فوتو: استانا قالاسىنىڭ اكىمدىگى
قالا اكىمىنىڭ ايتۋىنشا, العاشقى پەريناتالدىق ورتالىق «سامۇرىق-قازىنا» قورىنىڭ قاراجاتى ەسەبىنەن سالىنادى. قازىرگى قۇرىلىس جۇمىستارى ءجۇرىپ جاتىر, نىساندى 2027 جىلى پايدالانۋعا بەرۋ جوسپارلانعان. ال ەكىنشى ورتالىق بويىنشا بيىل جوبالاۋ جۇمىسى اياقتالىپ, 2028 جىلى پايدالانۋعا بەرىلەدى دەپ كۇتىلەدى.
جەدەل مەديتسينالىق جاردەمدى دامىتۋ اياسىندا جاقىن ۋاقىتتا №2 قالالىق كوپبەيىندى اۋرۋحانا جانىنداعى قابىلداۋ-دياگنوستيكالىق كەشەنىنىڭ قۇرىلىسى اياقتالادى. بۇل مەديتسينالىق كومەكتىڭ جىلدامدىعىن ارتتىرىپ, ستاتسيونارلىق كومەكتىڭ باستى نىسانىنا اينالماق. سول سياقتى «سامۇرىق-قازىنا» قورىنىڭ قولداۋىمەن سارىارقا اۋدانىندا №3 جاڭا كوپبەيىندى قالالىق اۋرۋحانانىڭ جوبالاۋ جۇمىسى جالعاسىپ جاتىر.
بالالارعا كورسەتىلەتىن جەدەل مەديتسينالىق كومەككە دە ەرەكشە نازار اۋدارىلادى. بيىل 15 اقپانعا دەيىن ۇلتتىق شۇعىل مەديتسينانى ۇيلەستىرۋ ورتالىعىنىڭ بازاسىندا نۇرا جانە ەسىل اۋداندارى ءۇشىن بالالارعا ارنالعان تراۆماتولوگيالىق پۋنكت جۇمىسىن باستايدى. بۇل وڭ جاعالاۋداعى بالالار تراۆمپۋنكتىنە تۇسەتىن جۇكتەمەنى ازايتىپ, مەديتسينالىق كومەكتىڭ ساپاسىن ارتتىرادى.
«جالپى العاندا, ەلوردادا دەنساۋلىق ساقتاۋ سالاسىنا قاتىستى 11 جاڭا نىساننىڭ قۇرىلىسى جوسپارلانعان. ولاردىڭ قاتارىندا رەسپۋبليكالىق ورتالىقتار, كوپسالالى اۋرۋحانالار, ەمحانالار جانە قوسالقى جەدەل جاردەم ستانسالارى بار», دەدى جەڭىس قاسىمبەك.
