«يسلام مەملەكەتىنىڭ» سودىرلارى وزبەك شەكاراسىنا جەتتى

استانا. 26 ناۋرىز. وزبەكستاننىڭ ۇلتتىق قاۋىپسىزدىك قىزمەتى ەل شەكاراسىندا بوي تاسالاپ جۇرگەن «يسلام مەملەكەتى» لاڭكەستىك توبىنىڭ سودىرلارىنان قاۋىپتەنەدى. اسىرەسە, اۋعانستانمەن شەكاراداعى لاڭكەستەر وتە بەلسەندى. سونداي-اق, تۇرىكمەن-وزبەك شەكاراسىندا دا سودىرلار ءجيى توبە كورسەتىپ ءجۇر. بۇل تۋرالى news-asia.ru حابارلادى. ۇلتتىق قاۋىپسىزدىك قىزمەتىنىڭ ساراپشىسى باحتيەر شارافوۆتىڭ ايتۋىنشا, اۋعانستانعا شوعىرلانعان ەكسترەميستەر وزبەكستان مەن ورتالىق ازيا ەلدەرىنە ۇگىت-ناسيحات جۇرگىزۋ ءۇشىن ءوز ادامدارىن جىبەرگەن. «ورتالىق ازيانىڭ باستى قاقپاسى سانالاتىن وزبەكستان شەكاراسىندا «يسلام مەملەكەتى» سودىرلارىنىڭ پايدا بولۋى وڭىردە لاڭكەستىكتەن تونگەن قاۋىپتى كۇشەيتتى. ۋاقىت وتكەن سايىن ەكسترەميستىك ۇيىممەن سوعىستىڭ اياسى كەڭەيىپ كەلەدى. سونىڭ سالدارىنان اسكەري جانە باسقا دا سوعىس تاسىلدەرى قولدانىلۋدا. بىزدەر سولتۇستىك اۋعانستانداعى جەرگىلىكتى جيحادشىلار مەن لاڭكەستىك توپتىڭ بىرىگىپ ارەكەت ەتۋىنەن قاۋىپتەنەمىز», – دەيدى باحتيەر شارافوۆ. وسىعان دەيىن ساراپشىلار اۋعانستاننان اقش اسكەرى شىعارىلسا, سودىرلاردىڭ بەلسەندىلىگى ارتۋى مۇمكىن ەكەنىن بىرنەشە رەت ايتقان بولاتىن. ەلامان قوڭىر. دەرەك: news-asia.ru. سۋرەت: cont.ws.