ءىس-شاراعا پارلامەنت سەناتىنىڭ توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ قاتىستى. ءداستۇرلى سپورتتىق جارىس اياسىندا العاش رەت ونەر جۇلدىزدارى مەن بەلگىلى تۇلعالاردىڭ قاتىسۋىمەن ارنايى تۋرنير دە ۇيىمداستىرىلدى.
ماۋلەن اشىمباەۆ پاراسپورتشىلارعا ءىلتيپات ءبىلدىرىپ, العاشقى جاتتىقتىرۋشى سۇلتانبەك ورىنباساروۆتىڭ ەلىمىزدە پاراليمپيادالىق بوچچانىڭ قالىپتاسۋىنا قوسقان ۇلەسىنە توقتالدى. سۇلتانبەك ورىنباساروۆ مۇمكىندىگى شەكتەۋلى جاستاردىڭ الەۋەتىنە سەنىپ, ولارعا ۇلكەن سپورتقا جول اشىپ بەرگەن ەدى. قازاقستان بوچچا فەدەراتسياسىنىڭ پرەزيدەنتى ينكليۋزيۆتى قوعام قۇرۋ باعىتىنداعى جۇمىستى ودان ءارى جالعاستىرۋدىڭ ماڭىزىنا نازار اۋدارىپ, بۇل ماسەلەگە مەملەكەت باسشىسى قاسىم-جومارت توقاەۆتىڭ باسا ءمان بەرىپ وتىرعانىن ايتتى.
«پرەزيدەنت قاسىم-جومارت توقاەۆ سپورتتى دامىتۋعا ءاردايىم ەرەكشە كوڭىل ءبولىپ, ونىڭ قوعام ءۇشىن ءمانى جوعارى ەكەنىن ۇنەمى ايتىپ كەلەدى. ءار ازاماتقا تەڭ مۇمكىندىك بەرەتىن قوعام قۇرۋدىڭ ماڭىزى دا مەملەكەت باسشىسىنىڭ باستى نازارىندا. بۇل قاعيدا جاڭا كونستيتۋتسيا جوباسىندا دا ەرەكشە مانگە يە. بۇگىندە پرەزيدەنت قولداۋىنىڭ ارقاسىندا قازاقستاندا پاراسپورت قارقىندى دامىپ, ەرىك-جىگەر مەن ءوز مۇمكىندىگىنە دەگەن سەنىمنىڭ سيمۆولىنا اينالىپ وتىر. سوندىقتان ەرەكشە قاجەتتىلىگى بار سپورتشىلارعا ءتيىستى جاعداي جاسالىپ, بۇل باعىتتاعى جۇمىس جۇيەلى تۇردە جالعاسا بەرەدى», دەدى سەنات توراعاسى.
سونداي-اق فەدەراتسيا پرەزيدەنتى بۇگىندە قازاقستاندا بوچچا سپورتى قارقىندى دامىپ كەلە جاتقانىن اتاپ ءوتتى. وڭىرلەردە جاڭا فيليالداردىڭ اشىلۋى جانە اتا-انالار مەن سپورتشىلار قىزىعۋشىلىعىنىڭ ارتۋى اتالعان سپورت ءتۇرىنىڭ قوعامداعى ماڭىزىن ايشىقتاي تۇسەدى. ماۋلەن اشىمباەۆ بوچچانىڭ دامۋى مەن پاراليمپياداشىلار شەبەرلىگىنىڭ ءوسۋى سپورتتىڭ بىرىكتىرۋشى كۇش ەكەنىن جانە ينكليۋزيۆتى قوعام يدەياسىنىڭ ومىرشەڭدىگىن كورسەتەتىنىن اتاپ ءوتتى.
بيىل بوچچادان اشىق رەسپۋبليكالىق تۋرنير اياسىندا العاش رەت ونەر جانە مەديا سالاسىنىڭ بەلگىلى وكىلدەرى قاتىسقان ينكليۋزيۆتى «جۇلدىزدار ءتۋرنيرى» ۇيىمداستىرىلعانىن ايتا كەتكەن ءجون.
