سۋرەتتى تۇسىرگەن: ن.بايبۋلين
ءىس-شارا بارىسىندا ماۋلەن اشىمباەۆ ناۋرىز مەرەكەسىنىڭ ەلدى جاڭعىرتۋدىڭ جاڭا كەزەڭىمەن تۇسپا-تۇس كەلۋىنىڭ ءمانى زور ەكەنىن اتاپ ءوتتى. سونداي-اق سەنات توراعاسى ناۋرىزدىڭ ەل جاڭعىرۋى مەن ۇلتتىق قۇندىلىقتاردى دارىپتەۋ اياسىنداعى بىرلىك, باۋىرلاستىق جانە ىنتىماق مەرەكەسى ەكەنىن جەتكىزدى.
ايتا كەتۋ كەرەك, ەتنواۋىلدا ەلوردا تۇرعىندارى مەن قوناقتارى ءۇشىن ۇزىندىعى 12 مەترلىك جارىقديودتى تۋننەل ورناتىلعان. بۇل تۋننەل سىرتقى الەم مەن مەرەكەنىڭ يننوۆاتسيالىق ەكوجۇيەسىن, سونداي-اق قازاقستاننىڭ تەحنولوگيالىق كەلەشەگىن بايلانىستىراتىن سيمۆوليكالىق وتكەل قىزمەتىن اتقارادى. مۇندا كەلۋشىلەرگە ۇلتتىق تاريحتى, ءداستۇرلى كيىمدەردى, قولونەر مەن سالت-داستۇرلەردى تانىستىراتىن تاقىرىپتىق ەكسپوزيتسيالار ۇسىنىلعان.
«جەتى قازىنا» اتتى گولوگرافيالىق كورمە ۇلتتىق كودتىڭ زاماناۋي ۇلگىدە جاڭاشا ءتۇسىندىرىلۋىن كورسەتەدى. يممەرسيۆتى تەحنولوگيالار ارقىلى جەتى قاسيەتتى قۇندىلىق تەك جادىگەر رەتىندە عانا ەمەس, قازاق حالقىنىڭ دۇنيەتانىمىنىڭ نەگىزى رەتىندە ۇسىنىلعان. بۇل تسيفرلىق ەكسپوزيتسيا عاسىرلار بويى ۇرپاقتان-ۇرپاققا جالعاسقان رۋحاني مۇرا مەن فيلوسوفيانى جاڭعىرتادى.
سونداي-اق جاساندى ينتەللەكت قولدانىلعان سپورتتىق ويىندار - «ي-فۋتبول», «Air Sadaq» ۆيرتۋالدى ساداق اتۋى جانە «اسىق اتۋ» ويىنىنىڭ تسيفرلىق نۇسقاسى ەلوردا تۇرعىندارى مەن قوناقتارىنىڭ ەرەكشە قىزىعۋشىلىعىن تۋدىردى. بۇدان بولەك, قاتىسۋشىلار ءداستۇرلى اسىق اتۋ, ساداق اتۋ, گىر كوتەرۋ, ارقان تارتۋ, لاڭگى تەبۋ جانە قازاقشا كۇرەس بويىنشا دا ءوزارا باق سىناستى. بۇل جارىستارعا ەلوردانىڭ اتاقتى چەمپيوندارى دا قاتىستى.
كوكتەمنىڭ اسەم كوڭىل كۇيىن كىتاپ, قىزعالداق جانە قازاقستاندىق ديزاينەرلەردىڭ كيىم كورمەلەرى, وتاندىق وندىرۋشىلەر مەن قالا قولونەرشىلەرىنىڭ جارمەڭكەسى, سونداي-اق كونتسەرتتىك باعدارلاما ايرىقشا اسەرمەن تولىقتىردى.
ايتا كەتەيىك, مەرەكەلىك «ەتنواۋىل» 21-23 ناۋرىز ارالىعىندا ەلوردا تۇرعىندارى مەن قوناقتارى ءۇشىن اشىق بولادى.
ىنتىماق كۇنى: قازاقستاندا ناۋرىزناما ونكۇندىگىنىڭ سەگىزىنشى كۇنى تويلانىپ جاتىر
