اكىمنىڭ سوزىنشە, وبلىستا تۋريستىك ينفراقۇرىلىمدى دامىتۋ باعىتىندا اۋقىمدى جوبالاردى جۇزەگە اسىرۋ جوسپارلانىپ وتىر. الاكول جاعالاۋىن دامىتۋعا وتكەن جىلى 1 ملرد تەڭگە باعىتتالعان. قابانباي اۋىلىندا قۇتقارۋ ستانتسياسىنىڭ قۇرىلىسى اياقتالدى. كول جاعالاۋىندا اباتتاندىرۋ, كوشەلەردى جوندەۋ جۇمىستارى جۇرگىزىلدى. بيىل الاكول دەمالىس ايماعىن دامىتۋ ءۇشىن جەرگىلىكتى بيۋدجەتتەن 2,4 ملرد تەڭگە قاراجات ءبولىندى. كول جاعالاۋىندا اباتتاندىرۋ, كوشەلەردى جوندەۋ جۇمىستارى جۇرگىزىلەدى. شومىلۋ ماۋسىمىنا دەيىن جاساندى ينتەللەكت تەحنولوگياسىن ەنگىزە وتىرىپ, 117 زاماناۋي بەينەباقىلاۋ جۇيەسى, 6 انتەننا-دىڭگەك قۇرىلعىسى ورناتىلىپ, ءموبيلدى ينتەرنەت بايلانىس جەلىسىمەن تولىق قامتىلادى.
«بىلتىر كۇزدە باس جوسپارعا وزگەرىستەر ەنگىزۋ جۇمىستارى باستالدى, بيىلعى قىركۇيەك ايىندا اياقتالادى. ناتيجەسىندە اۋماعى 300 گەكتاردان 3 000 گەكتارعا دەيىن جەتەدى. تۋريستىك ايماققا كۇندەلىكتى كەلۋشىلەر سانىن 20 مىڭنان 75 مىڭ ادامعا جەتكىزۋ كوزدەلىپ وتىر. تۋريستەردىڭ قاۋىپسىزدىگىن قامتاماسىز ەتۋ ماقساتىندا قابانباي اۋىلىندا ءورت ءسوندىرۋ دەپوسىنىڭ قۇرىلىسى جۇرگىزىلۋدە», دەدى ءوڭىر باسشىسى.
ونىڭ ايتۋىنشا, جىل سايىن كول جاعالاۋى قىسقارىپ, تۋريزم نىساندارىنا قاۋىپ ءتوندىرىپ وتىر. وسىعان بايلانىستى قاۋىپتى 360 مەتر جاعالاۋ انىقتالىپ, وتكەن جىلى كۇزدە نىعايتۋ جۇمىستارى اتقارىلدى. سونىڭ ارقاسىندا 300 ورىندىق 3 دەمالىس ورنىن سۋ باسۋ قاۋپى سەيىلدى. بارلىق جاعالاۋدى نىعايتۋعا وسى جىلدىڭ قاڭتار ايىندا جالپى قۇنى 15,2 ملرد تەڭگەگە جوبالاۋ-سمەتالىق قۇجاتتاماسى ازىرلەندى.
كەلەسى وزەكتى ماسەلە – ەلەكتر قۋاتىنىڭ جەتىسپەۋى جانە ەلەكتر جەلىلەرىنىڭ توزۋى. بۇل ماسەلەنى شەشۋ ءۇشىن ماگيسترالدى ەلەكتر جەلىسىمەن ترانسفورماتورلىق قوسالقى ستانتسيا قۇرىلىسىنىڭ جوبالاۋ سمەتالىق قۇجاتتاماسى ازىرلەنىپ, مەملەكەتتىك ساراپتامادان ءوتىپ جاتىر. بيىلعى شومىلۋ ماۋسىمىنا ەلەكتر جەلىلەرىنىڭ جانە ىشكى قوسالقى ستانتسيالاردى جوندەۋ جانە كۇتىپ-ۇستاۋ ءۇشىن 275 ملن تەڭگە قارجى قاراستىرىلادى. تۋريستىك ايماققا قاتتى تۇرمىستىق قالدىقتار پوليگونىن سالۋعا جوبالاۋ-سمەتالىق قۇجاتتاما ازىرلەنىپ جاتىر. سۋ, كارىزدىك جەلىلەر, بلوك-ءمودۋلدى تازارتۋ قۇرىلعىسىن سالۋعا جوبالاۋ-سمەتالىق قۇجاتتاما ازىرلەۋگە قاراجات ءبولىندى.
ءتۋريزمدى جارنامالاۋ توقىراپ تۇر: شەتەلدىكتەردى تارتۋ قۇرالدارى نەگە 4 جىل بويى جاڭارتىلماعان؟
اكىمدىكتىڭ دەرەگىنشە, 2025 جىلى وبلىستىڭ تۋريزم سالاسىندا 8,9 ملرد تەڭگەگە 4 جوبا ىسكە قوسىلدى. ونىڭ قاتارىندا «تۋعان جەرگە تۋىڭدى تىك» ينۆەستيتسيالىق فورۋمى اياسىندا سەمەي قالاسىندا 6,5 ملرد تەڭگەگە «Pana Unique Semey» بەس جۇلدىزدى قوناق ءۇي − مەيرامحانا كەشەنى سالىنىپ, بىلتىر جاڭا جىل قارساڭىندا پايدالانۋعا بەرىلدى. ناتيجەسىندە 107 جاڭا جۇمىس ورنى قۇرىلدى. بەسقاراعاي اۋدانى ستارايا كرەپوست اۋماعىندا 1 ملرد تەڭگەگە بالىق شارۋاشىلىعىمەن قاتار قىزمەت كورسەتەتىن كەشەندى دەمالىس بازاسى ىسكە قوسىلدى. جول بويىنداعى سەرۆيستى دامىتۋ ماقساتىندا وتكەن جىلى «سەمەي-پاۆلودار» تاسجولىنىڭ بويىندا «Petro Retail» جشس جاڭا Keruen Inn قوناق ءۇيىن اشتى.
2029 جىلعا دەيىن وبلىستا 87,4 ملرد تەڭگەگە 48 جوبانى ىسكە اسىرۋ جوسپارلانعان. ولاردىڭ ىشىندە ءىرى جوبالاردىڭ ءبىرى – ازەربايجان رەسپۋبليكاسى ينۆەستورلارىنىڭ قاتىسۋىمەن «الاكول» ەمدەۋ-ساۋىقتىرۋ كەشەنىن سالۋ. بۇگىنگە قۇرىلىس ورنىن بەكىتۋ جۇمىستارى كەلىسىلىپ جاتىر. سونىمەن قاتار, شيپالى كولىندە بالشىقپەن ەمدەيتىن ءساناتوريدى سالۋ كوزدەلىپ وتىر. ەسكيزدىك جوباسى ازىرلەندى, ءساۋىر ايىندا قۇرىلىس جۇمىستارىن باستايدى. سەمەي قالاسىندا «Semey Mall» مادەني ويىن-ساۋىق ساۋدا ورتالىعى سالىنادى. سونداي-اق, «Abay Hospitality Group» جشس جانە «PanaComplexSemey» جشس اباي اۋدانىنىڭ جيدەباي اۋماعىندا ەتنوكەشەندى, ۆيزيت-ورتالىعىن, «تارى» كافەسىن سالۋدى جوسپارلانىپ وتىر.
