استانا. 13 مامىر. قازاقستان ارمياسى الەمدىك رەيتينگتە 14 ساتىعا كوتەرىلدى. اتالعان ءتىزىمدى Global Firepower ۇيىمى جاساپ شىقتى. تىزىمدە 126 مەملەكەت كورسەتىلگەن. سونىڭ اراسىندا قازاقستان 14 ساتى جوعارى ورلەپ, 66-ورىنعا جايعاستى. بۇل تۋرالى tengrinews.kz حابارلادى.
زەرتتەۋشىلەر ءار ەلدىڭ «ۇرىس جاعدايىنداعى قۋات يندەكسىن» انىقتاۋ ارقىلى وسىنداي ناتيجەگە قول جەتكىزگەن. رەيتينگتى جاساۋ بارىسىندا ماماندار 50-گە جۋىق فاكتورعا سۇيەنگەن. ونىڭ ىشىندە جالپى حالىقتىڭ جانە ەلدى قورعاۋعا جارامدىلاردىڭ سانى ەسەپكە الىنعان. قۇرلىقتا, اۋەدە جانە سۋدا ۇرىس جۇرگىزە الاتىن اسكەري تەحنيكالارىنىڭ سانى دا نازاردان تىس قالمادى. سونداي-اق, ەكونوميكالىق رەسۋرستار, مۇنايدى ءوندىرۋ جانە ەكسپورتتاۋ بويىنشا كورسەتكىشتەر جانە ەلدىڭ قارۋلانۋ ءۇشىن جۇمساۋى مۇمكىن قاراجاتى قاپەرگە الىنعان. رەيتينگتىڭ تۇزىلۋىنە اسەرىن تيگىزگەن تاعى ءبىر فاكتور – قاتىسۋشى ەلدىڭ گەوگرافيالىق ورنالاسۋى. اتالعان بارلىق مالىمەتتەر اشىق دەرەك كوزدەرىنەن الىنعانىن ايتا كەتەيىك.
ءتىزىمدى جاساۋشىلاردىڭ پىكىرىنشە, قازاقستان ارمياسىنىڭ نەگىزگى كۇشىن ەل بيلىگىنىڭ شەت ەلدەردەن ساتىپ العان قارۋ-جاراقتارى قۇرايدى. Global Firepower-ءدىڭ مالىمەتىنە سۇيەنسەك, قازاقستان ارمياسىندا 300 تانك, 1,6 مىڭ بروندالعان ماشينا, 744 ارتيللەريالىق قارۋ جانە 393 راكەتا جۇيەسى بار. سونىمەن قاتار, سوڭعى جارتى جىلدا قازاقستاندا ۇشاتىن اسكەري اپپاراتتاردىڭ سانى 233-كە دەيىن ارتقان. ولاردىڭ اراسىندا 100-گە جۋىق جويعىش ۇشاق (يسترەبيتەل) جانە 84 تىكۇشاق بار (ونىڭ ىشىندە 18-ءى شتۋرمالدى).
ۇيىمنىڭ انىقتاۋىنشا, حالىق سانى بويىنشا كورسەتكىشىمىز مىناداي. 18 ملن.-عا جۋىق حالقىمىزدىڭ 8,3 ملن.-ى ەل باسىنا كۇن تۋعان جاعدايدا ساپقا تۇرۋعا دايىن. بۇدان بولەك, رەيتينگ بويىنشا قازاقستان ارمياسىنىڭ بيۋدجەتى 2,4 ملرد. دوللاردى قۇراعان. ءتىزىم جاساۋشىلار مالىمدەگەندەي, ءبىزدىڭ ەل تاۋلىگىنە 1,6 ملن. باررەل مۇناي وندىرەدى.
اتالعان رەيتينگتە كوش باسىندا اقش تۇر. ول ەلدە ءدال قازىرگى تاڭدا ۇرىس جاعدايىنا دايىن 145 ملن.-نان استام ادام بار ەكەن. ەكىنشى ورىندا كەلە جاتقان رەسەيدە بۇل كورسەتكىش 69 ملن.-عا تەڭ. ۇزدىك ۇشتىكتى قىتاي تۇيىندەگەن (749 ملن. ادام). سونداي-اق, العاشقى وندىقتىڭ ىشىندە ءۇندىستان, ۇلىبريتانيا, فرانتسيا, گەرمانيا, تۇركيا, وڭتۇستىك كورەيا جانە جاپونيا بار. ەڭ سوڭعى ورىنداردى موزامبيك, سومالي جانە مالي سىندى افريكا مەملەكەتتەرى العان.
ايتا كەتەيىك, قازاقستان ارمياسى جۋىردا تاعى ءبىر جويعىش ۇشاق تۇرىمەن تولىقتى. ناقتى ايتساق, از ۋاقىت بۇرىن تالدىقورعانداعى اۆياتسيالىق بازاعا 4++ ساناتىنداعى سۋ-30سم جوعارى مانەۆرلى جويعىش ۇشاقتار اكەلىندى. بۇل اسكەري تەحنيكالار 7 مامىردا وتان قورعاۋشىلار كۇنى جانە جەڭىستىڭ 70 جىلدىعىنا وراي استانادا ۇيىمداستىرىلعان پارادقا قاتىستى.
ەلامان قوڭىر.
دەرەك: tengrinews.kz.
سۋرەت: ەرلان وماروۆ.
