كاسىپكەرلەر قۇقى قورعالدى

وڭىرلىك كاسىپكەرلەر پالاتاسى كاسىپكەرلەر مەن ينۆەستورلاردىڭ قۇقىعىن قورعاۋ جونىندەگى ءموبيل­دى توپتاردىڭ, رەيدەرلىككە جانە زاڭسىز قىلمىستىق قۋدالاۋعا قاتىستى وتىنىشتەردى قارايتىن ۆەدومستۆوارالىق جۇمىس توبىنا بەلسەندى قاتىسادى. 2025 جىلى ءموبيلدى توپقا 51 ارىز كەلىپ تۇسكەن. ناتيجەسىندە, 16 384 كاسىپكەردىڭ, 135 ينۆەستوردىڭ قۇقىعى قورعالدى. 22 ۇسىنىس ەنگىزىلىپ, 30 تۇلعا تارتىپتىك, 3-ەۋى اكىمشىلىك جاۋاپكەرشىلىككە تارتىلىپتى.

كاسىپكەرلەرگە قولجەتىمدى بايلانىس ارنالارى مەن ءوتىنىش بەرۋ تەتىكتەرى پالاتانىڭ رەسمي ينتەرنەت-رەسۋرستارىندا ورنالاس­تىرىلىپ, ۇنەمى جاڭارتىلىپ وتىرادى. بۇل شارالار – بيزنەستى قورعايتىن قۇرالدار بار ەكەنىن جۇرتقا جەتكىزۋدىڭ ءبىر تەتىگى ءارى كاسىپكەردىڭ وتىنىشتەرىنە جەدەل ارەكەت ەتۋگە مۇمكىندىك.

ەكونوميكالىق تەرگەپ-تەكسەرۋ دەپارتامەنتىمەن دە قارىم-قاتىناس دۇرىس جولعا قويىل­عان. بۇعان قوسا, وڭىرلىك كاسىپ­كەرلەر پالاتاسى ادىلەت دەپار­تا­مەنتى, جەكە سوت ورىنداۋشىلار­مەن ۇشجاقتى مەموراندۋم جا­ساس­قان. سونىڭ اياسىندا جەكە سوت ورىنداۋشىلارىنىڭ قىزمەتىنە قاتىستى كاسىپكەرلەردىڭ پروبلە­ما­لىق وتىنىشتەرى جىلدام شە­شىمىن تاپتى. ياعني ولاردىڭ شوت­تا­رىنداعى نەگىزسىز بۇعاتتاۋلار الىنىپ, قارجىلىق-شارۋاشىلىق قىزمەتى قالپىنا كەلتىرىلدى. بيز­­نەستى قورعاۋدىڭ ماڭىزدى قۇرال­دارىنىڭ ءبىرى – كاسىپ­كەر­لەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەس. بىلتىر كەڭەستىڭ 10 وتى­رىسى ءوتىپ, 15 پروبلەمالىق ماسەلە قارالدى.

وڭىرلىك كەڭەستەردىڭ جۇمىسى كاسىپكەر قۇقىعىن بۇزعان كىنالى لاۋازىمدى تۇلعالاردى جاۋاپ­كەر­شىلىككە تارتۋمەن باعالانادى. وسى رەتتە, كاسىپكەرلىك قىزمەتكە زاڭسىز ارالاسقانى ءۇشىن سالىق ورگانىنىڭ جانە دەنساۋلىق ساقتاۋ باسقارماسىنىڭ قىزمەتكەرلەرى اكىمشىلىك جاۋاپكەرشىلىككە تارتىلدى. ال شىمكەنت قالاسى ساۋلەت جانە قالا قۇرىلىسى باسقار­ما­سىنىڭ باس ماماندارىنا «سوگىس» تۇرىندە تارتىپتىك جازا بەلگىلەندى.

«پالاتا جەرگىلىكتى اتقارۋشى ورگانداردان كەلىپ تۇسكەن 98 نور­ماتيۆتىك-قۇقىقتىق اكت جوبا­لا­رىنىڭ 23-ىنە ەسكەرتۋ مەن ۇسىنىس بەرىپ, ساراپتامالىق قورى­تىن­دىلار ازىرلەدى. بۇل – كاسىپ­كەر­لەرگە سىن-قاتەرلەردى ازايتۋعا, قۇقىقتى كۇشەيتۋگە مۇمكىندىك بەرەتىن نور­مالار», دەيدى شىمكەنت قالا­لىق كاسىپكەرلەر پالاتاسى ديرەك­تورىنىڭ ورىنباسارى مايا يساەۆا.

ماماننىڭ ايتۋىنشا, بيزنەس مۇددەسىن قورعايتىن زاڭداردى ازىرلەۋ مەن جۇيەلەۋ ماقساتىندا قالالىق ادىلەت دەپارتامەنتى جانىنان مەملەكەتتىك ورگانداردىڭ زاڭ قىزمەتتەرىن ۇيلەستىرەتىن كەڭەس قۇرىلعان. ونىڭ قۇرامىندا وڭىرلىك كاسىپكەرلەر پالاتاسى دا بار.

وڭىردە كاسىپكەرلەردىڭ قۇقىق­تىق ساۋاتتىلىعىن ارتتىرۋ مەن قۇقىقبۇزۋشىلىقتىڭ الدىن الۋعا باعىتتالعان كەشەندى ءىس-شارالار دا قولعا الىنعان. سونىڭ شەڭبەرىندە ءورت پەن سانيتارلىق قاۋىپسىزدىك, قوعام­دىق ءتارتىپ, اۆتورلىق قۇقىق, سونداي-اق زاڭسىز تەكسەرۋ ماسە­لەلەرى بيزنەس وكىلدەرىنە ءتۇسىن­دىرىل­دى.

قالا اكىمى ءوڭىر كاسىپكەرلەرىمەن جىل سايىن كەزدەسۋ وتكىزەدى. بۇل بيلىك پەن بيزنەس اراسىندا اشىق ديالوگ بارىن كورسەتەدى. مۇنداي مازمۇنداعى جۇزدەسۋ پروبلەمالاردى جەدەل شەشۋگە, كاسىپكەرلىكتى دامىتۋعا, قالانىڭ ينۆەستيتسيالىق تارتىمدىلىعىن ارتتىرۋعا وتە ءتيىمدى, دەيدى ماماندار.

وڭىرلىك كاسىپكەرلەر پالاتاسى بيزنەستى قورعاۋ, مەملەكەت پەن كاسىپكەرلەر اراسىنداعى سەنىم­دى نىعايتۋ, قولايلى ىسكەرلىك ورتا قالىپتاستىرۋ باعىتىنداعى جۇ­مىس­­تارىن جالعاستىرا بەرمەك.

شىمكەنت