فوتو: اشىق دەرەككوزدەن
بۇگىن ۇكىمەت وتىرىسىندا تۋريزم جانە سپورت ءمينيسترى ەربول مىرزابوسىنوۆ ينفراقۇرىلىمداردى قۇرۋ جانە دەستيناتسيالاردى ىلگەرىلەتۋ باعىتىندا اتقارىلىپ جاتقان ءىس-شارالار تۋرالى باياندادى.
ونىڭ ايتۋىنشا, الماتى وڭىرىندەگى كۋرورتتار بىرىڭعاي جۇيەگە بىرىكتىرىلەدى. 30 جاڭا اسپالى جول جانە 161 شاقىرىم شاڭعى تراسساسى پايدا بولادى. بۇل ماۋسىم قىزعان شاقتا جۇكتەمەنى ازايتۋعا جانە تۋريست سانىن 5 ميلليون ادامعا دەيىن جەتكىزۋگە مۇمكىندىك بەرەدى.
جوبا جوعارى ەكونوميكالىق الەۋەتكە دە يە. ويتكەنى تاۋ شاڭعىسى تۋريستەرىنىڭ شىعىندارى ورتا ەسەپپەن 350 دوللاردى قۇرايدى, بۇل جاعاجاي تۋريستەرىنىڭ شىعىندارىنان 7 ەسەگە كوپ.
ششۋچە-بۋراباي ايماعىندا قاتاركول جانە جوكەي كولدەرىنە جۇكتەمەنى ءبولۋ بويىنشا جۇمىستار جۇرگىزىلىپ جاتىر. وتكەن جىلى «پرومەناد» ايماعى, 10 شاقىرىم ۆەلوجولدار مەن اۋماقتى تاماشالاۋ الاڭدارى ىسكە قوسىلدى.
ماڭعىستاۋدا «جىلى جاعاجاي» جانە «كەندىرلى» ايماقتارىنا باسىمدىق بەرىلەدى.
«مۇندا اباتتاندىرىلعان جاياۋ مارشرۋتتار, اۋماقتى تاماشالاۋ الاڭدارى, ۆيزيت-ورتالىقتار قۇرىلادى. قوناقتاردىڭ اتالعان تۋريستىك ايماقتاردا قالۋ ۇزاقتىعىن 10 كۇنگە ارتتىرۋ كوزدەلىپ وتىر. سونداي-اق 2029 جىلعا قاراي كەلۋشىلەر سانىن 150 مىڭ ادامعا جەتكىزۋدى جوسپارلاپ وتىرمىز», دەدى مينيستر.
ايتا كەتەيىك, بۇعان دەيىن شىمبۇلاق پەن مەدەۋگە شەتەلدىكتەر ءتانتى بولىپ, الماتى Viajar جۋرنالىنىڭ تىزىمىنە ەنگەنىن حابارلاعانبىز.
الماتىنىڭ اسەم تابيعاتى Vogue باسىلىمىنىڭ دا نازارىن اۋدارىپ, ەڭ ۇزدىك 14 باعىت قاتارىنا قوسقان ەدى.
