وڭتۇستىك قازاقستاندا ۇبت-دان جوعارى بالل جيناعان تۇلەك ماراپاتتالدى

استانا. 25 ماۋسىم. وڭتۇستىك قازاقستان وبلىسىنىڭ اكىمى اسقار مىرزاحمەتوۆ ۇلتتىق بىرىڭعاي تەستىلەۋدەن 125 بالل جيناعان مەكتەپ ءبىتىرۋشى تۇلەككە 500 مىڭ تەڭگەلىك سەرتيفيكات تابىس ەتتى. بۇل تۋرالى «قازاقپارات» حابارلادى. تولە بي اۋدانىنداعى مەكتەپتەردىڭ بىرىنەن ءبىلىم العان لاۋرا ءابدازيموۆا وبلىس بويىنشا 125 بالل العان جالعىز تۇلەك. ول اقشانى ءوزىنىڭ قوسىمشا ءبىلىم الۋىنا جۇمسايتىنىن ايتتى. «التىن بەلگى» تابىستاۋ سالتاناتتى راسىمىنە 608 وڭتۇستىكقازاقستاندىق تۇلەك جينالدى. ولاردىڭ بارلىعى ۇزدىك بىلىمدەرىن راستاعاندار, باستاپقىدا ۇمىتكەرلەر سانى 1084 بولعان. شارادا ايماق باسشىسى اسقار مىرزاحمەتوۆ: «سەندەر ءبىزدىڭ بولاشاعىمىزسىڭدار. ءبىز دۇرىس باعىتتى تاڭدادىق. بارلىعىمىزدىڭ تۇپكى ماقساتىمىز - قازاقستاننىڭ كەلەشەگىنىڭ زور بولۋى. بارشاڭا تابىس, ساتتىلىك, جارقىن بولاشاق تىلەيمىن», – دەدى. سونداي-اق, وبلىستىق ءبىلىم بەرۋ باسقارماسىنىڭ باسشىسى وڭتۇستىكقازاقستاندىق ءۇشىن ۇبت تابىستى وتكەنىن مالىمدەدى. ايماقتا ورتاشا بالل 78,9-دى قۇرادى. ونىڭ ىشىندە كەنتاۋ قالاسىنىڭ تۇلەكتەرى ەرەكشە كورىندى. ولاردىڭ ورتاشا بالى - 99,1. ەكىنشى ورىندا سوزاق اۋدانىنىڭ تۇلەكتەرى جاقسى ناتيجەگە قول جەتكىزگەن. تۇلەكتەردىڭ ورتاشا بالى – 86 بولسا, ءۇشىنشى ورىندا تۇركىستاننىڭ مەكتەپ بىتىرۋشىلەرى 85 بالل جيناعان. شىمكەنتتە ورتاشا بالل 81,8-ءدى كورسەتتى. ال ەڭ تومەن كورسەتكىش (ورتاشا بالل - 70,4 جانە تيىسىنشە 67,1) سارىاعاش, سايرام اۋداندارىندا تىركەلدى. سالتاناتتى راسىمدە ماقتاارال اۋدانىنىڭ باۋىرجان مومىش ۇلى اتىنداعى مەكتەپ-گيمنازياسىنىڭ ەڭبەگى اتاپ ءوتىلدى. ولاردىڭ بارلىق 35 ۇمىتكەرى ۇزدىك بىلىمدەرىن راستادى. مەكتەپ ديرەكتورى مەن بەس ارىپتەسى جانە ۇزدىك ناتيجە كورسەتكەن تۇلەكتەر وبلىس اكىمىنىڭ قۇرمەت گراموتالارىمەن ماراپاتتالدى. تالعات رايىمبەك. دەرەك: «قازاقپارات». سۋرەت: egemen.kz.