فوتو: frequentflyers.ru
مينيسترلىك مالىمەتىنشە, ەۆاكۋاتسيا باستالعالى بەرى رەزيدەنت جانە رەزيدەنت ەمەس اۋە كومپانيالارىنىڭ 12 اۋە رەيسى ارقىلى 3300-دەن استام وتانداسىمىز ەلگە ورالعان.
ازاماتتاردى قاقتىعىس ايماعىنان شىعارۋ باسقا دا تاسىلدەرمەن جۇرگىزىلىپ جاتىر. يرانداعى ديپلوماتتار 6 ناۋرىزدا «زاركۋح» كومپانياسىندا جۇمىس ىستەيتىن 7 قازاقستان ازاماتىن يران-ارميان شەكاراسىنا جەتكىزۋدى جوسپارلاپ وتىر. بۇعان دەيىن تەگەران مەن ەرەۆانداعى ديپلوماتتار يران اۋماعىندا قالعان «زاركۋح» كومپانياسىنىڭ 34 قىزمەتكەرىنىڭ ەلدەن شىعۋىن ۇيىمداستىرىپ, ولار اۆتوبۋسپەن يران-ارميان شەكاراسىنان وتكەن ەدى. جالپى يراننان بۇگىنگە دەيىن 52 قازاقستان ازاماتى ەلگە قايتارىلدى.
«وڭىردەگى قازاقستاننىڭ ديپلوماتيالىق وكىلدىكتەرى ەۆاكۋاتسيا تولىق اياقتالعانعا دەيىن جەرگىلىكتى جەردە ۇيلەستىرۋ جۇمىستارىن جالعاستىرىپ, شيەلەنىس ايماعىنداعى وتانداستارىمىزبەن تۇراقتى بايلانىستا بولادى», دەلىنگەن سىرتقى ىستەر مينيسترلىگى تاراتقان حابارلامادا.
ەسكە سالا كەتەيىك, يزرايل 28 اقپان, سەنبى كۇنى تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي وتىر. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
بۇعان دەيىن تاياۋ شىعىستاعى قاقتىعىس سالدارىنان 13 رەيس توقتاتىلعانىن جازعان بولاتىنبىز. سونداي-اق تاياۋ شىعىستاعى احۋالدىڭ ۋشىعۋىنا بايلانىستى قازاقستاننىڭ شەت ەلدەردەگى مەكەمەلەرىنىڭ جەدەل بايلانىس جانە «جەدەل جەلى» نومىرلەرىنىڭ ىسكە قوسىلعانى حابارلانعان ەدى.
