فوتو: REUTERS
اپاتقا ۇشىراعان Boeing 737-800 ۇشاعى Jeju Air كومپانياسىنا تيەسىلى بولعان. اۋە كەمەسى قۇستارمەن سوقتىعىسقاننان كەيىن مۋان حالىقارالىق اۋەجايىنا شۇعىل قونۋعا ارەكەت جاساپ, ءشاسسيىن اشپاي قونعان. ۇشاق ۇشۋ-قونۋ جولاعىنان شىعىپ كەتىپ, قونۋعا باعىت بەرەتىن لوكالايزەر انتەنناسىنىڭ بەتون تىرەگىنە سوعىلعان. سونىڭ سالدارىنان 179 ادام قازا تاپتى, تەك ۇشاقتىڭ ارتقى بولىگىندە وتىرعان ەكى بورتسەرىك عانا امان قالعان.
اۋديتورلاردىڭ مالىمەتىنشە, كولىك مينيسترلىگى جەر جۇمىستارىنىڭ شىعىنىن ازايتۋ ءۇشىن مۋان اۋەجايىندا لوكالايزەر انتەنناسىن ورناتۋ ماقساتىندا 2,4 مەترلىك بەتون ءۇيىندىسىن تۇرعىزعان. بۇل شەشىم قابىلدانعاندا حالىقارالىق قاۋىپسىزدىك تالاپتارى تولىق ەسكەرىلمەگەن.
وڭتۇستىك كورەياداعى ءورت: جوعالىپ كەتكەن قازاقستان ازاماتىنىڭ سۇيەگى تابىلدى
حالىقارالىق ستاندارتتارعا سايكەس, لوكالايزەر قۇرىلعىلارى ۇشاق سوققان جاعدايدا وڭاي بۇزىلاتىن كونسترۋكتسيادان جاسالۋى ءتيىس. الايدا اۋديت بارىسىندا مۇنداي تالاپتاردىڭ ساقتالماعانى انىقتالدى.
تەكسەرۋ قورىتىندىسى بويىنشا, مينيسترلىك مۋان, گيمحە جانە چەدجۋ اۋەجايلارىن قوسا العاندا سەگىز اۋەجايداعى 14 لوكالايزەر قۇرىلعىسىن تالاپتارعا ساي ەمەس كۇيىندە ماقۇلداعان. سونىمەن قاتار 22 جىل بويى قاۋىپسىزدىك سەرتيفيكاتتارى بەرىلىپ, جوسپارلى تەكسەرۋلەر كەزىندە ستاندارتتاردىڭ ورىندالعانى جونىندە قاتە قورىتىندىلار جاسالعان.
اۋديت بارىسىندا اۋە قاۋىپسىزدىگىن باسقارۋداعى باسقا دا كەمشىلىكتەر, سونىڭ ىشىندە قۇستارمەن سوقتىعىسۋ قاۋپىن الدىن الۋ شارالارىنىڭ جەتكىلىكسىزدىگى انىقتالعان. جالپى العاندا, كولىك مينيسترلىگىنە 30 زاڭبۇزۋشىلىق پەن پروتسەدۋرالىق ولقىلىق بويىنشا ەسكەرتۋ جاسالعان.
وڭتۇستىك كورەيانىڭ جەر, ينفراقۇرىلىم جانە كولىك مينيسترلىگى اۋديت قورىتىندىسىن قابىلدايتىنىن مالىمدەپ, لوكالايزەر جۇيەلەرىن جەتىلدىرۋ جانە قۇستارمەن سوقتىعىسۋ قاۋپىن ازايتۋ باعىتىندا قاتاڭ شارالار قابىلداناتىنىن ايتتى.
وڭتۇستىك كورەيانىڭ ەكس-پرەزيدەنتى ءومىر بويىنا باس بوستاندىعىنان ايىرىلدى
ال اۋەجايلاردى باسقاراتىن كورپوراتسيا اۋديت ۇسىنعان وزگەرىستەردى ەنگىزۋ جۇمىستارى باستالعانىن حابارلادى.
بۇعان دەيىن ۇكىمەت تاپسىرىسىمەن دايىندالعان بولەك زەرتتەۋ ەسەبىندە ۇشاق ۇشۋ-قونۋ جولاعىنىڭ سوڭىنداعى بەتون ءۇيىندىسى بولماعاندا, اپاتتىڭ سالدارى مۇنشالىقتى اۋىر بولماۋى مۇمكىن ەدى دەگەن بولجام ايتىلعان. بۇل تۋرالى قاڭتار ايىندا وپپوزيتسيالىق دەپۋتات مالىمدەگەن.
قازىرگى ۋاقىتتا مۋان حالىقارالىق اۋەجايى اپاتتان بەرى جابىق كۇيىندە تۇر. ونىڭ قاشان قايتا اشىلاتىنى ازىرگە بەلگىسىز.
وڭتۇستىك كورەيادا زاۋىت ورتەندى: زارداپ شەككەندەر اراسىندا قازاقستان ازاماتى بار
