كەزدەسۋ بارىسىندا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا تۇراقتى قۇقىقتىق ورتانى قۇرۋدىڭ ماڭىزىن اتاپ ءوتتى. سونداي-اق جاڭا كونستيتۋتسيا جوباسىنىڭ ينۆەستيتسيالاردى قورعاۋدى كۇشەيتۋگە, سوت جۇيەسىنە سەنىم ارتتىرۋعا جانە تۇراقتى ەكونوميكالىق دامۋعا جاعداي جاساۋعا باعىتتالعانىن ايتتى.
«كاسىپكەر ويىن ەرەجەلەرىنىڭ كەنەتتەن وزگەرمەيتىنىنە, ينۆەستيتسيالارىنىڭ قورعالاتىنىنا, سوت جۇيەسىنىڭ داۋلاردى ءادىل ءارى اشىق شەشەتىنىنە سەنىمدى بولۋى قاجەت. تەك وسىنداي جاعدايدا عانا ۇزاقمەرزىمدى ستراتەگيالار جاسالىپ, جاڭا جۇمىس ورىندارى اشىلادى, ءوندىرىس داميدى. سوندىقتان 15 ناۋرىزداعى رەفەرەندۋم – وسى قاعيدالاردى كونستيتۋتسيالىق دەڭگەيدە بەكىتەتىن تاريحي مۇمكىندىك. جاڭا كونستيتۋتسيا جوباسىندا مەنشىك قۇقىعىن قورعاۋ كەپىلدىكتەرى كۇشەيىپ, زاڭداردىڭ كۇشى كەرى قولدانىلۋىنا تىيىم سالىنادى, مەملەكەتتىك باسقارۋدىڭ ايقىن ءارى جاۋاپتى جۇيەسى قالىپتاسادى. بۇل كاسىپكەرلىك ءۇشىن تاۋەكەلدەردى ازايتسا, ەل ءۇشىن تۇراقتىلىقتى نىعايتادى, ءار ازامات ءۇشىن بولاشاققا سەنىمدىلىك بەرەدى», دەپ اتاپ ءوتتى ايدا بالاەۆا.
ۇكىمەت باسشىسىنىڭ ورىنباسارى «زاڭ جانە ءتارتىپ» قاعيداتى شىنايى باسەكەلەستىكتى قالىپتاستىرۋعا ىقپال ەتەتىنىن دە ءسوز ەتتى.
«زاڭ جانە ءتارتىپ» قاعيداتى ادال باسەكەلەستىك ورتاسىن قۇرماق, وندا زاڭدى بيزنەس قورعالىا, ال جاسىرىن ارەكەتتەر اشكەرەلەنەدى. ءادل ەرەجەلەر – كاسىپكەردىڭ باستى سەرىگى. مەملەكەت باسشىسى «ەڭبەك ادامىنىڭ» ماڭىزىن بەكەر اتاپ وتپەدى. كاسىپكەرلەرمەن شارۋالار – تاۋەكەلگە بەل بۋىپ, جۇمىس ورىندارىن اشىپ, حالىقتى جۇمىسپەن قامتيتىن, ەلدىڭ ەكونوميكالىق كۇشىن قالىپتاستىراتىن ادامدار. جاڭا كونستيتۋتسيا ەكونوميكالىق باستامانى قولداۋعا جانە سونىمەن بىرگە زاڭعا, قوعامعا, كەلەشەك ۇرپاققا دەگەن جاۋاپكەرشىلىكتى كۇشەيتۋگە باعىتتالعان. قۋاتتى ەكونوميكانى قۋاتتى مەملەكەتسىز قۇرۋ مۇمكىن ەمەس. ال قۋاتتى مەملەكەتتە سەنىم, ادىلدىك جانە ەڭبەككە قۇرمەت باستى قۇندىلىقتار بولىپ سانالادى. بۇگىندە قازاقستاننىڭ بولاشاعى – تۇراقتى, باسەكەگە قابىلەتتى جانە ءوز كۇشىنە سەنىمدى ەل بولاتىنى بىزگە بايلانىستى», دەدى ايدا بالاەۆا.
