الداعى ۋاقىتتا مۇعالىمدەردىڭ كۇندەلىكتى جۇمىسىنا جاڭا تسيفرلىق قۇرال ەنگىزىلەدى. ChatGPT Edu دەپ اتالاتىن جۇيە پەداگوگتەرگە ساباققا دايىندالۋدى جەڭىلدەتۋگە ارنالعان. بۇل قۇرال ارقىلى مۇعالىمدەر بىرنەشە مينۋت ىشىندە ساباق جوسپارىن جاساپ, تەستتەر مەن ءتۇرلى تاپسىرمالار قۇراستىرا الادى. سونىمەن قاتار وقۋ ماتەريالدارىن وقۋشىلاردىڭ ءبىلىم دەڭگەيىنە قاراي بەيىمدەۋگە مۇمكىندىك تۋادى.
جوبا اياسىندا OpenAI كومپانياسى ەلىمىزگە 100 مىڭ ليتسەنزيا بولمەك. ونىڭ ىشىندە 5 مىڭ ليتسەنزيا مەكتەپكە دەيىنگى ۇيىمدارعا, 85 مىڭ ليتسەنزيا ورتا ءبىلىم بەرۋ ۇيىمدارىنا, ال 10 مىڭ ليتسەنزيا كوللەدجدەرگە بەرىلەدى. جىلدىڭ ەكىنشى جارتىسىندا ليتسەنزيالار قايتا ءبولىنىپ, تاعى 100 مىڭ پەداگوگكە قولجەتىمدى بولادى. وسىلايشا جالپى سانى 200 مىڭ مۇعالىم جاساندى ينتەللەكت قۇرالىن پايدالانا الادى.
DeepSeek پەن ChatGPT-ءدى جالعان نۇسقالاردان قالاي اجىراتۋعا بولادى؟
مينيسترلىك تاراتقان مالىمەتكە سايكەس, ءار مۇعالىمنىڭ ءوز «اقىلدى اسسيستەنتى» بولادى. ChatGPT Edu مۇعالىمدەرگە ساباق جوسپارىن دايىنداۋعا, ءتۇرلى تاپسىرمالار مەن تەستتەر قۇراستىرۋعا, سونداي-اق وقۋ ماتەريالدارىن ءارتۇرلى دەڭگەيدەگى وقۋشىلارعا بەيىمدەۋگە كومەكتەسەدى. سونىمەن قاتار پەداگوگتەر تاپسىرمالاردى قازاق, ورىس جانە اعىلشىن تىلدەرىندە ازىرلەي الادى.
«ChatGPT Edu مۇعالىمدەرگە كۇندەلىكتى جۇمىستى جەڭىلدەتۋگە كومەكتەسەدى. مىسالى, بىرنەشە مينۋتتىڭ ىشىندە ساباق جوسپارىن دايىنداۋعا, ءتۇرلى تاپسىرمالار مەن تەستتەر قۇراستىرۋعا مۇمكىندىك بەرەدى. سونىمەن قاتار وقۋ ماتەريالدارىن ءارتۇرلى دەڭگەيدەگى وقۋشىلارعا بەيىمدەپ جاساۋعا بولادى. مۇعالىمدەر تاپسىرمالاردى قازاق, ورىس جانە اعىلشىن تىلدەرىندە ازىرلەي الادى. ساباق بارىسىندا دا بۇل قۇرال پايدالى بولماق. ول كۇردەلى تاقىرىپتاردى قاراپايىم تىلمەن تۇسىندىرۋگە, ومىردەن الىنعان مىسالداردى قولدانۋعا كومەكتەسەدى. سونداي-اق ساباقتاردى تالقىلاۋ, بىرلەسكەن جوبالار نەمەسە زەرتتەۋ جۇمىستارى فورماتىندا وتكىزۋگە مۇمكىندىك بەرەدى», دەلىنگەن مينيسترلىك حابارلاماسىندا.
جاساندى ينتەللەكت جۇيەسى مۇعالىمدەرگە تەك ساباق دايىنداۋدا عانا ەمەس, وقۋشىلاردىڭ جۇمىستارىن باعالاۋ كەزىندە دە كومەك كورسەتەدى. مىسالى, باعالاۋ كريتەريلەرىن قۇراستىرۋعا كومەكتەسىپ, وقۋشىلاردىڭ تاپسىرمالارىن الدىن الا تالداي الادى. دەگەنمەن سوڭعى باعانى قويۋ قۇقىعى مۇعالىمنىڭ وزىندە قالادى.
قازىرگى ۋاقىتتا وقۋ-اعارتۋ مينيسترلىگى پيلوتتىق جوبانى رەسمي تۇردە ىسكە قوسۋعا دايىندالىپ جاتىر. ايتا كەتۋ كەرەك, بيىل قاڭتار ايىندا قازاقستان OpenAI كومپانياسىنىڭ Education for Countries حالىقارالىق باعدارلاماسىنىڭ العاشقى قاتىسۋشىلارىنىڭ قاتارىنا ەندى. جاساندى ينتەللەكت جانە تسيفرلىق دامۋ مينيسترلىگىنىڭ مالىمەتىنشە, بۇل جوبا مەملەكەتتىك بيۋدجەتتەن نەمەسە سىرتقى گرانتتاردان قارجىلاندىرىلمايدى. جوبا جەكە قاراجات ەسەبىنەن جۇزەگە اسىرىلادى.
