رەسپۋبليكالىق رەفەرەندۋم – مەملەكەتىمىزدىڭ قوعامدىق-ساياسي ومىرىندەگى ايرىقشا ماڭىزعا يە. كونستيتۋتسيا − كەز كەلگەن ەلدىڭ قۇقىقتىق ىرگەتاسى عانا ەمەس, ونىڭ تاريحي تاڭداۋىنىڭ, قۇندىلىقتىق باعدارلارىنىڭ جانە بولاشاققا دەگەن سەنىمدى ستراتەگيالىق كوزقاراسىنىڭ ايناسى. كونستيتۋتسيانىڭ بۇكىل حالىقتىڭ داۋىسىمەن بەكىتىلۋى ونىڭ زاڭدىق كۇشىن عانا ەمەس, قوعامدىق نەگىزىن دە كۇشەيتەدى.
كونستيتۋتسيالىق رەفورما مەملەكەت باسشىسى قاسىم-جومارت توقاەۆتىڭ قازاقستاندا ءبىر پالاتالى پارلامەنت قۇرۋ جونىندەگى باستاماسىنىڭ نەگىزىندە تۋىندادى. پرەزيدەنت بۇل يدەيانى 2025 جىلعى 8 قىركۇيەكتە ءوزىنىڭ حالىققا ارناعان جىل سايىنعى جولداۋىندا ەلدىڭ ساياسي جۇيەسىن كەشەندى جاڭعىرتۋ جانە جاساندى ينتەللەكت داۋىرىندە قازاقستاننىڭ الەۋمەتتىك-ەكونوميكالىق دامۋىنا ەلەۋلى وڭ سەرپىن بەرۋ ماقساتىندا ايتقان بولاتىن. مەملەكەتتىڭ اتا زاڭى − كونستيتۋتسيا تەك قۇقىقتىق قۇجات ەمەس, ول ەلدىڭ ساياسي قۇرىلىمى, بيلىك تارماقتارىنىڭ تەپە-تەڭدىگى, ازاماتتىڭ قۇقىعى مەن مەملەكەتتىڭ جاۋاپكەرشىلىگىن ايقىندايتىن تولقۇجات. جاڭا كونستيتۋتسيا جوباسى ۇزاق مەرزىمدى جان-جاقتى تالقىلاۋلاردىڭ ناتيجەسىندە قالىپتاستى.
كونستيتۋتسيانىڭ جاڭا جوباسىن ازىرلەۋگە 130 ادامنان قۇرىلعان كوميسسيا قاتىستى. كونستيتۋتسيالىق كوميسسيا اياسىندا جۇرگىزىلگەن جۇمىسقا ءتۇرلى سالا ماماندارى, عالىمدار, زاڭگەرلەر, قوعام قايراتكەرلەرى تارتىلدى. الەۋمەتتىك توپتار, قوعامدىق بىرلەستىكتەر, ايماقتاردىڭ پىكىرى ەسكەرىلدى. تالقىلاۋلارعا بارلىق بەلسەندى ازاماتتار قوسىلىپ, ءوز پىكىرلەرى مەن ۇسىنىستارىن e-Otinish جانە eGov پورتالدارى ارقىلى جولداي باستادى. وسىلايشا, جاڭا رەفورمانى كەڭىنەن ءارى قارقىندى تالقىلاۋ شامامەن التى ايعا سوزىلدى.
قازاقستان رەسپۋبليكاسى اتا زاڭىنىڭ تۇجىرىمدامالىق وزگەرىستەرى مەملەكەتتىڭ ادامعا باعدارلانعانىن ارتتىرۋعا, قازاقستان حالقىنا ءتان وزەكتى قۇندىلىقتار مەن قاعيداتتاردى كورسەتۋگە, سونداي-اق رەسپۋبليكاداعى ساياسي ينستيتۋتتار قۇرىلىمىنىڭ تيىمدىلىگىن ارتتىرۋعا باعىتتالعان.
جاڭا پرەامبۋلادا ادام قۇقىقتارى مەن بوستاندىقتارى العاش رەت مەملەكەتتىڭ نەگىزگى باسىمدىعى رەتىندە جاريا ەتىلدى. بىرلىك پەن ىنتىماقتاستىق, ۇلتارالىق جانە دىنارالىق كەلىسىم قازاقستان مەملەكەتتىلىگىنىڭ نەگىزى رەتىندە بەلگىلەندى. ەگەمەندىك پەن تاۋەلسىزدىك, بىرتۇتاستىق, اۋماقتىق تۇتاستىق وزگەرمەيتىن قۇندىلىقتار ساناتىنا جاتقىزىلدى.
ادىلەتتىلىك, زاڭ مەن ءتارتىپ, تابيعاتقا ۇقىپتى قاراۋ سياقتى قاعيداتتار العاش رەت كونستيتۋتسيا دەڭگەيىندە بەكىتىلدى. سونىمەن قاتار, مەملەكەتتىك بيلىكتىڭ بىردەن-ءبىر باستاۋى جانە ەگەمەندىكتىڭ يەسى قازاقستان حالقى ەكەنى ناقتىلاندى.
تاعى ءبىر ماڭىزدى ماعىنالىق باعىت − تسيفرلاندىرۋ. وسىعان بايلانىستى كونستيتۋتسيانىڭ جاڭا ماتىنىندە العاش رەت ازاماتتاردىڭ قۇقىقتارىن تسيفرلىق ورتادا قورعاۋ تۋرالى نورما بەكىتىلدى. كونستيتۋتسيالىق رەفورما – تەك قۇقىقتىق وزگەرىس ەمەس, ساياسي مادەنيەتتىڭ جاڭا دەڭگەيى.
2026 جىلعى 15 ناۋرىز – تەك داۋىس بەرۋ كۇنى ەمەس, ەلىمىزدىڭ ساياسي دامۋىنىڭ جاڭا كەزەڭىنە وتەتىن تاريحي ءسات بولارى انىق. رەفەرەندۋم – ءار ازاماتقا ءوز پىكىرىن ەركىن ءبىلدىرىپ, ەلدىڭ جاڭا كەزەڭىنە باستار شەشىمگە تىكەلەي قاتىسۋ مۇمكىندىگىن بەرەتىن ماڭىزدى ساياسي وقيعا. قوعامنىڭ بەلسەندى قاتىسۋى كونستيتۋتسيانىڭ لەگيتيمدىلىگىن ارتتىرىپ, ونىڭ ورىندالۋىنا دەگەن سەنىمدى كۇشەيتەدى.
مەملەكەت – كونستيتۋتسيانىڭ جەمىسى, ال كونستيتۋتسيا – قاسيەتتى ۇعىم, نەگىزگى زاڭ, مەملەكەتىمىزدىڭ مىزعىماس تۇعىرتاسى, ءبىزدىڭ تاۋەلسىزدىگىمىز بەن ەركىندىگىمىزدىڭ, مەملەكەتىمىزدىڭ تۇراقتى دامۋىنىڭ كەپىلى. ەلدىڭ ەلدىگى, مەملەكەتتىلىكتىڭ تەمىرقازىق باعدارى ايقىندالعان اتا زاڭىمىزدى ارداقتاۋ – ءاربىر ازاماتتىڭ ابزال بورىشى.
بەيبىتكۇل سارسەمحانقىزى,
قازاق ۇلتتىق قىزدار پەداگوگيكالىق ۋنيۆەرسيتەتىنىڭ
باسقارما توراعاسى – رەكتورى
