باتىس قازاقستان وبلىسىندا جەرگىلىكتى اتقارۋشى ورگاندار جاۋاپتى مەكەمە وكىلدەرىمەن بىرلەسىپ, بالىقتى قورعاۋ ماقساتىندا جوسپارلى ءىس-شارالار اتقاردى.
«22 سۋ ايدىنىندا 16 888 تەسىك بۇرعىلانىپ, قامىس باۋلارى سالىندى. مۇز ويىلىپ, 1ح1 مەترلىك 263 ويىق جاسالدى. 3 130 تەكشە مەتر سۋعا اەراتسيا جۇرگىزىلدى. جۇمىستارعا 180 ادام, 60 تەحنيكا جۇمىلدىرىلدى», دەپ حابارلادى وبلىس اكىمىنىڭ ءباسپاسوز قىزمەتى.
مامانداردىڭ ايتۋىنشا, بۇل شارالار بالىقتى قىرىلۋدان ساقتاپ قانا قويماي, كوكتەمگى تاسقىن كەزىندە سۋ ايدىندارىندا مۇز كەپتەلىسى بولماۋىنا سەپتىگىن تيگىزەدى. سوندىقتان جۇمىستار كوكتەمگە دەيىن جالعاسادى.
جاقىندا ورال قالاسىنىڭ ىرگەسىندەگى «انەس اتا» كولىندە ەكوجۇيەنى ساقتاۋ ماقساتىندا سۋ استىنا اۋا جىبەرۋ اكتسياسى ءوتتى. «EcoSaqshy» قوعامدىق بىرلەستىگى مەن ەكوبەلسەندىلەر ۇيىمداستىرعان شاراعا سىرىم اۋدانىنان كەلگەن جاس ەكوقورعاۋشىلار توبى دا قاتىستى. تابيعات جاناشىرلارى قىسقا ۋاقىت ىشىندە مۇز بەتىنەن 101 ويىق جاساپ, سۋ استىنا اۋا جىبەردى.
«ەكولوگيالىق تەپە-تەڭدىكتى ساقتاۋ, تابيعاتتى ايالاۋ – ءار ازاماتتىڭ مىندەتى. ءبىز مۇنداي ءىس-شارانى بىرنەشە جىلدان بەرى تۇراقتى وتكىزىپ كەلەمىز. قۋانىشتىسى, بۇگىن قاتارىمىزعا سىرىم اۋدانى العاباس اۋىلىنداعى مەكتەپتىڭ جاس ەكوقورعاۋشىلارى قوسىلىپ وتىر. 2022 جىلى قۇرىلعان ۇيىم مۇشەلەرى اۋىل ماڭىنداعى اڭقاتى وزەنىن تازالاۋ, بۇلاق كوزدەرىن اشۋ, قوقىستى سۇرىپتاۋ سەكىلدى يگى ىستەرمەن اينالىسادى ەكەن. ءبىز ولاردى قولداپ, مۇز بۇرعىسىن سىيعا تارتتىق, وبلىستىق ءبىلىم باسقارماسىنىڭ باسشىسىمەن كەزدەسۋ ۇيىمداستىردىق. نۇربولات جۇماعازيەۆ, تىلەكتەس دۇيسەنباەۆ سىندى ازاماتتار جەتەكشىلىك ەتەتىن ۇيىم ءوز جۇمىستارى تۋرالى مۋلتفيلم ءتۇسىرىپ, ناسيحاتتاپ ءجۇر. بولاشاقتا دا بىرلەسكەن جوسپارلارىمىز بار», دەيدى «EcoSaqshy» قوعامدىق بىرلەستىگىنىڭ جەتەكشىسى داۋرەنبەك ساحىم.
باتىس قازاقستان وبلىسى
