پرەمەر-مينيستر قۇرىلىس الاڭىن ارالاۋ كەزىندە بولاشاق ەنەرگيا نىسانىنىڭ تەحنيكالىق پارامەترلەرى جانە جوبانىڭ جۇزەگە اسىرىلۋ بارىسىمەن تانىستى. «سامۇرىق-ەنەرگو» اق باسقارما توراعاسى قايرات ماقسۇتوۆ جەو قۇرىلىسىنا اۋدانى 227 گەكتار جەر تەلىمى بولىنگەنىن, سونداي-اق كۇل-قوج قالدىقتارىن جينايتىن الاڭ ءۇشىن قوسىمشا 130 گەكتار جەر قاراستىرىلعانىن باياندادى. ستانسانىڭ جوبالىق قۋاتى شامامەن 240 مۆت, ال جىلۋ قۋاتى كەمىندە 520 گكال/ساع بولادى. سونىمەن قاتار قالانىڭ كەلەشەكتەگى ءوسىمى مەن ءوڭىردىڭ قاجەتتىلىكتەرىن ەسكەرە وتىرىپ, قوسىمشا سۋ جىلىتۋ قازاندىقتارىن ورناتۋ ارقىلى جىلۋ قۋاتىن تاعى 300 گكال/ساعاتقا دەيىن ارتتىرۋ مۇمكىندىگى قاراستىرىلىپ جاتىر.
ايتا كەتەيىك, قازىرگى ۋاقىتتا بىرقاتار باستاپقى جۇمىس اياقتالعان. اتاپ ايتقاندا, كۇشتىك ترانسفورماتور ورناتىلىپ, ۋاقىتشا جولدار مەن قۇرىلىس شتابى سالىندى.
جالپىۇلتتىق كواليتسيا مۇشەلەرى اقتوبە جەو ۇجىمىمەن كونستيتۋتسيا جوباسىن تالقىلادى
قايرات ماقسۇتوۆتىڭ ايتۋىنشا, كەلەسى ايدان باستاپ جوبا بەلسەندى قۇرىلىس كەزەڭىنە وتەدى. جابدىقتاردى جەتكىزۋ 2027 جىلدىڭ ءى توقسانىنا جوسپارلانعان. ەنەرگيا نىساندارىنىڭ قۇرىلىسىنا شامامەن 2,5 مىڭ ادام تارتىلادى, ال پايدالانۋعا بەرۋ كەزەڭىندە 400-گە جۋىق تۇراقتى جۇمىس ورنى اشىلادى.
«جوبا اياسىندا كاسىپورىننىڭ ەكولوگيالىق قاۋىپسىزدىگىنە ەرەكشە ءمان بەرىلگەن. جەو-دا «تازا كومىر» تەحنولوگياسى ەنگىزىلەدى. ءتۇتىن گازىن كەشەندى تازارتۋ جۇيەسى تومەن ەميسسيالى قىزدىرعىشتار, كاتاليزاتورلار جانە ەلەكتر سۇزگىلەردى قامتيدى. سونىمەن قاتار ءتۇتىن گازدارىن وڭدەۋ كەزىندە قۇرىلىس سالاسىندا پايدالانۋعا جارامدى گيپس تۇزىلەتىن كۇكىرت تازارتۋ رەاكتورى ورناتىلادى. وسىلايشا, ستانسا قر ەكولوگيالىق كودەكسى تالاپتارىنا تولىق سايكەس بولادى», دەپ حابارلادى ۇكىمەتتىڭ ءباسپاسوز قىزمەتى.
ۇكىمەت باسشىسى كوكشەتاۋ جەو-سىنىڭ قۇرىلىسى ءوڭىر ينفراقۇرىلىمىن دامىتۋ جانە ونىڭ ءوسىپ كەلە جاتقان قاجەتتىلىكتەرىن ەسكەرە وتىرىپ, حالىقتى ساپالى ءارى ۇزدىكسىز جىلۋ-ەنەرگيامەن قامتاماسىز ەتۋ ءۇشىن ەرەكشە ماڭىزدى ەكەنىن اتاپ ءوتتى. تەك كوكشەتاۋ قالاسىنىڭ وزىندە 2035 جىلعا دەيىنگى كەزەڭدە جىلۋ ەنەرگياسىنا دەگەن قاجەتتىلىك ساعاتىنا 840 گكال-دان اسادى دەپ بولجانىپ وتىر. جىل سايىن قالادا 200-240 مىڭ شارشى مەتر تۇرعىن ءۇي پايدالانۋعا بەرىلەدى. سونىمەن قاتار جاڭا الەۋمەتتىك نىساندار – مەكتەپتەر, اۋرۋحانالار, سپورت مەكەمەلەرى اشىلۋدا.
«ستانسانىڭ ىسكە قوسىلۋى ءوسىپ كەلە جاتقان سۇرانىستى قاناعاتتاندىرۋعا, قۋات رەزەرۆىن قالىپتاستىرۋعا جانە جىلۋ جۇيەسىنىڭ ۇزاقمەرزىمدى تۇراقتى جۇمىسىن قامتاماسىز ەتۋگە مۇمكىندىك بەرەدى. جوبانى جۇزەگە اسىرۋ ناتيجەسىندە كوكشەتاۋدىڭ 195 مىڭنان استام تۇرعىنى, ونىڭ ىشىندە ستانتسيوننىي كەنتىنىڭ حالقى جىلۋمەن قامتىلادى. سونىمەن قاتار 600-گە جۋىق كوپپاتەرلى تۇرعىن ءۇي ىستىق سۋمەن قامتاماسىز ەتىلەدى. جەو قۇرىلىسى قالانىڭ دامۋىنا سەرپىن بەرىپ, جاڭا كاسىپورىنداردىڭ اشىلۋىنا ىقپال ەتەدى. «سامۇرىق-ەنەرگو» اق مالىمەتىنشە, جوبانى 2029 جىلدىڭ ناۋرىز ايىندا اياقتاۋ جوسپارلانعان», دەلىنگەن حابارلامادا.
ەنەرگەتيكا مينيسترلىگىنىڭ مالىمەتىنشە, سوڭعى جىلدارى رەسپۋبليكا بويىنشا اپاتتى جاعدايدا تۇرعان جەو سانى ايتارلىقتاي ازايعان. بۇعان دەيىن جۇمىس ىستەپ تۇرعان 37 جەو-نىڭ 19-ى «قىزىل» ايماقتا, 11-ءى «سارى» جانە 7-ءۋى «جاسىل» ايماقتا بولعان. وتكەن جىلىتۋ ماۋسىمىنىڭ قورىتىندىسى بويىنشا جاعداي جاقساردى: 9 ستانسا «قىزىل» ايماقتان «سارى» ايماققا, تاعى 3 ستانسا «سارىدان» «جاسىل» ايماققا كوشتى. ناتيجەسىندە, قازىرگى ۋاقىتتا 17 جەو – «سارى» ايماقتا, 10 – «جاسىل» ايماقتا.
پرەمەر-مينيستر جاۋاپتى مينيسترلىكتەرگە, جەرگىلىكتى اتقارۋشى ورگاندار مەن ءتيىستى ۇيىمدارعا بارلىق قوردالانعان ماسەلەنى جەدەل تۇردە شەشىپ, جۇمىستى بەلگىلەنگەن مەرزىمنەن كەشىكتىرمەي, كىدىرىسسىز ءارى ۋاقتىلى جۇزەگە اسىرۋدى تاپسىردى.
