعانداي تاتۋلىقتا ەڭبەك ەتىپ جاتىرمىز. مەرەكەگە تولاعاي تابىسپەن كەلدىك. ءوزىمنىڭ ەڭبەك جولىمدا ۇيرەنگەندەرىمدى وسى جەردە دە ءتيىمدى پايدالانۋعا تىرىسۋدامىن. مەن قولىم بوساسا گۇل وسىرگەندى جانىم قالايدى. بارلىق گۇلدى ۇناتامىن, الايدا, ورحيدەيا جانىما جاقىنىراق. سوندىقتان دا, بۇگىنگىدەي مەرەكەلىك ساتتە ارىپتەستەرىمە حالىققا قالتقىسىز قىزمەت ەتىپ, جۇمىستارىندا تابىستى بولۋعا, وتباسىندا باقىتقا كەنەلۋلەرىنە تىلەكتەستىك بىلدىرەمىن. ناتاليا تامبوۆتسەۆا, «قازتەلەكوم» اق اقتوبە وبلىستىق تەلەكوممۋنيكاتسيا ديرەكتسياسى ساتۋدى باسقارۋ قىزمەتىنىڭ جەتەكشى مامانى. اقتوبە وبلىسى.