ء«بىز وتانداستارىمىزدىڭ قاۋىپسىزدىگىن قامتاماسىز ەتۋ ءۇشىن بار كۇش-جىگەرىمىزدى جۇمساپ, كەز كەلگەن جاعدايدا جان-جاقتى قولداۋ كورسەتىپ كەلەمىز. قازىرگى ۋاقىتقا دەيىن قازاقستان ازاماتتارىنىڭ اراسىندا زارداپ شەككەندەر نەمەسە قازا بولعاندار تۋرالى اقپارات تۇسكەن جوق», دەدى سىرتقى ىستەر مينيسترلىگىنىڭ رەسمي وكىلى ەرلان جەتىباەۆ.
ەۆاكۋاتسيا باستالعالى بەرى ۋاكىلەتتى مەملەكەتتىك ورگانداردىڭ, رەزيدەنت جانە رەزيدەنت ەمەس اۋە كومپانيالارىنىڭ كومەگىمەن 8 585 قازاقستان ازاماتى ەلگە قايتارىلدى.
الداعى كۇندەرى:
• يزرايلدەن – 78 ازاماتتى,
• قاتاردان – شامامەن 350 ادامدى,
• بىرىككەن اراب امىرلىكتەرىنەن – شامامەن 550 ادامدى,
• ساۋد ارابياسىنان – شامامەن 300 ادامدى ەۆاكۋاتسيالاۋ جوسپارلانىپ وتىر. كورسەتىلگەن دەرەكتەر وزگەرۋى مۇمكىن.
اۋە رەيستەرىنەن بولەك, ازاماتتاردى شىعارۋ جەرۇستى جولدارى ارقىلى دا جۇزەگە اسىرىلىپ جاتىر. اتاپ ايتقاندا, ازەربايجان, ارمەنيا جانە تۇرىكمەنستاننىڭ قۇرلىقتاعى شەكارالارى ارقىلى ەۆاكۋاتسيالاۋ جۇرگىزىلۋدە. وسى جولمەن يراننان 66 ازاماتىمىز ەلگە قايتارىلدى.
«وڭىردەگى قازاقستاننىڭ ديپلوماتيالىق وكىلدىكتەرى ەۆاكۋاتسيالاۋ جۇمىستارىن ۇيلەستىرۋدى جالعاستىرىپ, وتانداستارىمىزبەن تۇراقتى بايلانىس ورناتىپ جاتىر. ازاماتتاردان قازاقستان رەسپۋبليكاسىنىڭ سىرتقى ىستەر مينيسترلىگى مەن ءتيىستى ەلدەردەگى ديپلوماتيالىق مەكەمەلەردىڭ رەسمي حابارلامالارىن ۇنەمى قاداعالاپ وتىرۋدى سۇرايمىز. قازاقستان ازاماتتارىنىڭ قاۋىپسىز تۇردە ەلگە ورالۋى مەملەكەت ءۇشىن باسىم مىندەت بولىپ قالا بەرەدى», دەدى ەرلان جەتىباەۆ.
ەسكە سالا كەتەيىك, يزرايل 28 اقپاندا تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي قالعان. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
بۇعان دەيىن تاياۋ شىعىستاعى قاقتىعىس سالدارىنان 13 رەيس توقتاتىلعانىن جازعان بولاتىنبىز. سونداي-اق تاياۋ شىعىستاعى احۋالدىڭ ۋشىعۋىنا بايلانىستى قازاقستاننىڭ شەت ەلدەردەگى مەكەمەلەرىنىڭ جەدەل بايلانىس جانە «جەدەل جەلى» نومىرلەرىنىڭ ىسكە قوسىلعانى حابارلانعان ەدى.
ال قازىر ەلىمىزدىڭ سىرتقى ىستەر مينيسترلىگى تاياۋ شىعىس ەلدەرىنەن ازاماتتارىمىزدى ەۆاكۋاتسيالاۋ جۇمىسىن بەلسەندى اتقارىپ جاتىر.
