قىزىلوردا وبلىسىنىڭ اكىمى ازيا چەمپيونىن قۇتتىقتادى

قىزىلوردا. 13 مامىر. قىزىلوردا وبلىسىنىڭ اكىمى قىرىمبەك كوشەرباەۆ ەركىن كۇرەستەن ازيا چەمپيونى داۋلەت نيازبەكوۆتى قابىلدادى. سىر ەلىنىڭ تۋماسى جاقىندا كاتاردىڭ دوحا قالاسىندا وتكەن ازيا چەمپيوناتىندا التىن مەدال يەلەنىپ, ەلىمىزدىڭ تۋىن كوككە كوتەردى. بۇل تۋرالى egemen.kz ءتىلشىسى حابارلادى. داۋلەت نيازبەكوۆ 1989 جىلى جاڭاقورعان اۋدانىندا تۋعان. 10 جاسىنان كۇرەسپەن اينالىسقان ول ەرەسەكتەر اراسىندا ەلىمىزدىڭ 5 دۇركىن جەڭىمپازى, ازيا چەمپيوناتىنىڭ 2 مارتە قولا جۇلدەگەرى. وبلىس اكىمى قىرىمبەك كوشەرباەۆ د.نيازبەكوۆتى جەڭىسىمەن قۇتتىقتاپ, بۇل ۇلكەن جەڭىستەردىڭ باستاماسى بولسىن دەپ تىلەگىن ايتتى. «بيىل سپورتشىلارىمىز الەمدىك ارەنالاردا كوپتەگەن جوعارى تابىستارعا قول جەتكىزۋدە. سونىڭ ءبىر دالەلى – داۋلەتتىڭ جەڭىسى. سىر جۇرتشىلىعى اتىنان داۋلەت ءىنىمىزدى جەڭىسىمەن قۇتتىقتاپ, الداعى بايراقتى باسەكەلەردە تاۋەلسىز ەلىمىزدىڭ كوك تۋىن بيىككە جەلبىرەتە بەرۋىن تىلەيمىن. ال ءبىز ءوز تاراپىمىزدان بارلىق جاعداي جاساپ, قولداۋ كورسەتۋگە دايىنبىز», – دەگەن ايماق باسشىسى بالۋانعا قارجىلاي سىيلىق تابىس ەتتى. ءوز كەزەگىندە ازيا چەمپيونى د.نيازبەكوۆ كورسەتىلىپ وتىرعان قۇرمەتكە العىسىن ءبىلدىرىپ, الداعى باسەكەلەردە جەڭىسكە جەتۋ ءۇشىن بار كۇش-جىگەرىن ايامايتىندىعىن جەتكىزدى. سىر سپورتشىلارىنىڭ مۇنداي بيىك بەلەستەردەن كورىنۋى سپورتقا دەگەن قولداۋدىڭ ارتىپ وتىرعاندىعىنىڭ دالەلى. قازىردە ايماق حالقىنىڭ 24,5 پايىزى بۇقارالىق سپورتپەن شۇعىلدانادى. ايتا كەتەيىك, بيىل قىزىلوردا قالاسىندا بوكس ورتالىعى مەن يپپودروم, ناعي ءىلياسوۆ اۋىلىندا ستاديون مەن سپورت كەشەنى, قازالى, جاڭاقورعان اۋداندارىندا دەنە شىنىقتىرۋ-ساۋىقتىرۋ كەشەندەرى حالىق يگىلىگىنە پايدالانۋعا بەرىلەدى. قالا ورتالىعىندا 4 دۇركىن الەم چەمپيونى, 2 دۇركىن وليمپيادا چەمپيونى يليا يلين اتىنداعى اۋىر اتلەتيكادان سپورت كەشەنىنىڭ قۇرىلىسى, سونداي-اق 3 مىڭ ورىندىق جابىق فۋتبول مانەجى بوي كوتەرەدى. ەرجان بايتىلەس. دەرەك, سۋرەت: egemen.kz.