تۇركيا ەلىمىزدىڭ دسۇ-عا كىرۋ بويىنشا اياقتالعان كەلىسسوزدى وڭ باعالادى

استانا. 25 ماۋسىم. قازاقستاننىڭ تۇركياداعى ەلشىلىگىندە ەلىمىزدىڭ دۇنيەجۇزىلىك ساۋدا ۇيىمىنا (دسۇ) كىرۋى بويىنشا كەلىسسوزدەردىڭ اياقتالۋىنا ارنالعان دوڭگەلەك ۇستەل وتىرىسى بولىپ ءوتتى. وعان «قازاقستان دوستارى كلۋبىنىڭ» مۇشەلەرى, سونىڭ اراسىندا جەتەكشى ستراتەگيالىق ورتالىقتاردىڭ ساراپشىلارى, ساياسي شولۋشىلار, تۇركيانىڭ قوعامدىق-ساياسي, ىسكەرلىك ورتالارى جانە باق وكىلدەرى قاتىستى. بۇل تۋرالى «قازاقپارات» حابارلادى. ءوز كەزەگىندە قازاقستان رەسپۋبليكاسىنىڭ تۇركياداعى ەلشىسى جانسەيىت تۇيمەباەۆ قاتىسۋشىلاردى ەلىمىزدىڭ نەگىزگى سىرتقىساياسي باستامالارى, سونىڭ ىشىندە مەملەكەتىمىز ءۇشىن ماڭىزدى تاريحي وقيعا بولىپ تابىلاتىن قازاقستاننىڭ دسۇ-عا كىرۋى بويىنشا كەلىسسوزدەردىڭ اياقتالۋى تۋرالى حاباردار ەتتى. سونداي-اق, جانسەيىت تۇيمەباەۆ: «قازاقستاننىڭ جاھاندانۋ وربيتاسىنا تارتىلىپ, اشىق دەموكراتيالىق قوعامدى قۇرىپ وتىرعانى, ليبەرالدىق ەكونوميكالىق جۇيەنى قالىپتاستىرىپ, الەمنىڭ كوپتەگەن مەملەكەتتەرىمەن تىعىز بايلانىس ورناتىپ وتىر», – دەدى. سونىمەن قاتار, شارا بارىسىندا قازاقستان شەتەلدىك ينۆەستورلار, سونىڭ اراسىندا تۇرىكتەر ءۇشىن ودان دا تارتىمدى بولاتىنى ايتىلدى. ورتالىق ازيا بويىنشا ساراپشى, ساياسي شولۋشى كيۋرشاد زورلۋ ۇكىمەتى ۇزاق كەلىسسوزدەر بارىسىندا ءوز پوزيتسيالارىن ۇستاي العان قازاقستاننىڭ ديپلوماتيالىق جەڭىسىن جوعارى باعالاپ ءوتتى. «باۋىرلاس قازاقستاننىڭ دۇنيەجۇزىلىك ساۋدا ۇيىمىنا كىرۋى سىزدەردىڭ ەلىڭىزدە ەكسپورتقا باعىتتالعان بيزنەستى دامىتۋدىڭ جاڭا مۇمكىندىكتەرىن اشادى. تۇركيا دسۇ-عا 1995 جىلى كىردى, ودان كەيىن ەل ەكسپورت كولەمىن ارتتىرىپ, باسەكەلەستىك دەڭگەيى ايتارلىقتاي ءوستى. مۇمكىندىكتى پايدالانا وتىرىپ, باۋىرلاس قازاقستان حالقىن كەلە جاتقان استانا كۇنىمەن قۇتتىقتاعىم كەلەدى», - دەدى كيۋرشاد زورلۋ. تۇركى الەمىنىڭ ينجەنەرلەرى مەن ساۋلەتشىلەرى وداعىنىڭ توراعاسى ءىلياس دەميردجي قازاقستاننىڭ ەلەۋلى تابىستارىن اتاپ ءوتىپ, ءبىزدىڭ ەلىمىزدىڭ ورتالىقازيالىق ايماقتاعى جەتەكشى ءرولىن باسا ايتتى. سونداي-اق ول قازاقستاننىڭ دسۇ-عا كىرۋى قر-داعى بيزنەستى دامىتۋدىڭ جاڭا ساتىعا كوتەرەتىنىن اتاپ ءوتتى. تالعات رايىمبەك. دەرەك, سۋرەت: «قازاقپارات».