استانا. 25 ماۋسىم. «ەكىباستۇز ماەس-2 ستانتسياسى» اكتسيونەرلىك قوعامىنىڭ جانارماي قۇيۋ ءماشينيسى گالينا ميحنوۆانىڭ پرەزيدەنت نۇرسۇلتان نازارباەۆقا جازعان حاتىنا ەلباسىنىڭ ءوزى جاۋاپ بەردى. بۇل تۋرالى «قازاقپارات» حابارلادى.
قالا تۇرعىنى گالينا ميحنوۆا حاتىندا ءوزى جايلى ايتا كەلە, مەملەكەت باسشىسىن كەزەكتەن تىس قازاقستان رەسپۋبليكاسىنىڭ پرەزيدەنتى سايلاۋىنداعى جەڭىسىمەن, سونداي-اق الدا كەلە جاتقان تۋعان كۇنىمەن قۇتتىقتادى.
«مەن قازاقستاندا تۋىپ-وسكەنىمە, وسى جەردە تۇرىپ جاتقانىما ءوزىمدى باقىتتى سانايمىن. ەكىباستۇز ماەس-ىندە جانارماي قۇيۋ ءماشينيسى بولىپ جۇمىس ىستەگەنىمە 20 جىلدان استى. ءسىز كوپتەگەن جىلدار بويى ءبىزدىڭ پرەزيدەنتىمىز بولىپ كەلە جاتقانىڭىزدى ماقتان تۇتامىن. ءسىزدىڭ كورەگەن باسشىلىعىڭىزدىڭ ارقاسىندا ءبىز بەيبىتشىلىك پەن كەلىسىمدە ءومىر ءسۇرىپ كەلەمىز», – دەدى. سونداي-اق, ول مەملەكەت باسشىسىنا دەگەن ءىلتيپاتىن ولەڭ جولدارى ارقىلى جەتكىزدى.
«بىت ناشيم پرەزيدەنتوم ۆام سۆىشە سۋجدەنو.
ي ستولكو لەت بىت ليدەروم نە كاجدومۋ دانو.
يسپىتىۆاەت گوردوست زا كازاحستان نارود,
درۋجنەە ي بوگاچە ستال كازاحستانسكي رود!».
ال پرەزيدەنت نۇرسۇلتان نازارباەۆتىڭ جاۋاپ حاتىن پاۆلودار وبلىسى اكىمى اپپاراتىنىڭ قۇجات اينالىمىن قامتاماسىز ەتۋ جانە باقىلاۋ ءبولىمىنىڭ جەتەكشىسى جانات حاممەتوۆ گالينا ميحنوۆاعا تابىس ەتتى.
حاتقا: «قۇرمەتتى گالينا ۆاسيلەۆنا! حاتىڭىزدا كورسەتكەن جىلى لەبىزىڭىزگە جانە مەنىڭ قىزمەتىمە ارناعان ولەڭ جولدارىڭىز ءۇشىن راحمەت ايتامىن. ەكىباستۇز قالاسىنىڭ جانە ءسىز قازىر جۇمىس ىستەپ وتىرعان ستانتسيانىڭ قالىپتاسۋى مەنىڭ قاتىسۋىممەن ءوتتى. بۇل ءوندىرىس الىپتارى – قازاقستاننىڭ ماقتانىشى. وزىڭىزبەن بىرگە جۇمىس جاسايتىندارعا سالەمىمدى جەتكىزىپ, يگى تىلەگىمدى قابىل الىڭىز», – دەپ جاۋاپ جازدى مەملەكەت باسشىسى.
تالعات رايىمبەك.
دەرەك, سۋرەت: «قازاقپارات».
