«وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەدى پرەزيدەنت.
ۇلتتىق دەڭگەيدەگى اۋقىمدى الەۋمەتتىك جوبانى التىن وندىرەتىن «التىنالماس» كومپانياسى جۇزەگە اسىرعالى وتىر. اتالعان جوباعا سالىناتىن جالپى ينۆەستيتسيا كولەمى 20 ملرد تەڭگەنى قۇرايدى. بۇل باستاما قازاقستان وڭىرلەرىندەگى مادەنيەت پەن ءبىلىم سالاسىنداعى ەڭ ءىرى جوبالاردىڭ بىرىنە اينالماق.
زاماناۋي كىتاپحانا
جاڭا كىتاپحانا ءوڭىردىڭ ەڭ ءىرى مادەني-ءبىلىم ورتالىعىنا اينالادى. ەرەكشەلىگى – كەيبىر نەگىزگى ايماقتار تاۋلىك بويى وقىرمانعا قولجەتىمدى بولادى. مۇندا 100 ورىندىق زاماناۋي امفيتەاترلى, Hi-Tech قۇرالدارىمەن جابدىقتالعان اشىق فورماتتاعى وقۋ زالى, 50 جۇمىس ورنى بار ەلەكتروندىق زال, مەديالابوراتوريا جانە تسيفرلىق كونتەنتپەن, جاساندى ينتەللەكت پەن زاماناۋي باعدارلامالارمەن جۇمىس ىستەۋگە ارنالعان پودكاست-ستۋديالار قاراستىرىلعان.
عيماراتتىڭ جالپى اۋدانى شامامەن 13 000 شارشى مەتردى قۇرايدى. كىتاپحانا كوپ دەڭگەيلى فۋنكتسيونالدىق ايماقتارعا بولىنگەن. مىسالى, جەرتولە قاباتىندا ارحيۆتەر مەن سيرەك كەزدەسەتىن قورلار, نەگىزگى كىتاپ قورى, رەستاۆراتسيا مەن تيپوگرافيا بولىمدەرى, ادەبيەتتى قابىلداۋ جانە تاراتۋ ايماقتارى ورنالاستىرىلادى. ال ءبىرىنشى قاباتتا بۋكشوپ پەن كوفەحانا, بالالار كىتاپحاناسى مەن ويىن ايماعى, كوۆوركينگ, 200 ورىندىق كونفەرەنتس-زال جانە فۋدكورت قاراستىرىلعان.
ەكىنشى قاباتتا ولكەتانۋ جانە مەرزىمدى باسىلىمدار زالدارى, امبەباپ وقۋ زالى, انىقتامالىق-بيبليوگرافيالىق ءبولىم جانە كورمە گالەرەياسى ورنالاسادى. ءۇشىنشى قابات شىعارماشىلىققا جانە زاماناۋي فورماتتارعا ارنالماق. مۇندا كەلۋشىلەرگە ارت-ستۋديالار مەن شەبەرحانالار, مەديالابوراتوريا, ونەر زالى مەن سيرەك كىتاپتار زالى, الەم ادەبيەتى ءبولىمى, ەلەكتروندىق كىتاپحانا جانە اشىق وقۋ ايماقتارى قىزمەت كورسەتەدى.
وسىلايشا, كىتاپحانا مەكتەپ وقۋشىلارى, ستۋدەنتتەر, زەرتتەۋشىلەر, شىعارماشىلىق توپتار, ءبىلىم مەن يدەيالارمەن جۇمىس ىستەيتىن بارلىق ادامدار ءۇشىن نەگىزگى ورتالىققا اينالادى.
كومپانيانىڭ اتقاراتىن ءرولى
جوبا مەملەكەت باسشىسىنىڭ باستاماسىمەن ىسكە اسىرىلىپ, كومپانيانىڭ ءبىلىم, عىلىم مەن مادەنيەتتى ۇزاق مەرزىمدى دامىتۋعا اتسالىساتىن سەنىمدى الەۋمەتتىك سەرىكتەس ەكەنىن كورسەتەدى. «التىنالماس» اق ايتۋىنشا, بۇل باستاما – ولاردىڭ جۇيەلى الەۋمەتتىك ساياساتى مەن بيزنەس ستراتەگياسىنىڭ ءبىر بولشەگى.
«ادامنىڭ تۇراقتى دامۋىنا ينۆەستيتسيا قاجەت. كىتاپحانا – ويدى, مادەنيەتتى جانە بولاشاق ۇرپاقتى قالىپتاستىراتىن ورىن. ءبىز ءۇشىن ۇلتتىق رەسۋرستاردىڭ قوعامعا ۇزاق مەرزىمدى پايدا اكەلىپ, بارلىعىنا ۇلەس قوسۋى ماڭىزدى», دەيدى كومپانيا وكىلدەرى.
جوبانىڭ جوبالىق-سمەتالىق قۇجاتتارىن ازىرلەۋگە 12 اي قاجەت. قۇرىلىس جۇمىستارى 2029 جىلدىڭ سوڭىنا دەيىن اياقتالادى. زاماناۋي كىتاپحانانىڭ پايدا بولۋى قىزىلوردا وبلىسىنىڭ رۋحاني جانە ينتەللەكتۋالدى دامۋىنا ۇلەس قوسىپ, بيزنەستىڭ مەملەكەتپەن ءتيىمدى سەرىكتەستىگىن كورسەتەتىن ۇلگى بولماق.
«التىنالماس» – الەۋمەتتىك جاۋاپكەرشىلىكتى كومپانيا, ءوڭىر ومىرىنە جۇيەلى تۇردە ارالاسىپ كەلەدى. مىسالى, 2025 جىلى كومپانيا ءۇش جىلدىق اۋقىمدى باعدارلامانى باستاپ, كەنتتەر مەن شاعىن قالالاردىڭ تۇرمىسىن جاقسارتۋعا 28,1 ملرد تەڭگەدەن استام قاراجات جۇمسادى. بۇل قارجى اقمولا, قاراعاندى, پاۆلودار جانە جامبىل وبلىستارىندا ءبىلىم, سپورت, دەنساۋلىق ساقتاۋ, تۇرعىن ءۇي-كوممۋنالدىق قىزمەتتەر, اباتتاندىرۋ جانە مادەنيەت سالاسىنداعى نەگىزگى الەۋمەتتىك جوبالاردى جۇزەگە اسىرۋعا باعىتتالدى.
