فوتو: سانيتاريالىق-ەپيدەميولوگيالىق باقىلاۋ كوميتەتى
جاتتىعۋ جيىنىنا قاتىسقان ۇيىمدار
وقۋ-جاتتىعۋعا سانيتاريالىق-ەپيدەميولوگيالىق قىزمەت, جەدەل مەديتسينالىق جاردەم, ينفەكتسيالىق ستاتسيونار ماماندارى, ۇلتتىق قاۋىپسىزدىك كوميتەتىنىڭ شەكارا قىزمەتى, كەدەن جانە پوليتسيا وكىلدەرى, سونداي-اق اۋەجاي اكىمشىلىگى تارتىلدى. بۇل – مەملەكەتتىك شەكارا ارقىلى وتەتىن جولاۋشىلار لەگىندە بيولوگيالىق قاۋىپتىڭ الدىن الۋعا جاۋاپتى بارلىق قۇرىلىمداردىڭ بىرلەسكەن ءىس-قيمىلىن ۇيلەستىرۋگە باعىتتالعان شارا.
شارتتى ناۋقاس جانە ناقتى الگوريتم
وقۋ-جاتتىعۋداعى ستسەناري بويىنشا اۋەجايدا نيپاح ۆيرۋسىنا كۇدىك تۋدىراتىن جولاۋشى انىقتالدى. قىزمەتتەر باستاپقى سانيتاريالىق-كارانتيندىك باقىلاۋدان باستاپ, جولاۋشىنى وقشاۋلاۋ, مەديتسينالىق تەكسەرۋ, ينفەكتسيالىق ستاتسيونارعا جەتكىزۋ, ەپيدەمياعا قارسى جانە دەزينفەكتسيالىق شارالاردى جۇرگىزۋگە دەيىنگى بارلىق كەزەڭدى ناقتى الگوريتمگە ساي ورىندادى.
وقۋ بارىسىندا ءاربىر قىزمەتتىڭ جاۋاپكەرشىلىك ايماعى, اقپارات الماسۋ تەتىكتەرى جانە جەدەل ارەكەت ەتۋ ۋاقىتى پىسىقتالدى. مامانداردىڭ ۇيلەسىمدى جۇمىسى قاۋىپتى ينفەكتسيالاردىڭ ەل اۋماعىنا تارالۋ قاۋپىن بارىنشا ازايتۋعا مۇمكىندىك بەرەتىنى اتاپ ءوتىلدى.
جاڭا قاۋىپتى ۆيرۋس: ءۇندىستاننان كەلگەن ادامدار ەرەكشە باقىلاۋدا بولادى
ۇيلەسىم مەن جاۋاپكەرشىلىك
وقۋ-جاتتىعۋ قورىتىندىسى ۆەدومستۆوارالىق ءوزارا ءىس-قيمىلدىڭ جوعارى دەڭگەيدە ۇيىمداستىرىلعانىن كورسەتتى. قولدانىستاعى ءىس-قيمىل الگوريتمدەرى الەۋەتتى بيولوگيالىق قاتەرلەرگە جەدەل دەن قويۋعا جەتكىلىكتى ەكەنى راستالدى. ءىس-شارا سوڭىندا وتكەن جۇمىس كەڭەسىندە اتقارىلعان جۇمىستار تالدانىپ, ءوزارا ىقپالداستىقتى ودان ءارى كۇشەيتۋگە باعىتتالعان ۇسىنىمدار ازىرلەندى.
مۇنداي وقۋ-جاتتىعۋلار مەملەكەتتىك شەكارانىڭ سانيتاريالىق قورعاۋ جۇيەسىنىڭ ماڭىزدى بولىگى سانالادى. ولار ەلدىڭ سانيتاريالىق-ەپيدەميولوگيالىق قاۋىپسىزدىگىن قامتاماسىز ەتۋگە, حالىق دەنساۋلىعىن قورعاۋعا باعىتتالعان.
2025 جىلى سانيتاريالىق-كارانتيندىك باقىلاۋدان 7,2 ميلليون جولاۋشى وتكەن. ونىڭ ىشىندە 86 ادامنان ەپيدەميولوگيالىق قاۋىپتىلىكتىڭ جوعارى بەلگىلەرى انىقتالىپ, بارلىعى مەديتسينالىق تەكسەرۋدەن وتكىزىلگەن. اسا قاۋىپتى جۇقپالى اۋرۋلار تىركەلگەن جوق.