«جىل سايىن بوچچا جارىسىنا قاتىسۋشىلار سانى ارتىپ كەلە جاتقانىن قۋانا اتاپ وتكىم كەلەدى. بيىلعى تۋرنيرگە ەلىمىزدىڭ 13 وڭىرىنەن كەلگەن 120-عا جۋىق پاراسپورتشى قاتىستى. بۇل بوچچانىڭ قازاقستان سپورتىندا وزىندىك ورنى بار ەكەنىن كورسەتەدى. بۇگىنگى تۋرنيرگە دارىندى پاراسپورتشىلارمەن بىرگە بەلگىلى ازاماتتاردىڭ دا قاتىسۋى – سوعان دالەل. ونەر جۇلدىزدارى مەن مەديا سالاسىنىڭ وكىلدەرى الاڭعا شىعىپ, بوچچانىڭ اركىمگە قولجەتىمدى سپورت ەكەنىن كورسەتىپ بەردى. وسى جەرگە كەلۋىمىزدەگى باستى ماقسات – ەرەكشە قاجەتتىلىگى بار سپورتشىلارعا قولداۋ كورسەتۋ. بۇل تۋرنير اسقاق رۋحتى, ءوزارا قولداۋدى جانە بىرلىكتى دارىپتەيتىن ناعىز مەرەكەگە اينالدى», دەدى ماۋلەن اشىمباەۆ.
سونىمەن قاتار سەنات توراعاسى 19 ناۋرىز كۇنى «ەرەكشە» اتتى فيلم قالىڭ كورەرمەنگە جول تارتاتىنىن حابارلادى. ول ادامنىڭ تاباندىلىعى مەن مۇمكىندىكتەرى تۋرالى وقيعالار باياندالاتىن تۋىندى قوعامدا پاراليمپيادالىق سپورتتىڭ ماڭىزىن ناسيحاتتاۋعا وڭ ىقپال ەتەتىنىنە سەنىم ءبىلدىردى.
«جۋىردا, 19 ناۋرىز كۇنى, ەلىمىزدىڭ بارلىق كينوتەاترىندا بوچچا سپورتىنا ارنالعان «ەرەكشە» ءفيلمىنىڭ پرەمەراسى وتەدى. بۇل – بەرىك رۋح پەن ادامگەرشىلىك تۋرالى اسەرلى وقيعا. فيلم كورەرمەندى جىگەرلەندىرىپ, قوعامنىڭ پاراليمپيادالىق سپورت الەمىنە جاڭا كوزقاراسپەن قاراۋىنا جول اشادى دەپ سەنەمىز. وسى ورايدا پاراسپورتشىلارعا جانە وسىنداي ماڭىزدى الەۋمەتتىك باستامالارعا قولداۋ كورسەتكەنى ءۇشىن «Kinopark» كينوتەاترلار جەلىسىنىڭ باسشىسى الماز مالدىباەۆقا العىس بىلدىرەمىز», دەدى سەنات توراعاسى.
ۇيىمداستىرۋشىلاردىڭ ايتۋىنشا, بوچچا سپورتتىق ويىن عانا ەمەس. ول – ەڭ الدىمەن, مۇگەدەكتىگى بار بالالار مەن ەرەسەكتەردىڭ وڭالۋىنا جانە قوعامعا بەيىمدەلۋىنە مۇمكىندىك بەرەتىن ماڭىزدى تەتىك. تۇراقتى جاتتىعۋلار سپورتشىلاردىڭ فيزيكالىق دايىندىعىن ارتتىرىپ, قيمىل-قوزعالىس داعدىلارى مەن لوگيكالىق ويلاۋ قابىلەتىن دامىتادى. بۇگىندە بوچچا مۇگەدەكتىگى بار بالالار مەن ەرەسەكتەر اراسىندا كەڭ تارالعان ءارى قولجەتىمدى پاراليمپيادالىق سپورت ءتۇرىنىڭ بىرىنە اينالىپ وتىر.
