جوعارعى سوت توراعاسى جۋرناليستەردى قۇتتىقتادى

كەشە جوعارعى سوت توراعاسى قايرات ءمامي بۇقارالىق اقپارات قۇرالدارى باسشىلارى مەن قىزمەتكەرلەرىن, سوتتاردىڭ ءباسپاسوز حاتشىلارىن ولاردىڭ كاسىبي مەرەكەسى – بايلانىس جانە اقپارات قىزمەتكەرلەرى كۇنىمەن قۇتتىقتادى.   ترانسپارەنتتىك جانە اشىقتىق – جوعارعى سوتتىڭ جۇمىسى باستى باسىمدىقتارىنىڭ ءبىرى بولىپ تابىلادى. بارلىق وڭىردە باق-پەن جۇمىس جونىندەگى ۇيلەستىرۋشى-سۋديالار جانە سوتتاردىڭ ءباسپاسوز قىزمەتى بەلسەندى جۇمىس ىستەۋدە. ولاردىڭ مىندەتى – باق-پەن ءوزارا بايلانىس ورناتۋ جانە سوتتار قىزمەتىن جاريا­لاۋ بويىنشا كەشەندى اقپاراتتىق ساياسات جۇرگىزۋ. سوتتار مەن ۇكىمەتتىك ەمەس ۇيىمدار اراسىندا سىندارلى ىنتىماقتاستىق ورنادى. ولاردىڭ اراسىندا «ءادىل ءسوز» حالىقارالىق ءسوز بوستاندىعىن قورعاۋ ۇيىمى, ەقىۇ-نىڭ استاناداعى باعدارلامالار ءوفيسى, ينتەرنيۋس, قازاقستان جۋرناليستەر وداعى, باس رەداكتورلار كلۋبى سەكىلدى ۇيىمدار بار. جوعارعى سوتتىڭ قولداۋىمەن ەلىمىزدىڭ توعىز وڭىرىندە وكىلدىگى جۇمىس ىستەيتىن سوت رەپورتەرلەرىنىڭ گيلدياسى قۇرىلدى. كەزدەسۋ شەڭبەرىندە جوعارعى سوت توراعاسى «100 ناقتى قادام – بارشاعا ارنالعان قازىرگى زامانعى مەملەكەت» ۇلت جوسپارىنا سايكەس سوت جۇيەسىن رەفورمالاۋ باعىتىندا جۇرگىزىلىپ جاتقان جۇمىستار تۋرالى ايتىپ ءوتتى. جوعارعى سوتتىڭ جانىنان حالىقارالىق كونسۋلتاتيۆتىك كەڭەس قۇرۋ كوزدەلۋدە. اتالعان كەڭەس جوعارعى سوتقا حالىقارالىق وزىق ستاندارتتاردى جانە سوت تاجىريبەسىن قازاقستاندىق سوت تورەلىگىنە قولدانۋعا كومەكتەسەتىن بولادى. ونىڭ قۇرامىنا بەلگىلى زاڭگەرلەر, ەكونوميستەر, قارجىگەرلەر, قۇقىقتىڭ جەكەلەگەن تار سالالارىنىڭ ماماندارى, ءبىرىنشى كەزەكتە, شەتەلدىك ساراپشىلار ەنەتىن بولادى. سوت جۇيەسىندە جاڭا اقپاراتتىق-كوممۋنيكاتسيالىق تەحنولوگيالاردى ەنگىزۋدى كەڭەيتۋ بويىنشا جۇمىس جالعاسىن تابادى. ءىس-شارانىڭ سوڭىندا قايرات ءمامي كەزدەسۋگە قاتىسۋشىلارعا سوت جۇيەسىنىڭ قىزمەتىن اقپاراتتىق جاريالاۋداعى بەلسەندى جۇمىسى ءۇشىن العىس ءبىلدىرىپ, ولارعا قۇرمەت گراموتالارى مەن باعالى سىيلىقتار تاپسىردى. «ەگەمەن-اقپارات».