ءىس-شاراعا اۋىلدىڭ قادىرلى اقساقالدارى مەن تۇرعىندارى, كەنت اكىمى, مەديتسينا سالاسىنىڭ قىزمەتكەرلەرى قاتىستى. كورەرمەندەر نازارىنا اكادەميكتىڭ ۇلى ا.شارمانوۆ ۇسىنعان بەينەسيۋجەت كورسەتىلدى.
كورمە عالىمنىڭ ءومىرى مەن قىزمەتىن كەزەڭ-كەزەڭىمەن تانىستىرىپ, حالىق دەنساۋلىعىنا قوسقان زور ۇلەسىن پاش ەتتى.
تورەگەلدى شارمانوۆ ۇلىتاۋ اۋدانىنىڭ اۋىل دارىگەرىنەن باستاپ قازاق كسر دەنساۋلىق ساقتاۋ ءمينيسترى مەن قازاقستاننىڭ پارلامەنت دەپۋتاتىنا دەيىن ەڭبەك جولىنان ءوتتى. قازاق تاماقتانۋ اكادەمياسىنىڭ باسشىسى بولدى. 2022 جىلى دەنساۋلىق ساقتاۋدى دامىتۋعا قوسقان زور ۇلەسى ءۇشىن «قازاقستاننىڭ ەڭبەك ەرى» جوعارى اتاعى بەرىلدى.
ۇلىتاۋ اۋداندىق تاريحي-ولكەتانۋ مۋزەيىنىڭ باس قور ساقتاۋشىسى نۇرسۇلۋ بالتابايقىزى كورەرمەندەردى عالىمنىڭ جەكە زاتتارىمەن تانىستىردى. تورەگەلدى شارمانوۆتىڭ قۇندى جادىگەرلەرى عالىمنىڭ تۇلعالىق بولمىسىن, ەڭبەكتەگى ىزدەنىسىن, عىلىمي جولىن باياندايدى.
اكادەميكتىڭ الماتىداعى تاعامتانۋ ينستيتۋتىنداعى جەكە كابينەتىنەن اكەلىنگەن جيھازى – كرەسلو مەن جازۋ ۇستەلى بىردەن كوزگە تۇسەدى. عالىم وسى كرەسلودا عىلىمي ەڭبەكتەر جازىپ, حالىقارالىق كەزدەسۋلەرگە دايىندالىپ, تاعامتانۋ عىلىمىنىڭ دامۋ باعىتىن ايقىندايتىن شەشىمدەر قابىلداعان.
كابينەت ەدەنىنە توسەلگەن, قازاقى ورنەگى مول قولدان توقىلعان كىلەمنەن تۋعان ەلىنە دەگەن سۇيىسپەنشىلىك سەزىلەدى. شەتەلدىك ارىپتەستەردىڭ ءبىرى سىيعا تارتقان ايۋ تەرىسىنەن جاسالعان كادەسىي – توسەنىش. بۇل سىيلىق اكادەميكتىڭ حالىقارالىق بەدەلىن, شەتەلدىك عىلىمي قاۋىمداستىقپەن تىعىز بايلانىسىن كورسەتەدى.
اكادەميكتىڭ مانتياسى مەن شاپانى – عىلىمداعى بيىك مارتەبەسى مەن ابىرويلى ەڭبەگىنىڭ ايعاعى. ءوز ۋاقىتىندا وتاندىق جانە حالىقارالىق دەڭگەيدەگى جيىندارعا وسى كيىممەن قاتىسىپ, قازاق عىلىمىنىڭ ابىرويىن اسقاقتاتقان. كورمەدە تورەگەلدى شارمانوۆتىڭ مايلى بوياۋمەن سالىنعان پورترەتى, ۇستاعان پورتفەلى مەن كوزىلدىرىگى دە بار.
ۇسىنىلعان فوتو سۋرەتتەرى, ماراپاتتارى, قۇجاتتارى – عالىمنىڭ ءومىر جولىنان, مەملەكەت پەن حالىققا جانە عىلىمعا سىڭىرگەن قىزمەتىنەن سىر شەرتەدى. تاعامتانۋ عىلىمىنداعى جاڭا باعىتتاردى قالىپتاستىرعان, ۇلت ساۋلىعىن نىعايتۋعا ارنالعان ىرگەلى زەرتتەۋلەردىڭ جەمىسىندەي – كىتاپتارى مەن ەڭبەكتەرى دە ىزدەنگەن وقىرمانعا وي سالادى. سىيعا تارتىلعان ءتۇرلى سۋۆەنيرلەر الەمدىك عىلىمي ورتاداعى بەدەلىن كورسەتكەندەي اسەر قالدىرادى.
«اكادەميك دۇنيەدەن وتكەن سوڭ ۇلى الماز تورەگەلدى ۇلى اكە مۇراسىن ارداقتاپ, تاعامتانۋ ينستيتۋتىنداعى كابينەتىندەگى جەكە قولدانعان جيھازدارى مەن كىتاپتارىن, ەڭبەكتەرى مەن ماراپاتتارىن, سونداي-اق قۇتتىقتاۋ حاتتارى مەن قۇندى زاتتارىن تۇگەلدەي ۇلىتاۋ اۋداندىق تاريحي-ولكەتانۋ مۋزەيىنىڭ قورىنا تابىستادى. وسى يگى ءىسىنىڭ ارقاسىندا مۋزەيدە ارنايى «اكادەميك تورەگەلدى شارمانوۆ كابينەتى» جاساقتالىپ, جۇرتشىلىققا ەسىگىن ايقارا اشتى. كورمە 14-19 قاڭتار ارالىعىندا كوپشىلىك نازارىنا ۇسىنىلدى» دەيدى ۇلىتاۋ اۋدانىنىڭ تاريحي-ولكەتانۋ مۋزەيىنىڭ باس قور ساقتاۋشىسى نۇرسۇلۋ بالتابايقىزى.
جەزدىدەگى جەرگىلىكتى اقساقالدار ت.شارمانوۆتىڭ ءومىرى مەن ەڭبەگى تۋرالى ەستەلىكتەر ايتتى. عالىمنىڭ ۇلت ساۋلىعى جولىنداعى سىڭىرگەن ەڭبەگى تۋرالى ماعلۇماتتار ۇسىنىلدى. كورمەنىڭ اشىلۋىمەن قۇتتىقتاعان كەنت اكىمى م.جۇمابەك ۇلتقا قىزمەت ەتكەن تۇلعانى ۇلىقتاعان ۇلىتاۋ اۋدانىنىڭ تاريحي-ولكەتانۋ مۋزەيىنىڭ ۇجىمىنا العىس حات تابىستادى.
«باقىت – بۇل دەنساۋلىق. باقىتتىڭ نەگىزى – دەنساۋلىق. ەگەر مەن حالىققا قانداي دا ءبىر جولمەن كومەكتەسە السام, ونى ساۋ ەتسەم, مەن باقىتتىمىن», دەگەن ۇلت ساۋلىعىنا جاناشىر بولعان تورەگەلدى ابىزدىڭ ەسىمى ۇمىتىلعان جوق. مۇراسى تۋعان جەرىنىڭ توسىندە تۇر!
ۇلىتاۋ وبلىسى
ۇلىتاۋدا «اكادەميك تورەگەلدى شارمانوۆقا تاعزىم» اتتى وبلىستىق كورمە اشىلدى
