جاڭا تەحنيكانىڭ كەزەكتى لەگىن تاپسىرۋ ءراسىمى توبىل جاعاسىنداعى الاڭدا ءوتتى. بۇل جولى 11 ورمان شارۋاشىلىعىنا 79 ارنايى تەحنيكانىڭ كىلتى تابىس ەتىلدى. ورمان قورعاۋعا, ءتىلسىز جاۋعا قارسى شۇعىل ارەكەت ەتۋگە ارنالعان قۋاتتى تەحنيكانىڭ دەنى قوستانايداعى «سارىارقااۆتوپروم», «اگروماشحولدينگ», «متز-قازاقستان» زاۋىتتارىندا قۇراستىرىلعان. مىسالى, شاعىن ءورت ءسوندىرۋ قۇرىلعىسى قوندىرىلعان JAC T6 جۇردەك كولىگى ورمان ىشىندەگى ءورتتى جەدەل سوندىرۋگە مۇمكىندىك بەرەدى. ال زاۋىتتان سۋ جاڭا شىققان Lovol, متز تراكتورلارى جەر جىرتۋ, كوشەت ەگۋ, ءورت قاۋىپسىزدىگىن قامتاماسىز ەتۋ جۇمىسىنا تاپتىرماس قۇرال. مۇنىڭ سىرتىندا, پاترۋلدىك قىزمەتكە 26 Lada Niva جەڭىل اۆتوكولىگى بەرىلدى.
سالتاناتتى ءىس-شاراعا قاتىسقان وبلىس اكىمى تەحنيكالىق بازانى نىعايتۋ جۇمىستارى جالعاساتىنىن جەتكىزدى.
– ورمان – ۇلتتىق بايلىق, اسا ماڭىزدى تابيعي رەسۋرس, ءوڭىردىڭ ەكولوگيالىق قاۋىپسىزدىگىنىڭ نەگىزى. ونى ساقتاۋ مامانداردىڭ كاسىبيلىگىن عانا ەمەس, زاماناۋي تەحنيكانى دا تالاپ ەتەدى. بيىل قوسىمشا 25 ءورت ءسوندىرۋ كولىگىن, 9 تراكتور ساتىپ الۋ جوسپارلانىپ وتىر. ورمان كۇزەتىنىڭ كادرلىق قۇرامى كۇشەيتىلىپ, قىزمەتكەرلەردىڭ جالاقىسى 100%-عا ءوستى. بۇگىن تابىستالعان تەحنيكا – ماتەريالدىق-تەحنيكالىق بازانى نىعايتۋ باعىتىنداعى جۇيەلى جۇمىستىڭ ناتيجەسى. جاڭا كولىكتەر ءورت وشاقتارىنا جەدەل جەتۋگە, قاۋىپتى سەيىلتۋگە, سونداي-اق ەكولوگيالىق, ەكونوميكالىق زالالدى تومەندەتۋگە مۇمكىندىك بەرەدى. تەحنيكانى جاڭارتۋمەن قاتار, كادر دايارلاۋ, تسيفرلاندىرۋ, ءورتتىڭ الدىن الۋ ماسەلەسىنە دە ەرەكشە كوڭىل بولىنەدى, – دەدى قۇمار اقساقالوۆ.
«پريگورودنىي» ورمان شارۋاشىلىعىنىڭ باسشىسى ەرلان ابەنوۆتىڭ ايتۋىنشا, تالاي جىلدان بەرى تەحنيكاسى توزىپ تۇرعان مەكەمەلەر مەملەكەتتىك قولداۋدىڭ ارقاسىندا ەڭسە تىكتەپ, الەۋەتىن ارتتىرعان.
– كەيىنگى جىلدارى تەحنيكامىز جاڭارىپ جاتىر. قازىر مەكەمەدە 12 تراكتور بار. ەكىنشى, ءۇشىنشى كلاستى سۋ جاڭا تەحنيكالار بەرىلدى. بۇگىن 2 شاعىن ءورت ءسوندىرۋ كەشەنىن, ەكى پاترۋلدىك «نيۆا» الدىق. وسىنىڭ ءبارى مەملەكەتىمىزدىڭ ورمان بايلىعىنا اسا جاناشىرلىقپەن قارايتىنىن كورسەتەدى. جىل ساناپ كۇش-قۋاتىمىز ارتىپ كەلەدى. سونىڭ ناتيجەسىندە كەيىنگى جىلدارى ورمان ءورتى ازايدى. مىسالى, بىلتىر بىزگە قاراستى القاپتاردا بىردە-ءبىر ءورت بولعان جوق, – دەيدى ورمانشى.
وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ مالىمەتىنشە, وڭىردەگى ورمان شارۋاشىلىقتارىنىڭ ماتەريالدىق-تەحنيكالىق بازاسى 90%-عا جاڭارعان.
قوستاناي وبلىسى
