جەردىڭ سورتاڭدانۋىنىڭ الدىن الۋ ماقساتىندا وتىرار اۋدانى كوكساراي اۋىلىنىڭ تۇرعىندارى 15 شاقىرىم جول جيەگىنە كوشەت وتىرعىزىپ, تامشىلاتىپ سۋارۋ جۇيەسىن ەنگىزگەن. ءۇش جىل ىشىندە 100 مىڭ ءتۇپ اعاش ەگىپ, جاسىل جەلەكتى قورشاعان.
وبلىس اكىمىنىڭ ورىنباسارى نۇربول تۇراشبەكوۆتىڭ ايتۋىنشا, وبلىس اۋماعىندا 2021–2027 جىلدارى 110 مىڭ گەكتار جەرگە 170 ملن كوشەت وتىرعىزۋ جوسپارلانعان. سوعان سايكەس 2021–2025 جىلدارى 96 مىڭ گەكتارعا 146 ملن دانا اعاش وتىرعىزىلدى.
تۇركىستان وبلىسىندا ورمان شارۋاشىلىعىنا قاراستى جالپى اۋماعى 342 گەكتاردى قۇرايتىن 21 تۇقىمباق جۇمىس ىستەيدى. ولاردا وسىرىلگەن كوشەتتەر سانى 35 ميلليوننان اسقان. مىسالى, قازىعۇرت اۋدانىنداعى «جاسىل جەلەك» مەكەمەسىنىڭ تۇقىمباعى 20 گەكتار اۋماقتا ورنالاسقان. مەكەمە باسشىسىنىڭ مالىمەتىنشە, ونىڭ 16 گەكتارىندا كوشەتتىڭ 40 ءتۇرى وسىرىلەدى. قازىر مۇندا 1,9 ميلليون كوشەت بار.
جەتىساي اۋدانىندا 1 گەكتار جەرگە تۇقىمباق ۇيىمداستىرىلدى. «جەتىساي قىزمەت» مەكەمەسىنىڭ تەڭگەرىمىندەگى اتالعان تۇقىمباقتا 65 مىڭ تۇپكە جۋىق ەمەن, ايلانت, ۇيەڭكى, كاتالپا, اكاتسيا, كوك تەرەك, اق تەرەك, مىرزا تەرەك, يۆا, كەلىنتال, جيدە سەكىلدى اعاشتار مەن ساندىك كوشەتتەر دانمەن, قالامساپپەن وتىرعىزىلىپ, ولاردىڭ وسۋىنە قولايلى جاعداي جاسالعان. جالپى, وبلىس اۋماعىندا 2021–2025 جىلدارى 3,7 ميلليوننان استام كوشەت وتىرعىزىلعان, ولاردىڭ ورتاشا ونىمدىلىگى 63,5 پايىزدى قۇرادى.
تاريحي ماڭىزى زور «وتىرارتوبە» قالاجۇرتى ماڭىندا ۇيىمداستىرىلعان اكتسياعا قاتىسۋشىلار بىرلەسە وتىرىپ, 1000-عا جۋىق كوشەت وتىرعىزدى. جۋىردا تۇلكىباس اۋدانىنداعى ورتالىق ساياباققا اۋىلدىقتار 1000 ءتۇپ ەمەن كوشەتىن ەكتى. بىلتىر 76 مىڭنان استام اعاش كوشەتى ارنايى قورشالىپ, سۋارۋ جۇيەسىمەن قامتىلعان القاپتارعا وتىرعىزىلعان بولاتىن.
كۇنى كەشە ماقتاارال اۋدانى ابات اۋىلى مەن قوڭىرات اۋىلىنىڭ تۇرعىندارى ارنايى جەر تەلىمدەرىنە ارشا كوشەتتەرىن, «ابات» اللەياسىنا قوسىمشا 18 ارشا مەن 50 قارا تال وتىرعىزدى. سونىمەن قاتار بۇعان دەيىنگى تالدار ەگىلىپ قويعان 3 شاقىرىمنان استام اۋماق قورشالدى. ءبىر كۇندە اۋدان اۋماعىندا 400 ءتۇپ ارشا, 200 تۇت اعاشى, 50 ءتۇپ ۇيەڭكى, 300 قاراعاش كوشەتتەرى ەگىلدى. ال ارىس قالاسىنىڭ تۇرعىندارى ارىس-شاردارا اينالما تاس جولىنىڭ بويىنا 1 500 ءتۇپ اعاش كوشەتىن وتىرعىزدى. ەگىلگەن جاس داراقتاردىڭ بارلىعى – جەرگىلىكتى كليماتقا بەيىمدەلگەن, قالالىق تۇقىمباقتا ارنايى وسىرىلگەن قارا تال مەن سابىن تالدارى. «جاسىل ارىس» كمم قىزمەتكەرلەرىنىڭ ايتۋىنشا, بيىل كوكتەمدە قالا اۋماعىندا جالپى سانى 6 000 ءتۇپ اعاش وتىرعىزۋ جوسپارلانعان.
تۇركىستان وبلىسى
