قازىر ستراتەگيالىق نىسان «پەتروپاۆلدىڭ حالىقارالىق اۋەجايى» دەپ اتالادى. ۇشۋ-قونۋ الاڭى 10 سم بەتونمەن قاپتالىپ, ۇزىندىعى 2 800 مەترگە, جالپاقتىعى 45 مەترگە دەيىن كەڭەيدى. سونىمەن قاتار قونۋ الاڭى مەن مەن پەررون حالىقارالىق ستاندارتتارعا سايكەستەندىرىلىپ, جارىقتى دابىلمەن قامتاماسىز ەتىلگەن. ءسويتىپ, قازىر اۋەجاي 171 تونناعا دەيىن جۇك كوتەرە الاتىن ۇشاقتاردى ۇشىرىپ-قوندىرا الادى.
بىلتىردان بەرى «Qazaq Air» اۆياكومپانياسىنىڭ ۇشاقتارى اپتاسىنا 2 رەت – استاناعا, ال «Scat» كومپانياسىنىڭ ۇشاقتارى اپتاسىنا ەكى رەت الماتى مەن شىمكەنت قالالارىنا ۇشىپ تۇردى. بىلتىرعى جازدا ءتىپتى مىسىردىڭ شارم-ءال-شەيح قالاسىنا چارتەرلىك رەيستەر دە ۇيىمداستىرىلدى.
ءبىرازدان بەرى اۋەجايدى باسقاراتىن كومپانيا تابىلماعان ەدى. قازىر ونى ەلىمىزدە تۇراتىن تۇرىك ازاماتتارى فاررۋح پەن سۋحراب ماحمۋدوۆتار قۇرعان «Orbis Kazakhstan» توبى سەنىمدى باسقارۋعا العان. كومپانيا اۋەجايدى دامىتۋعا 1,2 ملرد تەڭگە ينۆەستيتسيا قۇيدى. قازاقستان عانا ەمەس, قىرعىزستان, وزبەكستان, ءتىپتى اقش نارىقتارىندا ەڭبەك ەتەتىن تۇرىك كومپانياسى – قازىر ەلىمىزدەگى تابىستى كاسىپورىنداردىڭ قاتارىندا.
جۋىردا اۋەجاي ديرەكتورىنىڭ مىندەتىن اتقارۋشى ءابىل كەكىلباەۆ كاسىپورىننىڭ «Qyzyljar» ارنايى ەكونوميكالىق ايماعىنا ءوتۋ مۇمكىندىگى بار ەكەنىن جاريالادى. ول ءۇشىن اۋەجايدان ارنايى ەكونوميكالىق ايماققا التى شاقىرىمدىق تەمىرجول جەلىسىن تارتۋ كەرەك ەكەن. بۇل – «Qyzyljar» اەا كاسىپورىنداردىڭ الىستان كەلەتىن قۇرال-سايماندارىن اۋەجايدان بىردەن جەتكىزۋگە مۇمكىندىك بەرەدى. سونداي-اق اەا اۋماعىندا كەيبىر كاسىپورىنداردىڭ جۇكتەرىن دە الىس شەتەلگە بىردەن اكەتۋگە جول اشادى. «اەا اۋماعىنا قوسىلۋىمىز بىزگە سالىقتىق جەڭىلدىكتەر الۋعا, ينۆەستيتسيا تارتۋعا جاعداي جاسايدى», دەيدى ءا.كەكىلباەۆ.
وسىلايشا, پەتروپاۆل اۋەجايى كەڭەيىپ, تابىسى مولايىپ, ايماقتىڭ ترانزيتتىك الەۋەتىنىڭ ارتۋىنا ۇلەس قوسپاق. رەسەيگە جاقىن ورنالاسۋى دا بۇل جوبانىڭ ءتيىمدى ىسكە اسىرىلۋىنا مۇمكىندىك بەرەدى. سونىمەن قاتار «قازپوشتا» كومپانياسىمەن دە كەلىسسوزدەر جۇرگىزىلىپ, قويما, تەرمينالدار سالۋ ماسەلەلەرى تالقىلانىپ جاتىر.
پەتروپاۆل
