ستاتيستيكاعا زەر سالساق, ايەلدەر اراسىنداعى ونكولوگيالىق اۋرۋلاردىڭ قۇرىلىمىندا جاتىر موينى وبىرى ءسۇت بەزى وبىرىنان كەيىن 2-ءشى قاتاردا. قاۋىپ كوبىنە 40 جاستان اسقان ايەلدەردە تۋىندايدى. سوندىقتان دارىگەرلەر ايەلدەردى ۋاقتىلى سكرينينگتەن وتۋگە شاقىرادى. بىزدەگى سكرينينگتىڭ ۇلتتىق باعدارلاماسى ىسىك الدى جاعدايلاردى جانە اۋرۋدىڭ ەرتە فورمالارىن انىقتاۋعا باعىتتالعان. سەبەبى اۋرۋ نەعۇرلىم ەرتە ساتىدا انىقتالسا, تولىق ەمدەۋگە مۇمكىندىك ارتادى.
كلينيكالىق جاعدايدى مىسال ەتسەك, وپەراتسيالىق ۇستەلدە 50 جاستاعى ايەل جاتىر دەلىك. پاتسيەنتتەن جاتىر موينىنىڭ پرەينۆازيۆتى وبىرى جوسپارلى تەكسەرۋ كەزىندە انىقتالعان. ياعني, اۋرۋدىڭ بار ەكەنى دەر كەزىندە بەلگىلى بولعان. مۇنداي جاعدايدا ۇلتتىق عىلىمي ونكولوگيا ورتالىعىنىڭ دارىگەرلەر توبى لاپاروسكوپيالىق ادىسپەن راديكالدى حيرۋرگيالىق ەمدەۋ جۇرگىزەدى. جاتىردى مويىنمەن, انالىق بەزدەرمەن جانە جاتىر تۇتىكتەرىمەن الىپ تاستايدى.
وسى وپەراتسيا ايەلدەگى III دارەجەلى سەمىزدىككە بايلانىستى تەحنيكالىق كۇردەلى سانالادى. الايدا, از ءينۆازيۆتى لاپاروسكوپيالىق قولجەتىمدىلىك اسقىنۋ قاۋپىن ازايتۋعا, ارالاسۋدى قاۋىپسىز تۇردە جاساۋعا, قالپىنا كەلتىرۋدى ايتارلىقتاي جىلدامداتۋعا مۇمكىندىك بەرەدى.
وسىلايشا, وپەراتسيانى ءساتتى وتكىزۋگە بولادى. قىسقاسى, تۇرعىندار ۋاقتىلى تەكسەرۋدەن ءوتىپ تۇرسا, اۋرۋدى تۇبەگەيلى جەڭۋگە مۇمكىندىك تۋدى. بىراق ودان دا ءتيىمدى جولى – پروفيلاكتيكا. ياعني الدىن الۋ شارالارى. ول – ادام پاپيللوماسى ۆيرۋسىنا قارسى ۆاكتسيناتسيا. بۇل دۇنيەجۇزىلىك دەنساۋلىق ساقتاۋ ۇيىمىنىڭ جاتىر موينى وبىرىن جويۋ جونىندەگى جاھاندىق ستراتەگياسىنىڭ بولىگى سانالادى. تاجىريبە, ياعني ۆاكتسيناتسيا الەمنىڭ 148 ەلىندە قولدانىلادى. ال بىزدە قىزداردى يممۋنداۋ 2024 جىلدان باستاپ پروفيلاكتيكالىق ەكپەلەردىڭ ۇلتتىق كۇنتىزبەسىنە سايكەس جۇرگىزىلەدى.
