اتىراۋ اەروپورتىنا حيۋاز دوسپانوۆانىڭ ەسىمى بەرىلدى

استانا. 13 مامىر. اتىراۋداعى حالىقارالىق اەروپورتقا حالىق قاھارمانى, ۇلى وتان سوعىسىنىڭ ارداگەرى, قازاقتىڭ داڭقتى ۇشقىش قىزى حيۋاز دوسپانوۆانىڭ ەسىمى بەرىلدى. بۇل تۋرالى liter.kz حابارلادى. اتالعان اەروپورتتا ۇلى جەڭىستىڭ 70 جىلدىعىنا وراي مەرەكەلىك شارا ۇيىمداستىرىلىپ, سول جەردە قۋانىشتى جاڭالىق جاريا ەتىلدى. اەروپورت باسشىلىعىنىڭ ايتۋىنشا, ولارعا وبلىستىق اكىمدىكتەن حات كەلىپ تۇسكەن. وندا باستاماشى توپ پەن پارلامەنت دەپۋتاتتارىنىڭ حيۋاز دوسپانوۆانىڭ ەسىمىن بەرۋ تۋرالى ۇسىنىستارى ايتىلعان. بۇل ۇسىنىستى اەروپورت قىزمەتكەرلەرى ءبىراۋىزدان قولداپ, ماقۇلدادى. حيۋاز دوسپانوۆا 1922 جىلى 15 مامىردا سول كەزدەگى گۋرەۆ (قازىرگى اتىراۋ) وبلىسىنا قاراستى گانيۋشكين اۋىلىندا تۋعان. 1940 جىلى ورال قالاسىنداعى №1 مەكتەپتى التىن مەدالمەن بىتىرگەن. كەيىن ماسكەۋدەگى جۋكوۆسكي اتىنداعى اسكەري-اۋە اكادمەياسىنا قۇجات تاپسىرادى. الايدا, اكادەميا قىز بالانى قابىلداۋدان باس تارتادى. ەسەسىنە, ءبىرىنشى ماسكەۋ مەديتسينالىق ينستيتۋتىنا ەمتيحانسىز قابىلدانادى. زۇلمات جىلداردا 588-ءشى تۇنگى بومبالاۋشى اۋە پولكىنىڭ شتۋرمان-اتقىشى بولدى. جاۋ تىلىندا كوپتەگەن اسكەري تاپسىرمالاردى ورىنداعان. ەكى رەت اۋىر جاراقات الىپ, قايتادان ساپقا قوسىلعان. جەڭىستى بەرلين تۇبىندە قارسى الدى. ەرەن ەرلىگى ءۇشىن بىرقاتار ناگرادالارمەن ماراپاتتالدى. 2004 جىلدىڭ 7 جەلتوقسانىندا قازاقستان پرەزيدەنتىنىڭ جارلىعىمەن حالىق قاھارمانى اتاعى بەرىلدى. حيۋاز دوسپانوۆا 2008 جىلى 20 مامىردا قايتىس بولدى. قازىرگى تاڭدا اتىراۋداعى سپورت سارايى جانە «ەير استانا» اۋە كومپانياسىنىڭ «ەmbraer 190» لاينەرى باتىردىڭ ەسىمىمەن اتالادى. ەلامان قوڭىر. دەرەك: liter.kz. سۋرەت: headline.kz.