استانا. 13 مامىر. بۇگىن ۋەفا چەمپيوندار ليگاسىنىڭ جارتىلاي فينالدىق باسەكەسى اياسىندا ەكىنشى قارىمتا ويىن وتەدى. سوعان سايكەس, يسپانيا استاناسى – مادريدتە جەرگىلىكتى «رەال» مەن «يۋۆەنتۋس» (تۋرين, يتاليا) فينال جولداماسىن ساراپقا سالادى. بۇل تۋرالى egemen.kz حابارلادى. ءتۋرنيردىڭ فينالىنا ليونەل مەسسي باستاعان «بارسەلونا» كومانداسى شىعىپ قويعانى بەلگىلى. ولار جارتىلاي فينالدا ميۋنحەننىڭ «باۆارياسىن» اينالىپ ءوتتى. ال «رەال» مەن «يۋۆەنتۋس» اراسىنداعى ويىننان كەيىن كاتالونيالىقتاردىڭ فينالداعى قارسىلاسى بەلگىلى بولادى. تۋريندە بولعان العاشقى ويىندا الاڭ يەلەرى 2:1 ەسەبىمەن جەڭگەنى ەسىمىزدە. سوندىقتان بۇگىن يتاليانىڭ كومانداسى سال دە بولسا باسىمدىققا يە. وسى رەتتە ادەتتەگىدەي, بۇگىنگى ويىنداعى كەيبىر قىزىقتى دەرەكتەرگە نازار اۋدارۋدى ءجون سانادىق.
- قوس كوماندا چەمپيوندار ليگاسىنىڭ 2013-2014 جىلعى ماۋسىمىندا ءبىر توپقا ءتۇستى. سول كەزدە مادريدتەگى ويىندا الاڭ يەلەرى 2:1 ەسەبىمەن باسىم تۇسكەن بولاتىن. ال تۋريندە قارسىلاستار تەڭ تارقاستى (2:2).
- بۇگىنگە دەيىن تۋرنير اياسىندا «رەال» مەن «يۋۆەنتۋس» 17 مارتە كەزدەسكەن. مادريدتىكتەر ءوز الاڭىندا 5 رەت جەڭىسكە جەتىپ, 2 ويىندا ەسە جىبەرگەن. اتالعان 5 جەڭىستىڭ بارلىعى ءبىر دوپ ايىرماشىلىعىمەن تىركەلگەنىن ايتا كەتەيىك.
- «يۋۆەنتۋس» 2002-2003 جىلعى ماۋسىمنان بەرى چەمپيوندار ليگاسىنىڭ جارتىلاي فينالىنا شىققان جوق. سول كەزدە دە تۋريندىكتەر فينال جولداماسى ءۇشىن «رەالمەن» ويناعان ەدى. مادريدتە وتكەن العاشقى ويىندا 1:2 ەسەبىمەن ەسە جىبەرىپ, ءوز الاڭىنداعى قارىمتا ماتچتا جەڭىسكە جەتتى (3:1). ناتيجەسىندە ءتۋرنيردىڭ فينالىنا شىقتى.
- ماسسيميليانو اللەگري جاتتىقتىراتىن «يۋۆەنتۋس» ليگا اياسىندا سىرت الاڭدا وتكىزگەن سوڭعى 3 ويىندا قاقپاسىنا گول جىبەرگەن جوق. توپتىق كەزەڭدە «مالمەنى» 2:0 ەسەبىمەن جەڭسە, 1/8 فينالدا دورتمۋندتە جەرگىلىكتى «بورۋسسيانىڭ» قاقپاسىنا جاۋاپسىز 3 گول سوقتى. ال شيرەك فينالدا «موناكومەن» تەڭ وينادى (0:0).
- «رەالدىڭ» قازىرگى باس جاتتىقتىرۋشىسى كارلو انچەلوتتي 1999-2001 جىلدار ارالىعىندا «يۋۆەنتۋستى» جاتتىقتىردى.
- انچەلوتتي مىرزا ءارتۇرلى كوماندالاردى جاتتىقتىرىپ ءجۇرىپ, «يۋۆەنتۋسكە» قارسى 25 ويىن وتكىزگەن. سونىڭ 6-ۋىندا ونىڭ كومانداسى جەڭىسكە جەتسە, 7 مارتە تەڭ ەسەپ تىركەلگەن. ال 12 رەت جاتتىقتىرۋشىدان ءتالىم العان فۋتبولشىلار «يۋۆەنتۋستەن» جەڭىلگەن ەكەن. ونىڭ سوڭعىسى اپتا بۇرىن تىركەلگەنى بەلگىلى.
- «يۋۆەنتۋس» ساپىنداعى الۆارو موراتا «رەال» فۋتبول مەكتەبىنىڭ تۇلەگى. ول تۋريندىكتەردىڭ قاتارىنا وتكەن جىلدىڭ جازىندا قوسىلدى. وعان دەيىن «رەال» ساپىندا 37 ويىن وتكىزىپ, 10 گول سوعىپ ۇلگەرگەن.
ويىن استانا ۋاقىتى بويىنشا ساعات 00:45-تە باستالادى. ەلامان قوڭىر. دەرەك: egemen.kz. سۋرەت: eurosport.ru.
كوماندالار مىنا قۇرامدا الاڭعا شىعۋى مۇمكىن.
