فوتو: bfm.ru
بۇل سالادا سوڭعى بەس جىلدا ءوندىرىس كولەمى 5,2 ەسە ارتقان. ماسەلەن, 2019 جىلى ءوندىرىس كولەمى نەبارى 68,7 ملن تەڭگەنى قۇراسا, 2022 جىلى بۇل كورسەتكىش 183,3 ملن تەڭگەگە جەتكەن. ال 2023 جىلدان باستاپ سالا جىلىنا 400–450 ملن تەڭگە دەڭگەيىندە تۇراقتالعان.
اۆتوجابدىقتار ءوندىرىسىنىڭ ارتۋى جالپى اۆتوموبيل ونەركاسىبىندەگى رەكوردتىق كورسەتكىشتەر اياسىندا مۇمكىن بولىپ وتىر. 2025 جىلدىڭ قورىتىندىسى بويىنشا ەلىمىزدە بارلىق ۇلگىدەگى 171,1 مىڭ اۆتوكولىك ءوندىرىلىپ, ولاردىڭ جالپى قۇنى 2,3 ترلن تەڭگەدەن اسقان. مۇنداي ءوسىم ىشكى اۆتوكولىك نارىعىنىڭ كە
ڭەيىپ جاتقانىن جانە وعان ىلەسپە بولشەكتەر مەن كەرەك-جاراقتارعا, سونىڭ ىشىندە قوسالقى قىزمەت كورسەتۋ سەگمەنتىنە تۇراقتى سۇرانىس قالىپتاسقانىن كورسەتەدى.
Energyprom.kz دەرەگىنشە, 2025 جىلعى جەلتوقسان ايىنىڭ قورىتىندىسى بويىنشا جەكە اۆتوكولىكتەرگە ارنالعان قوسالقى بولشەكتەر مەن كەرەك-جاراقتاردىڭ باعاسى جىلدىق ەسەپپەن 5,5%-عا ءوستى. 2024 جىلدىڭ جەلتوقسانىندا بۇل كورسەتكىش – 3,8%-دى قۇراعان, ال سوڭعى جىلدارداعى ەڭ جوعارى باعا ءوسىمى 2022 جىلدىڭ جەلتوقسانىندا تىركەلىپ, بىردەن 24,4%-عا جەتكەن. وسىلايشا, قازىرگى باعا وزگەرىستەرى قالىپتى دەڭگەيدە قالىپ, الدىڭعى جىلدارداعى شەكتى ماندەردەن ايتارلىقتاي تومەن بولىپ وتىر.
وڭىرلىك بولىنىستە باعا ديناميكاسى بىركەلكى ەمەس. وتكەن جىلدىڭ جەلتوقسانىنداعى قورىتىندى بويىنشا جەكە اۆتوكولىكتەرگە ارنالعان قوسالقى بولشەكتەر مەن كەرەك-جاراقتاردىڭ ەڭ قىمبات باعاسى جامبىل وبلىسىندا تىركەلگەن. ولاردىڭ قۇنى وڭىردە جىل ىشىندە 15,8%-عا ءوسىپ, رەسپۋبليكالىق ورتاشا دەڭگەيدەن شامامەن ءۇش ەسە جوعارى كورسەتكىش تىركەلگەن. سونداي-اق سولتۇستىك قازاقستان, قوستاناي جانە اتىراۋ وبلىستارىندا دا 11%–13,3% ارالىعىندا ايتارلىقتاي ءوسىم بايقالعان.
كەرىسىنشە الماتى جانە اقتوبە وبلىستارىندا قوسالقى بولشەكتەر 0,1% جانە 0,8% كورسەتكىشپەن ەڭ تومەن دەڭگەيدە قۇن قوسقان. ال ۇلىتاۋ وبلىسىندا كولىكتەرگە ارنالعان قوسالقى بولشەكتەر مەن كەرەك-جاراقتاردىڭ باعاسى جىل ىشىندە وزگەرمەگەن.
ايتا كەتەيىك, اۆتوبولشەكتەر باعاسىنىڭ قالىپتى ءوسۋى جول-كولىك وقيعالارىنان زارداپ شەككەن كولىكتەر سانىنىڭ كۇرت ارتۋىنا بايلانىستى بايقالىپ وتىر. 2025 جىلدىڭ قورىتىندىسى بويىنشا مۇنداي جول-كولىك وقيعالارىنىڭ سانى 36,1 مىڭعا جەتسە, ءبىر جىل بۇرىن بۇل كورسەتكىش 31,6 مىڭدى قۇراعان. 2015–2023 جىلدار ارالىعىندا جول-كولىك وقيعالارىنىڭ سانى 13,3–18,9 مىڭ ارالىعىندا بولعان. سونىمەن قاتار, 2024 جانە 2025 جىلدارى شىعىن كولەمى 300 مىڭ تەڭگەدەن اسپايتىن, شامامەن 43 مىڭ جول-كولىك وقيعاسى تىركەلگەن.
قوسالقى بولشەكتەر سەگمەنتىمەن سالىستىرعاندا, جەكە اۆتوكولىكتەرگە تەحنيكالىق قىزمەت كورسەتۋ جانە جوندەۋ قىزمەتتەرى باعاعا ايتارلىقتاي اسەر ەتىپ وتىر. 2025 جىلدىڭ جەلتوقسانىنداعى قورىتىندى بويىنشا مۇنداي قىزمەتتەردىڭ قۇنى جىلدىق ەسەپپەن – 17,7%-عا وسكەن, ال ءبىر جىل بۇرىن ءوسىم – 10,9%-دى قۇراعان.
