جيىندا كوكتەمگى سۋ تاسقىنى كەزەڭىنە دايىندىق بارىسىن بايانداعان وبلىستىق تجد باسشىسىنىڭ مىندەتىن اتقارۋشى ءنازارالى سەلىموۆ بۇگىنگە دەيىن 1 ملرد تەڭگەگە 50 ارنايى تەحنيكا ساتىپ الىنعانىن, سونداي-اق 32 قورعانىس بوگەتى تۇرعىزىلىپ, اۆكولىك جولدارىنىڭ بويىندا 38 سۋ وتكىزۋ قۇبىرى ورناتىلعانىن ايتتى. سونىمەن قاتار قۇندىزدى, وباعان وزەندەرىنىڭ ارناسى تەرەڭدەتىلىپ, 9 گيدروتەحنيكالىق نىسان جوندەلگەن. قىس بويى ەلدى مەكەندەردىڭ اۋماعىنان 1,3 ملن تەكشە مەتردەن استام قار شىعارىلعان.
پرەزيدەنت سۋ تاسقىنى مەن قۇرعاقشىلىق قاۋپىنە الدىن الا دايىندالۋدى تاپسىردى
وبلىس اكىمى قۇمار اقساقالوۆ ءتيىستى ورگاندارعا الداعى كوكتەمدە كەيبىر اۋدانداردا ورتاشا دەڭگەيدەگى سۋ تاسقىنى بولۋى مۇمكىن ەسكەرتىپ, دايىندىق جۇمىستارىن شيراتا ءتۇسۋدى تاپسىردى.
«بيىل ءبىز كۇردەلى جاعدايعا دايىن بولۋىمىز قاجەت. الداعى سۋ تاسقىنىنىڭ دەڭگەيى ورتاشا دەپ باعالانعانىمەن, بوساڭسىماۋ كەرەك. كوكتەم مەزگىلى – ارقاشان جوعارى قاۋىپ كەزەڭى. وسىعان بايلانىستى وبلىستىڭ بۇكىل اۋماعىندا جاۋىن-شاشىن مولشەرى مەن قاردىڭ قالىڭدىعىنا قاتىستى تۇراقتى مونيتورينگ پەن اقپارات جيناۋ جۇمىستارى جۇرگىزىلۋى قاجەت», دەدى وبلىس اكىمى.
ايماق باسشىسى قولدا بار ارنايى تەحنيكالاردى سۋ باسۋ قاۋپى بار ەلدى مەكەندەردىڭ ماڭايىنا شوعىرلاندىرۋدى تاپسىردى.
«كەز كەلگەن قاۋىپتى جاعدايعا دايىن بولۋىمىز كەرەك. توبىل-تورعاي باسسەيندىك ينسپەكتسياسى, «قازگيدرومەت», «قازسۋشارۋاشىلىعى» فيليالدارى 1 ناۋرىزدان باستاپ كۇن سايىن مونيتورينگ جۇرگىزىپ وتىرسىن. رەسەيدىڭ كورشىلەس وڭىرلەرىمەن اقپارات الماسۋدى جانداندىرۋ قاجەت. ارقالىق قالاسى مەن امانگەلدى, جانگەلدين اۋداندارى ۇلىتاۋ وبلىسىنىڭ كورشىلەس اۋداندارىمەن ءوزارا ءىس-قيمىلدى شيراتسىن. ۆەتەريناريا باسقارماسى 20 اقپاننان باستاپ اۋىل شارۋاشىلىعى قۇرىلىمدارى مەن تورعاي وڭىرىندەگى قىستاقتاردى ارالاپ شىقسىن», دەدى اكىم.
قوستاناي وبلىسى
