سۋرەت: baq.kz
جۇمىس ساپارىنا ورك حاتشىسى شاۆحات وتەمىسوۆ, ورك مۇشەسى اسەل ءجانابىلوۆا مەن كوميسسيا اپپاراتىنىڭ جاۋاپتى قىزمەتكەرلەرى دە قاتىستى. ساپار بارىسىندا ولار الماتى قالاسىنداعى №254, 378, ال قوناەۆ قالاسىنداعى № 946, 947, 949 رەفەرەندۋم ۋچاسكەسىنىڭ جاعدايىمەن تانىستى.
بۇگىندە ناۋقانعا قاتىسۋعا قۇقىعى بار ازاماتتار الماتى قالاسىندا 1 311 842 بولسا, الماتى وبلىسىندا – 1 029 611. ولار ءۇشىن داۋىس بەرۋ پۋنكتتەرىندە اقپاراتتىق ستەندتەردە رەفەرەندۋم كوميسسيالارىنىڭ قۇرامى, جوعارى تۇرعان كوميسسيالاردىڭ, سوت, پروكۋراتۋرا جانە قۇقىق قورعاۋ ورگاندارىنىڭ ورنالاسقان ورنى مەن تەلەفوندارى, سونداي-اق بيۋللەتەن ۇلگىسى, جاڭا كونستيتۋتسيا جوباسىنىڭ ءماتىنى مەن عيماراتتا داۋىس بەرۋدىڭ ءتارتىبى تۋرالى قامتىلعان.
ۋچاسكەلەردە قولجەتىمدى جانە ينكليۋزيۆتى ورتا جاساۋعا ەرەكشە كوڭىل بولىنگەن. مۇگەدەكتىگى بار ادامدار ءۇشىن داۋىس بەرۋگە ارنالعان بيۋللەتەندەرگە برايل قارپى بار ترافارەتتەر, اربا پايدالاناتىن ازاماتتار ءۇشىن بەيىمدەلگەن قۇپيا داۋىس بەرۋ كابينالارى, ارنايى جابدىقتالعان بۇرىش (كومپيۋتەر, ۇلكەيتكىش اينەك, قوسىمشا جارىقتاندىرۋ) قاراستىرىلعان.
ناۋقان اياسىندا قولجەتىمدىلىكتى ارتتىرۋدىڭ قوسىمشا تەتىگى رەتىندە اقپاراتتاندىرۋدىڭ كەڭەيتىلگەن فورماتى ەنگىزىلدى. ياعني ءاربىر ۋچاسكەدە جاڭا كونستيتۋتسيا جوباسىنىڭ ماتىندىك نۇسقاسىمەن قاتار, اۋديو نۇسقاسى دا قولجەتىمدى. رەفەرەندۋم كۇنى ءوز ۋچاسكەسىندە داۋىس بەرە المايتىن, ۋاقىتشا باسقا جەردە بولاتىن ازاماتتاردىڭ ەلەكتورالدى قۇقىقتارىن قامتاماسىز ەتۋ ماقساتىندا زاڭناماعا سايكەس ەسەپتەن شىعارۋ كۋالىگىن الۋ مۇمكىندىگى دە بار.
قازىرگى ۋاقىتتا ازاماتتاردى رەسپۋبليكالىق رەفەرەندۋمنىڭ ءوتۋ بارىسى تۋرالى ءارتۇرلى بايلانىس ارنالارى ارقىلى كەڭىنەن اقپاراتتاندىرۋ ۇيىمداستىرىلىپ وتىر. ارنايى ونلاين سەرۆيستەر ىسكە قوسىلۋدا. وسىعان بايلانىستى ورك توراعاسى ۋچاسكەلىك كوميسسيالارعا ءار داۋىس بەرۋشىگە QR كودى بار دەربەس شاقىرۋ قاعازدارىن جەتكىزۋ جۇمىستارىن ساپالى تۇردە قامتاماسىز ەتۋدى تاپسىردى.
مەگاپوليس پەن قوناەۆ قالاسىندا وتكىزىلگەن جيىندا ۆەدومستۆوارالىق ۇيلەستىرۋ ماسەلەلەرىنە ەرەكشە نازار اۋدارىلدى. كەڭەستە جەرگىلىكتى اتقارۋشى ورگانداردىڭ باسشىلارى رەسپۋبليكالىق رەفەرەندۋمعا قاتىسۋشىلار ءتىزىمىن وزەكتەندىرۋ جۇمىسىن اياقتاعاندارى جانە ۋچاسكەلەردىڭ داۋىس بەرۋ كۇنىنە دايىندىق دەڭگەيى تۋرالى باياندادى.
ەسەپكە سايكەس الماتى قالاسىندا 663 رەفەرەندۋم كوميسسياسى جۇمىس ىستەيدى, ونىڭ ىشىندە 9-ى – اۋماقتىق, 654-ءى – ۋچاسكەلىك. بۇل كوميسسيالاردىڭ قۇرامىندا بارلىعى 4 615 ادام بار. ال الماتى وبلىسىندا 694 رەفەرەندۋم كوميسسياسى (12 اۋماقتىق جانە 682 ۋچاسكەلىك) جۇمىلدىرىلعان. ولاردىڭ قاتارىندا 4 806 ازامات جۇمىس ىستەيدى.
ساپار اياسىندا اۋماقتىق جانە ۋچاسكەلىك رەفەرەندۋم كوميسسيالارىنىڭ باسشىلارىنا ارنالعان سەمينار وتكىزىلدى. وقىتۋ ۇدەرىسى الدىمەن تەستىلەۋدەن باستالدى, ونىڭ ناتيجەسىنە سايكەس ولاردىڭ دايىندىق شارالارى قالىپتاستىرىلدى. سەمينار بارىسىندا پراكتيكالىق كەيستەر, ناقتى جاعدايلارعا ارنالعان ادىستەمەلىك ۇسىنىمدار بەرىلدى.
مۇنداي دايىندىق ۇلگىسى اۋداندار مەن قالالاردا كاسكادتىق ادىسپەن جۇزەگە اسىرىلىپ جاتىر. بۇل – بارلىق دەڭگەيدەگى كوميسسيالاردىڭ كاسىبي دايىندىق ستاندارتتارىن بىركەلكى قامتاماسىز ەتۋگە باعىتتالعان.
