سۋرەتتى تۇسىرگەن – دميتري ەروفەەۆ
اۋەلى ءى.جانسۇگىروۆ اتىنداعى مادەنيەت سارايىنىڭ الدىندا تۇرعان 14 اپپاق «تەمىر تۇلپار» كوپتىڭ نازارىن وزىنە اۋداردى. بۇل جولعى قۇرمەت ونەر مايتالماندارىنىڭ توبەسىن كوككە تيگىزگەندەي اسەر ەتتى. سەبەبى ءبىر كۇندە مادەنيەت قىزمەتكەرلەرىنە وسىنشا كولىكتىڭ كىلتىن تابىستاۋ ايماق تاريحىندا العاش رەت جاسالىپ وتىر دەسەك, اسىرا ايتقاندىعىمىز ەمەس.
وبلىس اكىمىنىڭ ورىنباسارى دياس ەسداۋلەتوۆ ونەر سالاسىندا جۇرگەن ءاربىر جاننىڭ ەڭبەگى ەرەكشە ەكەنىن ايتا وتىرىپ, سالا قىزمەتكەرلەرىن قۇتتىقتادى.
«مادەنيەت سالاسىنىڭ تەحنيكالىق بازاسى بۇگىن شاعىن اۆتوبۋستارمەن جانە جۇك كولىكتەرىمەن تولىققالى وتىر. ونەر ادامدارى ۇنەمى حالىق اراسىندا, كوپتىڭ الدىندا جۇرەدى, ءاردايىم ىزدەنىستە بولىپ, ەل-جەر ارالايدى. سوندىقتان بۇل كولىكتەر مادەنيەت ۇجىمدارىنىڭ گاسترولدىك ساپارلارعا شىعۋىنا, قاجەتتى قۇرال-جابدىقتار مەن دەكوراتسيالاردى تاسىمالداۋىنا, ءتۇرلى فەستيۆال, بايقاۋعا قاتىسۋىنا مۇمكىندىك تۋعىزىپ, جۇمىس ساپاسىنا وڭ اسەر ەتەدى دەپ سەنەمىز», دەگەن دياس راحمەت ۇلى سالتاناتتى ءىس-شارادا تەك كولىكتەر بەرۋمەن عانا شەكتەلمەي, ەكىنشى جىل قاتارىنان وتكىزىلىپ كەلەتىن «جەر ءجانناتى – جەتىسۋ» تەلەجوبا بايقاۋىنا بەلسەنە قاتىسىپ, ونەر كورسەتكەن وڭىرلەر دە ماراپاتتالاتىنىن تىلگە تيەك ەتتى.
جەتىسۋ وبلىسىنىڭ 8 اۋداندىق جانە 2 قالالىق مادەنيەت ۇيلەرىنە, سونداي-اق ساكەن سەيفۋللين اتىنداعى امبەباپ كىتاپحاناسىنا, كوركەمسۋرەت گالەرەياسىنا, وبلىستىق مەملەكەتتىك ارحيۆكە جانە حالىق شىعارما- شىلىعى ورتالىعىنا تيەسىلى كولىكتەردىڭ كىلتى تابىس ەتىلدى.
جاڭا كولىككە يە بولعان مەكەمە ۇجىمدارىنىڭ اتىنان الاكول اۋداندىق زەينەپ قويشىباەۆا اتىنداعى مادەنيەت ءۇيىنىڭ ديرەكتورى وتان سماعۇلوۆ ءسوز سويلەپ, ريزاشىلىعىن ءبىلدىردى.
«سالا نىساندارىنا ءبىر كۇندە وسىنشا كولىك بەرۋ وقيعاسى العاش رەت بولىپ تۇر. بۇل – ۇلتتىق قۇندىلىقتاردى ناسيحاتتاپ جۇرگەن ازاماتتارعا كورسەتىلىپ وتىرعان قامقورلىق, بىزگە شىعارماشىلىق سەرپىلىس بەرەتىن يگىلىكتى ءىس. ءبىر عانا ءبىزدىڭ الاكول اۋدانىندا 4 جاڭا مادەنيەت نىسانى سالىنىپ جاتىر, سونىڭ بىرەۋى جۋىردا پايدالانۋعا بەرىلەدى, 3-ەۋى كەلەسى جىلدىڭ ۇلەسىندە. الداعى ۋاقىتتا دا مادەنيەت ءۇشىن ەسەلى ەڭبەك ەتە بەرەمىز», دەدى ول.
ساپ تۇزەگەن «تەمىر تۇلپارلاردى» شىعارىپ سالعان جۇرت ءى.جانسۇگىروۆ اتىنداعى مادەنيەت سارايىنا كىردى. «جەر ءجانناتى – جەتىسۋ» تەلەجوبا بايقاۋىنىڭ جەڭىمپازدارى ديپلوم جانە قارجىلاي سىيلىقتارمەن ماراپاتتالدى.
اتاپ ايتساق, ارنايى جۇلدە جانە 300 مىڭ تەڭگە اقشالاي سىيلىق قاراتال اۋدانىنا, III ورىن جانە 500 مىڭ تەڭگە اقشالاي سىيلىق سارقان اۋدانىنا, II ورىن جانە 700 مىڭ تەڭگە اقشالاي سىيلىق اقسۋ اۋدانىنا بۇيىردى. ال I ورىن جانە 1 ملن تەڭگە اقشالاي سىيلىققا كەربۇلاق اۋدانى لايىق دەپ تابىلدى. تەلەجوبا بايقاۋىنىڭ باس جۇلدەسىن جانە 5 ملن تەڭگە قارجىلاي سىيلىقتى كوكسۋ اۋدانى جەڭىپ الدى.
«بۇل ءداستۇرلى دودا ءالى دە جالعاسادى. ءبىز وڭىردەگى مادەنيەتتىڭ وركەندەۋىنە بار كۇش-جىگەرىمىزدى سالامىز. اسىرەسە شالعاي اۋىلداردىڭ رۋحاني ومىرىندە ۇلكەن وزگەرىستەر بولىپ جاتىر. بابا ءداستۇرىن جالعاستىرۋعا بەيىل جاستار كوپ», دەدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى قۋانىش سۇلەيمەنوۆ.
ماراپاتتان كەيىن رۋحاني شارانىڭ گالا-كونتسەرتى باستالدى. جوبا ەرەجەسىنە ساي ءار نوميناتسيا بويىنشا جەڭىمپازدار ونەر كورسەتتى. حالىق اندەرى مەن زاماناۋي ەسترادا جانرىنداعى اۋەزدى اندەر, تەرمەشىلەردىڭ تاعىلىمدى تولعاۋى, ۇلتتىق بي الەمى, ايتىس اقىندارىنىڭ ارناۋى الما-كەزەك اۋىسىپ وتىرىپ كورەرمەننىڭ كوڭىل كوكجيەگىن كەڭىتكەن ادەمى كەشكە ۇلاستى.
جەتىسۋ وبلىسى
