شاھاردىڭ ءبىلىم باسقارماسى ۇيىمداستىرعان ايشىقتى جوبا جۇرتشىلىققا مەرەكەلىك كوڭىل كۇي سىيلادى. فلەشموبقا ازىرلىك بىرنەشە اي بۇرىن باستالعان. جوباعا قالا بويىنشا 200-دەن استام مەكتەپ پەن قوسىمشا ءبىلىم ۇيىمى قاتىسىپ, نەگىزىنەن 7–10 سىنىپ وقۋشىلارى قامتىلدى. بىرنەشە اپتا بويى مىڭعا جۋىق پەداگوگ 11 500 جاس ونەرپازدى ۇلكەن ساحناعا دايىنداعان. ۇيىمداستىرۋشىلار دومبىرانىڭ قوڭىر ءۇنى ارقىلى ۇلتتىق مۇرانى دارىپتەپ, وسكەلەڭ ۇرپاقتىڭ رۋحىن كوتەرۋ كوزدەلگەنىن ايتادى.
وقۋشىلار ءبىر مەزەتتە ورىنداعان مۋزىكالىق تۋىندى مىڭداعان دومبىرانىڭ ءۇنىن ءبىر ارناعا توعىستىرىپ, جاس ۇرپاقتىڭ بىرلىگى مەن ونەرگە دەگەن قۇرمەتىن كورسەتتى. باعدارلاماعا تولەگەن مۇحامەدجانوۆ پەن التىنبەك قورازباەۆتىڭ اندەرى, نۇرعيسا تىلەنديەۆتىڭ كۇيلەرى, سونداي-اق قۇرمانعازىنىڭ «بالبىراۋىن» كۇيى جاڭا وڭدەۋدە تاڭدالىپ الىنعان.
ءىس-شارانىڭ شارىقتاۋ شەگى – ۇلتتىق رەكورد رەسمي تىركەلدى. ءبىلىم باسقارماسىنىڭ باستاماسىن قازاقستان رەكوردتار كىتابى قولداپ, ۇيىم وكىلدەرى قاتىسۋشىلار سانىن, ورىنداۋدىڭ ۇزاقتىعىن (4 مينۋت 38 سەكۋند), كوركەمدىك ەرەكشەلىگىن مۇقيات سارالادى. ەرەكشەلىگى – قاتىسۋشىلار ءبىر كۇي عانا ەمەس, ءتۇرلى جانرداعى شىعارمالاردان قۇرالعان كۇردەلى ءپوپۋرريدى ورىندادى. ناتيجەسىندە, «جاپپاي جەتىستىكتەر» ساناتى بويىنشا جاڭا رەكورد رەسمي تىركەلىپ, ارنايى سەرتيفيكات تابىستالدى.
ايتا كەتەيىك, بۇل كورسەتكىش بۇعان دەيىنگى تالدىقورعاندا تىركەلگەن (5 000 ادام) رەكوردتان ەكى ەسە اسىپ تۇسكەن. سونىمەن قاتار اتىراۋ (2010 جىل – 1 073 ادام), ورال (2010 جىل – 1 700 ادام) جانە استانا (2024 جىل – 3 200 ادام) قالالارىنداعى ناتيجەلەر دە جاڭارتىلدى.
الماتى