بيىلعى تۋرنير باعدارلاماسىنا جەكە جارىستارمەن قاتار كوماندالىق جانە جۇپتىق باسەكەلەر دە ەنگىزىلدى.
تۋرنير قورىتىندىسىندا كوماندالىق جارىستا ءبىرىنشى ورىندى استانا قالاسىنىڭ قۇراماسى (يتيانا شينگيسحانوۆا, ەرحات المات, مەرۋەرت تىلەبالدى) يەلەندى. ەكىنشى ورىن پاۆلودار وبلىسىنان كەلگەن كومانداعا (ۆيكتور كوجەۆنيكوۆ, ۋليانا كۋليكوۆا, الەكساندر كۋرمانتاەۆ) بۇيىرسا, ءۇشىنشى ورىنعا الماتى قالاسىنىڭ سپورتشىلارى (الينا كارامىشەۆا, گەورگي پاۆلەنكو, ەلدار گرەبنەۆ) تابان تىرەدى.
ۆس3 ساناتىنداعى جۇپتىق جارىستا ءبىرىنشى ورىندى جامبىل وبلىسى مەن استانا قالاسىنىڭ اتلەتتەرى (ديلافرۋز ماحماددۋلوەۆا, تەمىرلان التىنسارى) جەڭىپ الدى. ەكىنشى ورىننان الماتى قالاسىنىڭ جۇبى (ميرون سپيريكوۆ, ايسۇلتان مۇحان) كورىنسە, ۇزدىك ۇشتىكتى جامبىل جانە الماتى وبلىستارىنىڭ سپورتشىلارى (اندرەي اگاپوۆ, نازگۇل يساكوۆا) تۇيىندەدى.
سونداي-اق ۆس4 ساناتىنداعى جۇپتىق جارىستا الماتى قالاسىنىڭ سپورتشىلارى (ەلميرا مۋسراليەۆا, ازامات ايازباەۆ) جەڭىمپاز اتاندى. ەكىنشى ورىن جامبىل جانە ماڭعىستاۋ وبلىستارىنىڭ جۇبىنا (ايگەرىم تىنىسباەۆا, تاتتىمبەت تەڭەلگەنوۆ) بۇيىردى.
ايتا كەتەيىك, اشىق رەسپۋبليكالىق تۋرنير 2–6 ناۋرىز ارالىعىندا استاناداعى ينكليۋزيۆتى سپورت ورتالىعىندا ءوتتى. ءىس-شاراعا قازاقستاننىڭ 13 وڭىرىنەن كەلگەن 119 سپورتشى قاتىستى. ولاردىڭ قاتارىندا استانا, الماتى, شىمكەنت قالالارىنىڭ, سونداي-اق قوستاناي, جامبىل, پاۆلودار, اقتوبە, قاراعاندى, ماڭعىستاۋ, ۇلىتاۋ, جەتىسۋ جانە اباي وبلىستارىنىڭ وكىلدەرى بار.
جارىس قازاقستان بوچچا فەدەراتسياسىنىڭ باستاماسىمەن, استانا قالاسى اكىمدىگىنىڭ جانە سەرىكتەستەر مەن دەمەۋشىلەردىڭ قولداۋىمەن ۇيىمداستىرىلدى. ءىس-شارانىڭ باستى ماقساتى ەلىمىزدە پاراليمپيادالىق قوزعالىستى دامىتۋ, مۇگەدەكتىگى بار ازاماتتاردىڭ سپورتپەن اينالىسۋ مۇمكىندىگىن كەڭەيتۋ جانە ينكليۋزيۆتى قوعام قاعيداتتارىن ىلگەرىلەتۋ ەكەنىن اتاپ وتكەن ءجون.
