جاڭا پاتەرلەر ورال قالاسىنىڭ جاڭادان قۇرىلىپ جاتقان اقجايىق شاعىناۋدانىندا ورنالاسقان. كەيىنگى جىلدارى بۇل جەردە كوپتەگەن الەۋمەتتىك نىسان بوي كوتەرىپ, اسىرەسە تۇرعىن ءۇي قۇرىلىسى قارقىندى ءجۇرىپ جاتىر. بولاشاقتا بۇل اۋداندا 70 مىڭعا دەيىن تۇرعىن بولادى دەپ جوسپارلانعان.
جاڭا قونىس يەلەرىن ايماق باسشىسى ناريمان تورەعاليەۆ قۇتتىقتاپ, پاتەر كىلتتەرىن سالتاناتتى تۇردە تابىس ەتتى.
ء«وڭىر حالقىن باسپانامەن قامتۋ – مەملەكەت ساياساتىنىڭ باسىم باعىتتارىنىڭ ءبىرى. 2023 جىلدان بەرى وبلىستا تۇرعىن ءۇي قۇرىلىسىنا 63 ملرد تەڭگە ءبولىنىپ, 3 698 پاتەر پايدالانۋعا بەرىلدى. كەيىنگى 3 جىلدا اۋدان ورتالىقتارىن قوسپاعاندا تەك اۋىلداردا 1 733 وتباسى باسپانالى بولدى. جاڭا باسپانا – ءار وتباسى ءۇشىن ۇلكەن قۋانىش, جاڭا ءومىردىڭ باستاۋى. بۇل ۇيلەر سىزدەرگە تەك جايلى مەكەن ەمەس, بەرەكەلى شاڭىراق بولسىن!», دەدى وبلىس اكىمى ناريمان تورەعاليەۆ.
ورال قالاسى بويىنشا تۇرعىن ءۇي كەزەگىندە 27 مىڭنان استام ازامات تىركەلگەن. بيىل الەۋمەتتىك وسال توپتارعا 200 پاتەر, سونداي-اق نەسيەلىك نەگىزدە 1 000 پاتەردى بەرۋ جوسپارلاندى. قازىرگى ۋاقىتتا 370 پاتەردى قامتيتىن 3 كوپقاباتتى تۇرعىن ءۇيدىڭ قۇرىلىسى اياقتالدى. بۇل پاتەرلەردى كەزەكتە تۇرعان ازاماتتارعا بەرۋ ءۇشىن كونكۋرس راسىمدەرى جۇرگىزىلۋدە. بۇدان بولەك 248 پاتەردى قامتيتىن تاعى 2 كوپقاباتتى ءۇيدىڭ قۇرىلىس جۇمىستارى ءبىتتى.
ناريمان تورەعاليەۆ ءوز سوزىندە ورال قالاسىن كوگالداندىرۋ جانە «تازا قازاقستان» ەكولوگيالىق اكتسياسىنىڭ ءمان-ماڭىزىنا توقتالىپ ءوتتى.
«جەر اياعى كەڭىگەن سوڭ تال-تەرەك وتىرعىزىپ, كوپ بولىپ, كوگالداندىرۋ جۇمىسىن قولعا الامىز. بىلتىر ءبىزدىڭ ءوڭىر ەلدى مەكەندەرىندە 242 مىڭ دانا اعاش ەگىلدى. بيىل مەملەكەتتىك ورمان قورى اۋماعىندا 8,8 ملن دانا اعاش-بۇتاق كوشەتىن وتىرعىزۋ جوسپارلانعان. مۇنىڭ ءبارى تابيعاتتى ايالاۋعا, قورشاعان ورتانى قورعاۋعا باعىتتالعان. دەگەنمەن, پرەزيدەنت باستاماسىمەن قولعا الىنعان «تازا قازاقستان» تۇجىرىمداماسىن سەنبىلىكتەر وتكىزۋمەن شەكتەلەتىن ءبىر-ەكى ايلىق ناۋقان ەمەس, قوعامدىق مادەنيەتتىڭ جارقىن كورىنىسى دەپ قابىلداعانىمىز ابزال», دەدى وبلىس اكىمى.
باتىس قازاقستان وبلىسى
