مەديتسينانىڭ قاي سالاسىن الساق تا جەڭىل, وڭاي دەيتىن باعىتى جوق. سول باعىتتاردىڭ بارلىعىندا ەلدىڭ العىسىنا بولەنگەن زاتى ايەل دارىگەرلەر بار دەسەك قاتە ايتپايمىز. ناقتى سانداردى سويلەتسەك, بۇگىندە ەلىمىزدىڭ دەنساۋلىق سالاسىندا 58 311 ايەل دارىگەر ەڭبەك ەتىپ ءجۇر. ال ورتا بۋىن مەديتسينا قىزمەتكەرلەرى – 169 172 بولسا, جوعارى ءبىلىمدى مەيىرگەرلەردىڭ سانى – 5 718. سول سەكىلدى 2 338 جوعارى ءبىلىمدى فارماتسەۆت, 4052 ورتا ءبىلىمدى فارماتسەۆت جۇمىس ىستەيدى. وسى قاتاردا ايەلدەردىڭ ورنى مەيىرگەرلىك ىستە ايرىقشا بايقالادى. مەدبيكە, اكۋشەر مەن فەلدشەرلەر قۇرامىندا بۇرىننان ايەلدەر باسىم. ءدال وسى باعىتتاردا ولاردىڭ ۇلەسى 88%-دان اسادى. سانمەن ەسەپتەگەندە 174 890 ادامدى قۇرايدى.
اقمارال ءالنازاروۆا مەرەكە قارساڭىندا مەديتسينا قىزمەتكەرلەرىن ماراپاتتادى
دارىگەرلەردىڭ جالپى قۇرىلىمىنا نازار اۋدارساق تا, دەنساۋلىق جۇيەسىنىڭ نەگىزگى تىرەگى ايەلدەر ەكەنى ايقىن كورىنەدى. بۇگىندە جالپى پراكتيكا دارىگەرلەرىنىڭ 80%-ىن, پەدياترلاردىڭ 89%-ىن, تەراپەۆتەردىڭ 84%-ىن ينفەكتسيونيستەردىڭ 82%-ىن نازىك جاندار قۇرايدى. باسى اۋىرىپ, بالتىرى سىزداپ ەمحاناعا جۇگىنگەن پاتسيەنتتەردى ءبىرىنشى بولىپ ءدال وسى قاتارداعى ماماندار قارايدى. ولار ءار وتباسىنى باقىلاپ, پروفيلاكتيكا, دياگنوستيكا, ەمدەۋ جانە وڭالتۋدى قاتار جۇرگىزەدى. ياعني, العاشقى مەديتسينالىق-سانيتارلىق كومەكتىڭ باسىم بولىگى ايەلدەردىڭ كاسىبيلىگى مەن جاۋاپكەرشىلىگىنە قاراپ تۇر.
مەديتسيناداعى سان ءتۇرلى ماماندىقتاردىڭ ىشىندە حيرۋرگيادا عانا ايەلدەردىڭ ۇلەسى بۇرىنعىشا از ەكەن. حيرۋرگتەردىڭ 22%-ىن, انەستەزيولوگ-رەانيماتولوگتەردىڭ 31%-ىن, تراۆماتولوگ-ورتوپەدتەردىڭ 15%-ىن ايەلدەر قۇرايدى. دەگەنمەن بۇل باعىتتاردا دا ايەلدەردىڭ ۇلەسى جىل سايىن كوبەيىپ, گەندەرلىك تەڭگەرىم نىعايىپ كەلە جاتقانى بايقالادى. كوپشىلىك بىلمەۋى مۇمكىن, مەملەكەت باسشىسىنىڭ تاپسىرماسىمەن 2020-2023 جىلدار ارالىعىندا مەديتسينا قىزمەتكەرلەرىنىڭ جالاقىسى جىل سايىن كەزەڭ-كەزەڭىمەن ءوسىپ, دارىگەرلەردىڭ ەڭبەكاقىسى 30%-عا, ورتا بۋىن مەديتسينا قىزمەتكەرلەرىنىڭ جالاقىسى 20%-عا ارتقان. وسىعان قوسا, 2022-2025 جىلدار ارالىعىندا مەديتسينالىق ەمەس قىزمەتكەرلەردىڭ ەڭبەكاقىسى جىل سايىن 20%-عا دەيىن كوتەرىلگەن. بۇدان وزگە, بىلتىر ەل بويىنشا 1 760 مەديتسينا قىزمەتكەرىنە الەۋمەتتىك قولداۋ كورسەتىلگەن. ونىڭ ىشىندە 236 مەديتسينا قىزمەتكەرى رەسپۋبليكالىق بيۋدجەت ەسەبىنەن كوتەرمە جاردەماقى السا, 1 399 قىزمەتكەرگە جەرگىلىكتى بيۋدجەتتەن كوتەرمە جاردەماقى تيگەن. 79 مامانعا مەديتسينالىق ۇيىمدار تاراپىنان الەۋمەتتىك قولداۋ كورسەتىلسە, 727 مەديتسينا قىزمەتكەرى تۇرعىن ۇيمەن قامتىلعان. وسى ساندار الەۋمەتتىك قولداۋلاردىڭ جالپى ۇلەسىنە قاتىستى بولعانىمەن, تىزىمدە مەملەكەتتەن, جەرگىلىكتى اكىمدىكتەن كومەك العان انالاردىڭ ۇلەسى باسىم.
قىزىلشاعا قارسى ەكپە مەديتسينا قىزمەتكەرلەرىنە دە سالىناتىن بولدى
ەلىمىزدىڭ دەنساۋلىق جۇيەسىندە ايەلدەر تەك مەديتسينالىق كومەكتىڭ قولجەتىمدىگىن قامتاماسىز ەتىپ قانا قويماي, عىلىم-ءبىلىمنىڭ دامۋىنا ءارى بۇكىل جۇيەنىڭ تۇراقتىلىعىنا كەپىلدىك بەرەتىن نەگىزگى كۇش بولىپ قالا بەرەدى. اق جاۋلىقتىلار اسقان جاۋاپكەرشىلىكتى تالاپ ەتەتىن جۇمىسقا ۇلگەرىپ, وتباسىنىڭ بەرەكە-بىرلىگىن ساقتاپ, ىرىسىن دا ارتتىرىپ وتىر.
