قاۋىپسىزدىك كەڭەسى حاتشىسىنىڭ توراعالىعىمەن كەڭەس ءوتتى

استانا. 13 مامىر. پرەزيدەنتتىڭ كومەكشىسى – قازاقستان رەسپۋبليكاسى قاۋىپسىزدىك كەڭەسىنىڭ حاتشىسى نۇرلان ەرمەكباەۆتىڭ توراعالىعىمەن كەڭەس ءوتتى. بۇل تۋرالى akorda.kz حابارلادى. قۇقىق قورعاۋ ورگاندارى قىزمەتىنىڭ اشىقتىعىن, قىزمەتكەرلەردىڭ ەتيكا ساقتاۋى مەن ولاردىڭ ازاماتتار الدىنداعى جاۋاپكەرشىلىگىن قامتاماسىز ەتۋگە باعىتتالعان جۇيەلى ۇسىنىستار ازىرلەۋ جونىندەگى وتىرىس جۇمىسىنا ارنايى جانە قۇقىق قورعاۋ ورگاندارىنىڭ, پرەزيدەنت اكىمشىلىگىنىڭ قۇرىلىمدىق بولىمشەلەرىنىڭ باسشىلارى قاتىستى. وتىرىس بارىسىندا كادرلىق جۇمىستىڭ جاي-كۇيى جانە ونىڭ تيىمدىلىگىن ارتتىرۋ بويىنشا قابىلدانىپ جاتقان شارالار تالقىلاندى. كادرلاردى ىرىكتەۋ جانە ورنالاستىرۋ جۇيەسىن جەتىلدىرۋگە, ولاردى كاسىبي وقىتۋعا جانە ازاماتتاردىڭ مىنەز-ق ۇلىق ەتيكاسىنىڭ ۇلگىسىن ازىرلەۋگە ەرەكشە كوڭىل ءبولىندى. سونىمەن قاتار, قىزمەتكەرلەردىڭ مارتەبەسىن كوتەرۋ, قىزمەتكەرلەردىڭ جانە قۇقىق قورعاۋ ورگاندارىنىڭ جۇمىسىن باعالاۋ كريتەريلەرىن وزگەرتۋ ماسەلەلەرى دە قارالدى. كەڭەس قورىتىندىسى بويىنشا مەملەكەتتىك ورگاندارعا ەڭ ۇزدىك حالىقارالىق تاجىريبەلەردى جانە ءوز تاجىريبەسىن ەسكەرە وتىرىپ, كادرلىق جۇمىستىڭ تيىمدىلىگىن, قىزمەتكەرلەردىڭ مىنەز-ق ۇلىق ەتيكاسىن ارتتىرۋ جونىندە ۇسىنىستار ەنگىزۋگە تاپسىرما بەرىلدى. ەلامان قوڭىر. دەرەك, سۋرەت: akorda.kz.