سونىمەن قاتار, كەزدەسۋدە رەفورمانىڭ تاجىريبەلىك جاعى دا ءسوز بولدى.
«كوپ جىلدار بويى اۋىل شارۋاشىلىعى «قاۋىپتى» سانالدى ءبىز قۇرعاقشىلىقپەن, باعامەن جانە بيۋروكراتيامەن كۇرەستىك. ەندى ەلدىڭ اتا زاڭى حالىققا ازىق بەرەتىن ادامداردىڭ مۇددەلەرىن باستى ورىنعا قويادى. كونستيتۋتسيادا جەر مەن رەسۋرستاردىڭ حالىققا تيەسىلى ەكەنى انىق كورسەتىلگەن. شارۋالار ءۇشىن بۇل مەملەكەت جەرلەردى قورعاۋعا, جايىلىمداردى توزۋدان قورعاۋ, سۋارۋ جۇيەلەرىن قالپىنا كەلتىرۋ جانە شولەيتتەنۋگە قارسى كۇرەسۋ ماسەلەلەرى دە قامتىلعان. سونداي-اق زاڭداردى وتكەن كۇنمەن قولدانۋعا تىيىم سالۋ نورماسىنىڭ بەكىتىلۋى دە وتە ماڭىزدى. بۇل – تەحنيكاعا نەسيە العان كەزدە نەمەسە ينفراقۇرىلىم سالعاندا ەرتەڭ زاڭدار وزگەرىپ, قابىلدانعان شەشىمدەر قايتا قارالىپ كەتپەيتىنىنە كەپىل بولاتىن قۇقىقتىق قورعانىمىز. 15 ناۋرىزدا ءبىز ۇجىم بولىپ ەلدىڭ جاڭا بولاشاعىنا باعىتتالعان وسى باستامانى قولدايمىز», دەدى ليۋدميلا تسىبەنكو.
كەزدەسۋدە قاتىسۋشىلار ەكونوميكالىق جانە سالالىق ماسەلەلەرمەن قاتار, رەفورمالاردىڭ قۇندىلىقتارىنا دا توقتالدى. اتاپ ايتساق, جاۋاپكەرشىلىككە شاقىرۋ, ازاماتتىق قاتىسۋدىڭ دەڭگەيىن ارتتىرۋ جانە ونى قۇرۋ مادەنيەتى تالقىلاندى «SAMGA» دامىتۋ ورتالىعىنىڭ جەتەكشىسى ءاليا كوڭىلحان ەل ءۇشىن تەك ەكونوميكالىق دامۋ ەمەس, سونىمەن بىرگە ادامگەرشىلىك قۇندىلىقتار, بەرىك وتباسى جانە بولاشاققا دەگەن جاۋاپكەرشىلىك ماڭىزدى ەكەنىن اتاپ ءوتتى. «NIETWOMAN» قق ءتورايىمى التىناي تولەۋحان رەفەرەندۋم مەملەكەت قۇندىلىقتارىن ونجىلدىقتارعا ايقىندايتىنىن, ال ءادىل ەرەجەلەر سەنىم, ينۆەستيتسيا مەن دامۋ ءۇشىن, اسىرەسە الەۋمەتتىك ەكونوميكا مەن ايەلدەر كاسىپكەرلىگىندە ماڭىزدى ءرول اتقاراتىنىن مالىمدەدى.
كەزدەسۋ سوڭىندا شقو-نىڭ شاعىن جانە ورتا بيزنەسى مەن اگروونەركاسىپ كەشەنىنىڭ وكىلدەرى كونستيتۋتسيالىق وزگەرىستەر تۇراقتىلىققا كەپىلدىك بەرۋ, زاڭدى قۇقىقتاردى قورعاۋ, ءوندىرىستى جاڭعىرتۋ جانە وڭىرلەردىڭ تۇراقتى دامۋىنا جاعداي جاساۋعا جول اشاتىنىن اتاپ ءوتتى.
