فوتو: اسەت قۇنداقباەۆ
مەرەكە قارساڭىندا باس پروكۋراتۋرا الاياقتاردىڭ ازاماتتاردى الداۋدا كەڭ قولداناتىن تاسىلدەرىن جاريالادى:
- گۇل نەمەسە سىيلىق جەتكىزۋ راسىمدەلگەنى تۋرالى حابارلاپ, «تاپسىرىستى راستاۋ ءۇشىن» SMS-كودتى ايتۋىن سۇراۋ;
- جالعان ۇتىس, بونۋس نەمەسە اكتسيا تۋرالى حابارلاپ, تەلەفونعا كەلگەن راستاۋ كودىن ايتۋدى تالاپ ەتۋ;
- وزدەرىن بانك قىزمەتكەرى, قاۋىپسىزدىك قىزمەتىنىڭ وكىلى نەمەسە كۋرەرلىك كومپانيا قىزمەتكەرى رەتىندە تانىستىرۋ.
ء«بىر رەتتىك SMS-كود قارجىلىق وپەراتسيالاردى راستاۋعا ارنالعان قۇپيا قۇرال ەكەنىن ەستە ۇستاعان ءجون. مۇنداي كودتى ءۇشىنشى تۇلعالارعا بەرۋ اقشالاي قاراجاتتىڭ ەسەپتەن شىعارىلۋىنا, نەسيە راسىمدەلۋىنە نەمەسە بانك قوسىمشاڭىزعا قول جەتكىزۋگە اكەپ سوعۋى مۇمكىن. بانكتەردىڭ قىزمەتكەرلەرى, قۇقىق قورعاۋ ورگاندارى دا تەلەفون ارقىلى SMS-كودتاردى, قۇپيا سوزدەردى جانە بانك كارتاسىنىڭ دەرەكتەرىن سۇراتپايدى», دەلىنگەن حابارلامادا.
ءىىم ازاماتتارعا ۇندەۋ جاسادى: شەتەلدە جۇمىس ىستەيمىن دەپ سان سوعىپ قالماڭىز
كەيبىر جاعدايلاردا تاۋارلاردى نەمەسە بانك ونىمدەرىن رەسمي جەتكىزۋ كەزىندە راستاۋ كودى شىن مانىندە قولدانىلادى. الايدا ول تەك ءسىز الدىن الا راسىمدەگەن تاپسىرىس بويىنشا, جەتكىزۋدى كۇتىپ وتىرعان جاعدايدا جانە تاۋاردى العانىڭىزدى راستاۋ ءۇشىن پايدالانىلادى. ەگەر جەتكىزۋ تۋرالى قوڭىراۋ نەمەسە حابارلاما كۇتپەگەن جەردەن كەلىپ, سىزدەن كودتى ايتۋ سۇرالسا, اڭگىمەنى دەرەۋ توقتاتۋ قاجەت.
سونىمەن قاتار مەرەكە قارساڭىندا الاياقتار الەۋمەتتىك جەلىلەردە, ونىڭ ىشىندە Instagram جانە TikTok پلاتفورمالارىندا جالعان پاراقشالار اشىپ, گۇلدەر مەن باسقا دا تاۋارلاردى ايتارلىقتاي تومەن باعامەن, ءىرى جەڭىلدىكتەرمەن جانە اكتسيالارمەن ۇسىنىپ, الدىن الا تولەم تالاپ ەتەدى. اقشا العاننان كەيىن مۇنداي پاراقشالار قىزمەتىن توقتاتىپ, ساتۋشىمەن بايلانىسۋ مۇمكىن بولماي قالادى.
مەملەكەت باسشىسى الاياقتىققا قارسى كۇرەستىڭ جاڭا تاسىلدەرىن ويلاستىرۋدى تاپسىردى
گۇلدەر مەن سىيلىقتاردى تەك سەنىمدى ساتۋشىلاردان تاپسىرىس بەرۋگە, تولەم جاساعان كەزدە الۋشىنىڭ دەرەكتەمەلەرىن مۇقيات تەكسەرىپ, كۇماندى سىلتەمەلەرگە وتپەۋ قاجەت. سونداي-اق قانداي جاعداي بولماسىن بوگدە ادامدارعا SMS-كودتار مەن بانك دەرەكتەرى بەرىلمەۋى كەرەك. كۇدىك تۋىنداعان جاعدايدا بانككە رەسمي ءنومىر ارقىلى ءوزىڭىز حابارلاسىپ, قاجەت بولعان كەزدە قۇقىق قورعاۋ ورگاندارىنا دەرەۋ جۇگىنگەن ءجون.
