سوڭعى ءتۇيىن – «وي زەرەك» كۆيز ويىنى. بايقاۋ بارىسىندا قاتىسۋشىلاردىڭ لوگيكالىق ويلاۋ قابىلەتى, اياق استىنان تاپقىرلىق تانىتۋى, ءازىل-قالجىڭعا يكەمدىلىگى, تۇتاستاي العاندا كوماندالىق رۋحتى نىعايتۋ تارازى باسىنا تارتىلدى. ويىنعا ورتالىق بازانىڭ جەتى كومانداسى قاتىستى. ءار كوماندا ءتورت قاتىسۋشىدان تۇراتىن. ىلكىمدى ءىس-شارا تازا قازاق تىلىندە وتكىزىلدى.
قاتىسۋشىلار تىلدەرى جەتكەنشە ءوز كوماندالارىن جان-جاقتى قىرلارىنان تانىستىرىپ, ءتىلدى مەڭگەرۋگە دەگەن ىقىلاس ۇمتىلىستارىن كورسەتە ءبىلدى. ۇشقىر ويدىڭ ۇشقىنىن لاۋلاتاتىن «وي قىزدىرۋ» سايىسىندا قاتىسۋشىلار ويلاۋ جۇيەسىنىڭ دۇرىستىعى مەن جىلدام پىكىر قورىتۋ دەڭگەيلەرىن تانىتتى. «BRAIN MIX» تاقتاسىندا ءبىلىم دەڭگەيى مەن لوگيكالىق ويلاۋ قابىلەتى ساراپقا سالىنسا, «ويلان, تاپ, اۋدار» ارەناسىندا جەرگىلىكتى ۇلت ءتىلىن قانشالىقتى مەڭگەرگەندىگىن كورسەتتى, ال, ء«داستۇر الاڭى» ۇلتتىق داستۇرلەر تۋرالى تانىم مەن تۇسىنىكتى بەزبەندەدى.
– بۇگىنگى ءىس-شارانىڭ نەگىزگى ماقساتى انا ءتىلىمىزدى, سالت-ءداستۇرىمىزدى ناسيحاتتاۋ, – دەيدى سەرىكتەستىك باسشىسى دوسىمحان ارالباەۆ, – وزگە ۇلت وكىلدەرىنىڭ مەملەكەتتىك ءتىلدى مەڭگەرۋىنە بارلىق جاعدايدى جاساپ جاتىرمىز. ىنتالاندىرۋ ماقساتىندا بەرىلەتىن سىياقى قورى دا مول. ەڭبەك ەتىپ جاتقان ادامداردىڭ ءبارى ءبىر ءۇيدىڭ بالالارىنداي مەملەكەتتىك تىلدە سويلەپ, جەرگىلىكتى ۇلتتىڭ ادەت-عۇرپىن تانىپ بىلەتىن بولسا, قۇرمەتى دە ارتادى. سايىپ كەلگەندە بۇل بىرلىكتى بەكەمدەي تۇسپەك.
ءار كوماندا مەملەكەتتىك ءتىلدى قانشالىقتى مەڭگەرگەنىن, شىعارماشىلىق قۋاتىن جانە بىرلىگىن اڭعارتا ءبىلدى. بايقاۋ قورىتىندىسى بويىنشا باس جۇلدەگە «بىلىمگە قۇشتارلار» كومانداسى لايىق دەپ ۇيعارىلىپ, ءتورت ميلليون تەڭگە, ءبىرىنشى ورىنعا «ناۋرىزكوجە» كومانداسى كوتەرىلىپ, ءۇش ميلليون تەڭگەگە يە بولدى. ەكىنشى ورىنعا لايىق دەپ ەسەپتەلگەن «شامشىراق» كومانداسىنا ەكى ميلليون, ءۇشىنشى ورىندى ەنشىلەگەن «وتانداستار» كومانداسى ءبىر ميلليون تەڭگە سىياقىعا يە بولدى. ەرەكشە كوزگە تۇسكەن بەس ويىنشىعا ءاربىر اتالىمدار بويىنشا سىي-سياپات تابىستالدى.
اق تۇيەنىڭ قارنى جارىلعان ءاز ناۋرىز مەرەكەسىندە سەرىكتەستىكتىڭ اۋدانداعى بولىمشەلەرىنە التى ارناۋلى تەحنيكا مەن جەڭىل اۆتوكولىكتەر تابىس ەتىلدى.
كوكشەتاۋ
