قاۋىپسىزدىكتىڭ وزەكتى ماسەلەلەرى قارالعان حالىقارالىق باسقوسۋ

24-25 ماۋسىم كۇندەرى رەسەي فەدەراتسياسىنداعى بۋرياتيا اۆتونومياسىنىڭ استاناسى – ۋلان-ۋدە قالاسىندا قاۋىپسىزدىك ماسەلەلەرىمەن اينالىساتىن جوعارى وكىلدەردىڭ Vءى حالىقارالىق كەزدەسۋى بولىپ ءوتتى. شاراعا ەلىمىز تاراپىنان پرەزيدەنتتىڭ كومەكشىسى – قازاقستان رەسپۋبليكاسى قاۋىپسىزدىك كەڭەسىنىڭ حاتشىسى نۇرلان ەرمەكباەۆ پەن ۇلتتىق قاۋىپسىزدىك كوميتەتى توراعاسىنىڭ ورىنباسارى نۇرعالي بىلىسبەكوۆ قاتىستى. اتالعان اۋقىمدى حالىقارالىق باسقوسۋعا رەسەي تاراپى 70-تەن استام ەلدەن قاۋىپسىزدىك كەڭەستەرىنىڭ, قۇقىق قورعاۋ جانە ارنايى ورگانداردىڭ باسشىلارىن, سونداي-اق, بۇۇ قۇرىلىمدارىن قوسا العاندا, ءتۇرلى حالىقارالىق ۇيىمداردىڭ وكىلدەرىن شاقىردى. سونىمەن بىرگە, ازيا, ەۋروپا جانە وڭتۇستىك امەريكا ەلدەرىمەن قاتار, ۇقشۇ-عا, شىۇ-عا جانە تمد-عا مۇشە مەملەكەتتەردەن ايتارلىقتاي كەڭ كولەمدە وكىلدەر كەلدى. كەزدەسۋدىڭ باستى ماقساتى جاھاندىق ەكسترەميزمگە قارسى ءىس-قيمىل تانىتۋ سالاسىنداعى كوپقىرلى ىنتىماقتاستىق ماسەلەلەرىن تالقىلاۋ بولدى. ءوزىنىڭ سوزىندە ن.ەرمەكباەۆ وڭىرلىك قاۋىپسىزدىككە ءتونىپ وتىرعان قازىرگى زامانعى سىن-قاتەرلەر مەن قاۋىپتەرگە باعا بەرىپ, تەرروريزممەن جانە ەكسترەميزممەن كۇرەس بويىنشا قازاقستاننىڭ ءتيىستى ورگاندارى تاراپىنان قابىلدانىپ جاتقان شارالارعا نازار اۋداردى. تاياۋ شىعىس پەن اۋعانستانداعى  كۇردەلى احۋال ەۋروپانىڭ, ازيا مەن افريكانىڭ كوپتەگەن ەلدەرى اۋماقتارىنا راديكالدى ءدىني يدەولوگيانىڭ تارالۋىنا ىقپال ەتىپ وتىرعانى ەرەكشە اتاپ كورسەتىلدى. وسىعان بايلانىستى تەرروريزم مەن ەكسترەميزم كورىنىستەرىنىڭ الدىن الۋ تەتىكتەرىن ءتۇزۋ, ولاردى قارجىلاندىرۋ ارنالارىنىڭ جولىن كەسۋ جانە ەكسترەميستىك يدەيالار مەن كوزقاراستاردان مادەني-اقپاراتتىق كەڭىستىكتى قورعاۋ ماسەلەلەرى وزەكتى بولا تۇسەدى. دەسترۋكتيۆتى سيپاتتاعى كونتەنتتەن كيبەركەڭىستىكتى قورعاۋ بولىگىندە ۇجىمدىق اقپاراتتىق قاۋىپسىزدىكتى قامتاماسىز ەتۋ ماسەلەسىنە ەكپىن ءتۇسىرىلدى. كەزدەسۋلەر شەڭبەرىندە, سونداي-اق, ەكولوگيالىق قاۋىپسىزدىكتى قامتاماسىز ەتۋ ماسەلەلەرى قاراستىرىلدى. اتاپ ايتقاندا, شاراعا قاتىسۋشىلار تاراپىنان اۋىز سۋ تاپشىلىعى, قاۋىپسىزدىكتى قامتاماسىز ەتۋ, ونىڭ ىشىندە, قاۋىپ-قاتەرلى جۇقپالى اۋرۋلاردىڭ تارالۋىنا قارسى تۇرۋ جولىمەن قاۋىپسىزدىكتى قامتاماسىز ەتۋ سياقتى وزەكتى پروبلەمالاردى حالىقارالىق قوعامداستىقتىڭ قازىرگىدەن دە گورى بەلسەندىرەك شەشۋگە ۇمتىلۋلارى  قاجەتتىگى اتاپ ءوتىلدى. شارا الاڭدارىندا ن.ەرمەكباەۆتىڭ شەتەلدىك ارىپتەستەرىمەن ەكىجاقتى كەزدەسۋلەرى ءوتىپ, ولاردىڭ بارىسىندا قاۋىپسىزدىك سالاسىنداعى ءوزارا ءىس-قيمىلدىڭ كوكەيكەستى ماسەلەلەرى تالقىلاندى. «ەگەمەن-اقپارات».