كەشتىڭ باستى ەرەكشەلىگى – قازاقتىڭ ۇلتتىق اۋەندەرى مەن الەمدىك كلاسسيكانىڭ جاۋھار تۋىندىلارىنىڭ ءبىر ساحنادا ۇندەسۋى بولدى. مۋزىكانتتاردىڭ ورىنداۋىنداعى ءاربىر شىعارما تىڭدارماندى ەرەكشە سەزىمگە بولەپ, جۇرەككە جىلى اسەر قالدىردى.
كونتسەرتتىك باعدارلامادا حالىق جۇرەگىنەن ورىن العان ۇلتتىق شىعارمالار مەن الەمدىك ۆوكالدىق كلاسسيكا ۇلگىلەرى ورىندالدى. سونىڭ ىشىندە قازاق مۋزىكاسىنىڭ كوركەم ليريكاسىن ايگىلەيتىن «نازقوڭىر», «اق قۋراي» سەكىلدى شىعارمالار تىڭدارماندى ۇلتتىق اۋەننىڭ تەرەڭدىگىمەن ءتانتى ەتتى. سونىمەن قاتار الەمدىك رەپەرتۋاردان «ماريتانا», «گيمن ليۋبۆي», «ۆالس», «Mamma», «Buongiorno a te» سەكىلدى تانىمال تۋىندىلار شىرقالىپ, كەشتىڭ كوركىن قىزدىردى.
مۋزىكالىق كەشكە قوناق رەتىندە قازاقستاننىڭ ەڭبەك سىڭىرگەن قايراتكەرى, بەلگىلى تەنور مەدەت شوتاباەۆ, «دارىن» مەملەكەتتىك جاستار سىيلىعىنىڭ لاۋرەاتى, دارىندى باريتون ازات مالىك قاتىستى. تانىمال ونەرپازداردىڭ ورىنداۋىنداعى اريالار مەن ۆوكالدىق شىعارمالار كورەرمەندەردىڭ زور قوشەمەتىنە يە بولدى.
ساحنادا ونەر كورسەتكەن «FORTE TRIO» ۇجىمى جوعارى كاسىبي شەبەرلىگىن تاعى ءبىر مارتە دالەلدەپ, ءاربىر شىعارمانى شىنايى سەزىممەن جەتكىزە ءبىلدى. مۋزىكانتتاردىڭ ۇيلەسىمدى ورىنداۋى مەن ساحنالىق مادەنيەتى كەشتىڭ كوركەمدىك دەڭگەيىن ارتتىرا ءتۇستى. وسىلايشا, «سۇيىكتى جاندار ءۇشىن…» مۋزىكالىق كەشى كورەرمەنگە ۇمىتىلماس اسەر سىيلاپ, كلاسسيكالىق ونەردىڭ ماڭگىلىك قۇندىلىعىن تاعى ءبىر مارتە ايقىندادى.
