بۇل نەگىزگى قاعيدا اتا زاڭ جوباسىنىڭ «كونستيتۋتسيالىق قۇرىلىس نەگىزدەرى» اتاۋلى ءبىرىنشى بولىمىندە كورىنىس تاپتى. مۇندا مەملەكەتتىك باسقارۋ ءتۇرىن ناقتىلاۋ قاجەتتىلىگى تۋرالى وي بىلدىرگەن بىرقاتار عالىمدار مەن مامانداردىڭ ۇسىنىسى ەسكەرىلگەن. وسىلايشا, قازاقستان رەسپۋبليكاسى پرەزيدەنتتىك رەسپۋبليكا ەكەنى ايقىندالعان.
كونستيتۋتسيا جوباسىنىڭ نوۆەللالارىنىڭ ءبىرى – ەگەمەندىكتىڭ جالعىز يەسى رەتىندە قازاقستان حالقىن بەكىتۋ نورماسى. بۇدان باسقا, «رەسپۋبليكالىق رەفەرەندۋم» تۇسىنىگى «جالپىۇلتتىق رەفەرەندۋم» دەپ وزگەرتىلگەن. حالىق ءوز بيلىگىن تىكەلەي جالپىۇلتتىق رەفەرەندۋم مەن ەركىن سايلاۋلار, سونداي-اق مەملەكەتتىك ورگاندار ارقىلى جۇزەگە اسىراتىنى تۋرالى نورما ايقىندالعان.
جاريالانعان كونستيتۋتسيا جوباسى – قوعام تاراپىنان كەڭ ءارى قىزۋ تالقىلاۋلاردىڭ, ازاماتتار, ساياسي پارتيالار, قوعامدىق ۇيىمدار, قۇقىقتانۋشىلار مەن ساراپشىلاردىڭ كەڭ اۋقىمدى پىكىرتالاستارىنىڭ ناتيجەسى. تالقىلاۋعا بەيجاي قارامايتىن ازاماتتار دا قاتىسىپ, جالپى سانى ەكى مىڭنان اسقان وزدەرىنىڭ پىكىرلەرى مەن ۇسىنىستارىن e-Otinish پەن eGov پورتالدارى ارقىلى جىبەرگەن.
جاڭا كونستيتۋتسيا جوباسى قوعام مەن مەملەكەت دامۋىنىڭ ستراتەگيالىق مىندەتتەرىنە سايكەس كەلەدى. ول قازاقستاننىڭ قالىپتاسقان مەملەكەتتىلىگىنىڭ نەگىزدەرىن قايتا بەكىتۋمەن بىرگە, «مىقتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداماسىنىڭ لوگيكاسىنا دا تولىقتاي ساي كەلەدى. كونستيتۋتسيا جوباسىندا بەلگىلەنگەن ەرەجەلەر مەملەكەت پەن قوعامنىڭ جاڭا ەۆوليۋتسيالىق كەزەڭىن باستاۋعا نەگىز قالايدى.
جاڭا كونستيتۋتسيا جوباسىندا ازاماتتاردىڭ قۇقىعىن تسيفرلىق ورتادا قورعاۋ نورماسى بەكىتىلدى
