ىنتىماقتاستىق باعىتى سالالانادى

ۆيتسە-پرەمەر اتاپ وتكەندەي, جۇمىس توبى اۋعان باعىتىنداعى كەلىسىلگەن جۇيەلى جۇمىستى قام­تا­ماسىز ەتۋگە قۇرىلعان. اۋعان تاراپىمەن اعىمداعى ءوزارا ءىس-قيمىل ماسەلەسىن ۇيلەستىرۋ جۇمىس توبى توراعاسىنىڭ ورىنباسارى – پرەزيدەنتتىڭ اۋعانستان بو­يىنشا ارنايى وكىلى, سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى ەركىن تۇقىموۆقا جۇكتەلدى.

سەرىك جۇمانعارين مەملەكەت باسشىسى كولىك ءدالىزىن دامىتۋ, ءوزارا ساۋدا-ەكونوميكالىق, گۋمانيتارلىق ءىس-قيمىل بويىنشا ناقتى مىندەت قويعانىن اتاپ ءوتتى. بۇل رەتتە اعىمداعى قارقىندى جۇمىس ۆەدومستۆوارالىق ۇيلەس­تى­رۋ­دى كۇشەيتۋدى, باستامالاردى نەعۇرلىم تەرەڭ پىسىقتاۋدى تالاپ ەتەدى. جۇمىس توبىنىڭ نەگىزگى مىندەتى – ءبىرتۇتاس جۇيەلى ءتاسىلدى قالىپتاستىرىپ, ارتىق بيۋرو­كرا­تيالىق راسىمدەردى قىس­قارتۋ. اۋعانستانمەن ىنتىماق­تاستىق بارىنشا تولىق كولەمدە پايدالانىلماي جاتقانى اتاپ ءوتىلدى. جۇمىس توبى بىرىڭعاي كەلىسسوز الاڭىنا اينالىپ, ماسەلەلەردى جەدەل شەشۋگە ءتيىس.

وتىرىس بارىسىندا كولىك جانە لوگيستيكا, ەنەرگەتيكا, دەنساۋلىق ساقتاۋ مەن ءبىلىم سالاسىنداعى ءوزارا ءىس-قيمىل پەرسپەكتيۆاسى, سونداي-اق تاۋ-كەن مەتاللۋرگيا سالاسىنداعى بىرلەسكەن جوبالاردى جۇزەگە اسىرۋ جايى قارالدى. 2025 جىلى اۋعانستانعا ەكى رەت گۋمانيتارلىق كومەك كورسەتىلگەن. كەيىنگى بەس جىلداعى جەتكىزگەن جۇك­تەردىڭ جالپى كولەمى – 6,4 ملرد تەڭگە.

كولىك ۆيتسە-ءمينيسترى جانىبەك تايجانوۆ جوسپارلى رەجىمدە جۇزەگە اسىرىلىپ جاتقان اۋعان­ستان اۋماعى ارقىلى وتەتىن «تۋر­گۋن­دي – گەرات – قانداعار – سپين – بولداك» تەمىرجول قۇرىلىسى جوباسىنىڭ (CASA) بارىسى تۋرالى حاباردار ەتتى. قازاقستان تاراپى ءباا-ءنىڭ ەنەرگەتيكا جانە ينفراقۇرىلىم مينيسترلىگىنە ۇش­جاقتى مەموراندۋم جوباسىن ازىرلەپ, جولداعان. وعان بيىل اقپاندا قول قويۋ جوسپارلانىپ وتىر. سونداي-اق پاكىستان تەمىر­جول مينيسترلىگىمەن جەكەلەي مەموراندۋمعا قول قويۋ پىسىق­تا­لىپ جاتىر. پاكىستان جاعى ۇسى­نىل­عان مارشرۋتتى قولدايدى.

عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا قازىر ەلىمىزدىڭ 34 جوعارى وقۋ ورنىندا 610 اۋعان ستۋدەنتى ءبىلىم الىپ جاتقانىن حابارلادى. قازىرگى مەموراندۋم بويىنشا جىل سا­­يىن 30 ءبىلىم بەرۋ گرانتى بولىنەدى. كۆوتانى جىلىنا 60 گرانتقا كوبەي­تۋ جايى قاراستىرىلىپ جاتىر.