پرەمەر-ءمينيستردىڭ ايتۋىنشا, شەتەلدىك تۋريست ەل تاڭداماس بۇرىن اشىق دەرەككوزدەردەگى, اسىرەسە ينتەرنەت پەن الەۋمەتتىك جەلىلەردەگى اقپاراتقا سۇيەنەدى. الايدا سوڭعى ءتورت جىلدا قازاقستاندى شەتەلدە ىلگەرىلەتۋ قۇرالدارى جاڭارتىلماعان. كوپ جاعدايدا ەسكىرگەن مالىمەتتەر قولدانىلىپ, مادەني, ەتنوگرافيالىق جانە باسقا دا مازمۇن جەتكىلىكتى قامتىلماي وتىر.
ەلىمىزدە تۋريزمگە سالىنعان ينۆەستيتسيا كولەمى 1,2 ترلن تەڭگەدەن استى
وسىعان بايلانىستى تۋريزم مينيسترلىگىنە مادەنيەت مينيسترلىگى, Kazakh Tourism جانە ءوڭىر اكىمدىكتەرىمەن بىرلەسىپ, قازاقستاندا وتەتىن بارلىق مادەني, سپورتتىق جانە وزگە دە بۇقارالىق ءىس-شارالاردى ەسكەرە وتىرىپ, 2026 جىلعا ارنالعان ەگجەي-تەگجەيلى جۇمىس جوسپارىن ءبىر اي ىشىندە ازىرلەۋ تاپسىرىلدى.
وتىرىستا ۇلتتىق پاركتەر مەن قورىقتار اۋماعىنداعى كاسىپكەرلىك قىزمەت ماسەلەسى دە كوتەرىلدى. قازىرگى تاڭدا وتاندىق كاسىپكەرلەردىڭ بۇل اۋماقتارعا كىرۋى بىرقاتار اكىمشىلىك كەدەرگىلەرگە تىرەلىپ وتىر. پرەمەر-مينيستر تابيعاتتى قورعاۋ مەن ءتۋريزمدى دامىتۋدىڭ تەپە-تەڭدىگىن ساقتاۋدىڭ ماڭىزىن اتاپ ءوتتى.
«وسىمدىكتەر مەن جانۋارلار دۇنيەسىنىڭ ساقتالۋىن قامتاماسىز ەتە وتىرىپ, تۋريستىك ينفراقۇرىلىمدى ورنىقتى دامىتۋ جانە كورسەتىلەتىن قىزمەتتەر ساپاسىن ارتتىرۋ ماقساتىندا كاسىپكەرلەردىڭ ۇلتتىق پاركتەر مەن قورىقتارعا, رەزەرۆاتتار اۋماقتارىنا رەتتەۋ ارقىلى كىرۋ تەتىكتەرى بويىنشا حالىقارالىق تاجىريبەنى زەردەلەپ, ۇسىنىستار ەنگىزۋ قاجەت. ەكولوگيا مينيسترلىگى كاسىپكەرلەر پالاتاسىمەن بىرلەسىپ, ءتيىستى زاڭنامالىق تۇزەتۋلەردى ازىرلەۋى ءتيىس», دەدى ولجاس بەكتەنوۆ.
سونداي-اق بيزنەس وكىلدەرىنىڭ سۋ ايدىندارى جاعالاۋىنداعى قورعاۋ ايماقتارىنا قاتىستى شەكتەۋلەرگە بايلانىستى ينۆەستيتسيالىق جوبالاردى جۇزەگە اسىرۋدا قيىندىقتارعا تاپ بولىپ وتىرعانى ايتىلدى. كەي جاعدايدا اكۆاپارك سياقتى تۋريستىك نىساندارعا قاجەتتى ينفراقۇرىلىمدى تارتۋ مۇمكىن بولماي وتىر. پرەمەر-مينيستر بۇل ماسەلەدە ەكولوگيا تالاپتارىن ساقتاي وتىرىپ, بارلىق تاراپقا ءتيىمدى شەشىم تابۋ قاجەت ەكەنىن اتاپ ءوتتى.
وسى باعىتتا سۋ رەسۋرستارى مينيسترلىگىنە وزىق حالىقارالىق تاجىريبەنى زەرتتەپ, زاڭناماعا ءتيىستى وزگەرىستەر ازىرلەۋ تاپسىرىلدى.
قازاقستان – Amazon Prime مەن Euronews نازارىندا: تۋريستىك تۋرلار سانى 3 ەسە ارتتى
تۋريزم سالاسىنداعى اتالعان تاپسىرمالاردىڭ ورىندالۋىن جالپى ۇيلەستىرۋ پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆاعا جۇكتەلدى.
