باستامانى ىسكە اسىرۋ 2024 جىلعى 1 قاڭتاردان باستالدى. باعدارلاماعا 2006 جىلدان باستاپ تۋعان قازاقستان رەسپۋبليكاسى ازاماتتارىنىڭ بارلىق بالالارى قاتىسادى. باعدارلاما ىسكە قوسىلعان كەزەڭدە 6 919 131 بالانى قامتيدى. 2024 جىلى 304 815 قاتىسۋشى جيناقتالعان قاراجاتتى پايدالانۋ قۇقىعىنا يە بولاتىن جاسقا جەتتى. قاراجاتتى ەسەپتەۋ بارلىق قاتىسۋشىلار ءۇشىن تەڭ شارتتار اياسىندا جۇزەگە اسىرىلادى جانە تۇرعىلىقتى وڭىرىنە, وتباسىنىڭ تابىس دەڭگەيىنە نەمەسە اتا-اناسىنىڭ الەۋمەتتىك مارتەبەسىنە بايلانىستى ەمەس.
ۇلتتىق قوردان بەرىلەتىن تولەمدەر: بالالاردىڭ شوتىنداعى قورىتىندى سوما 370 دوللاردى قۇرادى
قارجىلىق تەتىك ۇلتتىق قوردىڭ ينۆەستيتسيالىق كىرىسىنىڭ 50 پايىزىن جىل سايىن بالالاردىڭ ارنايى ماقساتتى جيناقتاۋ شوتتارىنا باعىتتاۋدى كوزدەيدى. قاراجات بىرىڭعاي جيناقتاۋشى زەينەتاقى قورىنداعى جەكە شوتتاردا جيناقتالىپ, پايدالانۋعا دەيىن ينۆەستيتسيالانادى. باعدارلاما قاراجاتىن ازامات 18 جاسقا تولعانعا دەيىن الۋ مۇمكىن ەمەس. ەسەپتەۋلەردىڭ كوزى مۇنايدان, گازدان جانە ەلدىڭ وزگە دە ستراتەگيالىق رەسۋرستارىنان تۇسەتىن تۇسىمدەر ەسەبىنەن قالىپتاستىرىلاتىن ينۆەستيتسيالىق تابىس.
2024 جىلى ءاربىر بالاعا 100,52 دوللاردان ەسەپتەلدى. 2025 جىلى ەسەپتەلگەن سوما 129,38 دوللاردى قۇرادى.
مەملەكەت باسشىسىنىڭ باستاماسىمەن بولاشاق ۇرپاقتىڭ تابىسى جىل سايىن ارتىپ كەلەدى
ماقساتتى جيناقتاردى پايدالانۋ كامەلەت جاسىنا تولعاننان كەيىن ەكى باعىت بويىنشا جۇزەگە اسىرىلادى. قاراجات تۇرعىن ءۇي جاعدايلارىن جاقسارتۋعا نەمەسە قازاقستانداعى جانە شەتەلدەگى ءبىلىم بەرۋ ۇيىمدارىندا وقۋ اقىسىن تولەۋگە باعىتتالۋى مۇمكىن. قاراجاتتى تولىق كولەمدە دە, ءىشىنارا دا پايدالانۋعا جول بەرىلەدى. پايدالانىلماعان قالدىق ماقساتتى جيناقتاۋ شوتىندا ساقتالادى.
قاراجاتتى الۋ ءراسىمى ۋاكىلەتتى وپەراتورلار ارقىلى جۇرگىزىلەدى. قاراجات وپەراتورعا اۋدارىلىپ, ودان ءارى قاتاڭ تۇردە مالىمدەنگەن ماقساتىنا سايكەس قاراجاتتى الۋشىنىڭ بانك شوتىنا اۋدارىلادى. ماقساتتى راستاماي تىكەلەي قاراجات الۋ كوزدەلمەگەن.
2026 جىلعى 1 قاڭتارداعى جاعداي بويىنشا ماقساتتى جيناقتاردى پايدالانۋ تۋرالى 205 505 ءوتىنىش ورىندالدى. اۋدارىلعان قاراجاتتىڭ جالپى كولەمى 31,61 ملن دوللاردان استى. ونىڭ ىشىندە 127 445 ءوتىنىش بويىنشا 19,69 ملن دوللار تۇرعىن ءۇي جاعدايلارىن جاقسارتۋعا, 78 060 ءوتىنىش بويىنشا 11,92 ملن دوللار ءبىلىم الۋ اقىسىن تولەۋگە باعىتتالدى.
2026 جىلعى قاڭتار ايىنداعى جاعداي بويىنشا 6 918 656 بالاعا كەزەكتى ەسەپتەۋ جۇرگىزىلدى. ءبىر بالاعا 130,7 دوللار مولشەرىندە تيەسىلى. ناتيجەسىندە باعدارلاماعا ءۇشىنشى جىل قاتارىنان قاتىسىپ وتىرعان بالاعا ەسەپتەلگەن قاراجاتتىڭ جالپى سوماسى ينۆەستيتسيالىق كىرىستى قوسا العاندا 370 دوللار 56 تسەنتتى قۇرادى. 2026 جىلى 356 613 قازاقستان ازاماتى 18 جاسقا تولىپ, ءوز ماقساتتى جيناقتارىن پايدالانۋ قۇقىعىنا يە بولادى.
ەسەپتەلگەن قاراجات تۋرالى اقپارات اتا-انالار ءۇشىن egov.kz پورتالى جانە kids.enpf.kz سايتى ارقىلى تسيفرلى فورماتتا قولجەتىمدى. 18 جاسقا تولعان ازاماتتار بىرىڭعاي جيناقتاۋشى زەينەتاقى قورى مەن ەلەكتروندى ۇكىمەتتىڭ سەرۆيستەرى ارقىلى ءوز دەرەكتەرىنە دەربەس قول جەتكىزە الادى.
