فوتو: اشىق دەرەككوز
پرەمەر-مينيستر اتالعان سالالاردا جۇرگىزىلىپ جاتقان اۋقىمدى جۇمىستار – جەر جەردەگى بىتىراڭقى جوبالار ەمەس, ينفراقۇرىلىمدىق مۇمكىندىكتى ارتتىرا ءتۇسۋ جولىنداعى جۇيەلى ساياساتتىڭ كورىنىسى ەكەنىنە توقتالدى.
«پرەزيدەنت اتاپ وتكەندەي, «ەنەرگەتيكا جانە تۇرعىن-ءۇي كوممۋنالدىق شارۋاشىلىعى كەز كەلگەن مەملەكەتتىڭ ءومىر سۇرۋىنە اسا قاجەتتى تۇعىر سانالادى». اۋقىمدى رەفورمالار باستاۋ العانعا دەيىن بىرقاتار وڭىرلەردە گەنەراتسيالىق قۋات كوزدەرى مەن جىلۋ جەلىلەرىنىڭ توزۋى 70%-عا دەيىن جەتسە, كەي وڭىرلەردە بۇل كورسەتكىش 80%-دان اسىپ كەتكەن ەدى. ەنەرگەتيكالىق نىسانداردا بولعان ءىرى اپاتتار سالدارىنان ساقىلداعان سارى ايازدا كەي قالالارداعى تۇرعىن ۇيلەر جىلۋسىز قالعان قيىن ءساتتى ەشكىم دە ۇمىتا قويماعان شىعار. بۇگىندە جۇرگىزىلىپ جاتقان تاريفتەردى ىرىقتاندىرۋ جانە ينۆەستيتسيالار تارتۋ ساياساتى بۇرىنعىداي «جانتالاسا جاماپ-جاسقاۋدان» گورى سالانى ساپالى دەڭگەيدە جاڭعىرتۋعا مۇمكىندىك بەردى. قاراعاندى, وسكەمەن, جەزقازعان, ەكىباستۇز, بالقاش قالالارىندا جەو-نى جاڭعىرتۋ جوبالارى جۇزەگە اسىرىلىپ جاتىر. الماتى, تەمىرتاۋ, ريددەردە جىلۋ قۋاتتارى جاڭارتىلۋدا, سونىمەن بىرگە اقتاۋ, اتىراۋ, ورال, تاراز, ەكىباستۇز (گرەس-2) قالالارىندا ستانسالاردىڭ قۋاتتارىن كەڭەيتۋ جۇمىستارى جالعاسۋدا. ودان بولەك اقتوبە, اتىراۋ, وسكەمەن, كوكشەتاۋ, قىزىلوردا, سەمەي, تاراز, تۇركىستان, ەكىباستۇز (گرەس-3) قالالارىندا جاڭا گەنەراتسيا كوزدەرىنىڭ جوبالارى بويىنشا جۇمىستار جۇرگىزىلىپ كەلەدى», دەدى ۇكىمەت باسشىسى.
بەكتەنوۆ: «تازا قازاقستان» باستاماسى قازاقستاندىقتار تاراپىنان قولداۋ تاپتى
ولجاس بەكتەنوۆتىڭ ايتۋىنشا, وسىمەن ەكىنشى جىل قاتارىنان جىلۋ ماۋسىمى ايتارلىقتاي اپاتسىز ءوتىپ جاتىر دەۋگە بولادى.
«پرەزيدەنت ەنەرگەتيكالىق تۇراقتىلىقتى ۇلتتىق قاۋىپسىزدىك ماسەلەسى دەپ اتاپ, مۇنداعى شەشىمدەر ونداعان جىلدار ىلگەرى قابىلدانۋعا ءتيىس ەكەنىن ۇنەمى ايتىپ كەلەدى. بۇل رەتتە ەلىمىزدە ەلەكتر ەنەرگياسىن ءوندىرۋ جوسپارلى تۇردە وسۋدە. ماسەلەن, ول 2019 جىلعى 106 ملرد كۆت/ساعاتتان 2025 جىلى 123,1 ملرد كۆت/ساعاتقا دەيىن جەتتى. سالىستىرمالى تۇردە ايتساق, جەتى جىلدا ىسكە قوسىلعان قۋاتتاردىڭ جالپى كولەمى الماتى قالاسى مەن الماتى وبلىسىنىڭ ءبىر جارىم جىلدىق تۇتىناتىن ەلەكتر ەنەرگياسىنا تەڭ», دەدى پرەمەر-مينيستر.
ونىڭ ايتۋىنشا, 2027 جىلدىڭ ءبىرىنشى توقسانىنىڭ سوڭىنا قاراي قازاقستان ەلەكتر ەنەرگياسى تاپشى ەلدەر قاتارىنان شىعىپ, پروفيتسيتتىك دەڭگەيگە وتەدى.
«سول سياقتى الماتىداعى جەو-2 مەن جەو-3-ءتى تابيعي گازعا اۋىستىرۋعا ەرەكشە نازار اۋدارىلىپ وتىر. بۇل ەكى جەو-نى تولىق كوشىرۋ وسى جىلدىڭ سوڭىنا دەيىن اياقتالادى. بىرنەشە ءجۇز ميلليارد تەڭگە تۇراتىن جوبالار قالانىڭ ەكولوگياسىن ايتارلىقتاي جاقسارتا تۇسپەك. ۇزاقمەرزىمدى گەنەراتسيا بالانسىن قالىپتاستىرۋ ءۇشىن اتوم ەنەرگەتيكاسىن دامىتۋ ماڭىزدى شەشىم بولدى. اەس قۇرىلىسى ەلەكتر قۋاتىنا سۇرانىس ارتا تۇسكەن بۇگىنگىدەي جاعدايدا زياندى قالدىقتاردىڭ اۋاعا تارالۋىن ازايتىپ, گەنەراتسيا كوزدەرىن ءارتاراپتاندىرۋدى قامتاماسىز ەتەدى», دەدى ولجاس بەكتەنوۆ.
ولجاس بەكتەنوۆ: جاڭا كونستيتۋتسيا – بولاشاقتىڭ ستراتەگيالىق تاڭداۋى
سونىمەن قاتار جوبا الداعى ۋاقىتتاعى تەحنولوگيالىق دامۋدىڭ, ءوندىرىستى لوكاليزاتسيالاۋدىڭ جانە ينجەنەرلىك كادر دايارلاۋدىڭ بەرىك نەگىزى بولماق.
